1Mme moya wa nkuka, wa nkisa monyakong wa Botjhabela wa tempele ya Jehova, o lebileng nqa botjhabela; mme ka bona pela lemati la monyako ho eme banna ba mashome a mabedi a metso e mehlano; hara bona ka bona Jaasania, mora Assure, le Pelathia, mora Benaia, e le mahosana a setjhaba. 2Wa re ho nna: Mora motho, ke bona banna ba rerang mehopolo e kgopo, ba eletsang ka dikeletso tse mpe motseng ona, 3ba reng: Ha ho eso ho be nako; re ka nna ra haha matlo; motse ona ke pitsa, mme rona re dinama. 4Ha ho le jwalo, o ba porofetele; mora motho, o porofete.
5Yaba moya wa Jehova o nkwela hodimo, wa re ho nna: Ere: Jehova o re: Le itsalo, lona ntlo ya Iseraele; leha e le se hlahang kelellong tsa lona, ke a se tseba. 6Le atisitse babolauwa ba lona motseng, le tlatsitse diterata tsa wona ka ba bolailweng. 7Ha ho le jwalo, Morena Jehova o re: Babolauwa ba lona bao le ba rapaladitseng hara motse, ke bona bao e leng dinama, mme motse ke pitsa; haele lona, le tla ntshwa ho wona. 8Lerumo le a le tshaba, empa ke tla le tlisetsa lerumo: ho rialo Morena Jehova. 9Ke tla le ntsha teng, ke be ke le neele matsohong a baditjhaba, ke be ke le hlahisetse le dikahlolo. 10Le tla wa ka lerumo, mme ke tla le ahlola moeding wa Iseraele, le tle le tsebe hoba ke nna Jehova. 11Motse ona e ke ke ya eba pitsa eo le tla ba dinama tsa yona, ke mpa ke tla le ahlola moeding wa Iseraele. 12Ke hona le tla tseba hoba ke nna Jehova, lona le sa kang la tsamaya ka dikomelo tsa ka, le sa kang la etsa ka melao ya ka, le mpileng la etsa ka ditaelo tsa ditjhaba tse le teetseng hare.
13Ka re ke sa porofeta, Pelathia, mora Benaia, a shwa. Yaba ke itihela fatshe ka sefahleho, ka meketsa, ka re: Jo! Jo! Morena Jehova, na ke ho re, o ya timeletsa masala a Iseraele na? 14Lentswe la Jehova la ntlela, la re: 15Mora motho, ke banabeno, e, ke banabeno, ke ba heno, ke ba ntlo ya Iseraele, bohle bao baahi ba Jerusalema ba reng ho bona: Tlohang ho Jehova, etswe lefatshe lena le neilwe rona hore re le rue. 16Ha ho le jwalo, ere: Morena Jehova o re: Morena Jehova o re: Leha ke ba lahletse hara ditjhaba, ke ba qhalanyeditse dinaheng, ho bona ke tla mpe ke be sehalalelo ka motsotso o se o kae dinaheng tseo ba ileng ho tsona. 17Ha ho le jwalo, ere: Morena Jehova o re: Ke tla le phutha ditjhabeng, ke le bokelle dinaheng tseo le qhalanyeditsweng ho tsona, mme ke tla le nea lefatshe la Iseraele. 18Ba tla tla teng, ba tlose diila tsohle tsa teng le manyala wohle a teng. 19Ke tla ba nea pelo e le nngwe, ke be ke bee moya o motjha kahare ho bona; ke tla ntsha pelo ya lejwe nameng ya bona, mme ke ba nee pelo ya nama; 20hore ba tle ba tsamaye ka dikomelo tsa ka, ba boloke melao ya ka, ba e etse; e tle e be setjhaba sa ka, nna ke be Modimo wa bona. 21Ha ele bao dipelo tsa bona di tsamayang ka ho rata diila tsa bona le manyala a bona, ke tla bea molato wa metsamao ya bona dihloohong tsa bona: Morena Jehova o rialo.
22Yaba dikerubime di emisa dipheo tsa tsona, di ena le mabidi maloka le tsona, le kganya ya Modimo wa Iseraele e di okametse nqa hodimo. 23Mme kganya ya Jehova ya tloha moo e neng e okametse motse, ya ya ema thabeng e nqa botjhabela ho motse. 24Yaba moya o a nkuka, wa nkgutlisetsa Kalde ho ba isitsweng teng kgolehong, ka pono ya mohlolo, ka moya wa Modimo. Mme pono ya mohlolo eo ke neng ke e bone, ya tloha ho nna, ya nyolohela hodimo. 25Yaba ke bolella ba isitsweng kgolehong mantswe wohle a Jehova ao a neng a ntshenolele wona.
