EKSODA 25

₁Yaba Jehova o bua le Moshe, a re:

₂Bua le bana ba Iseraele hore ba nntshetse kabelo ya seo ba nang le sona; le amohele kabelo ya motho ka mong ya nntshetsang yona ka pelo e ntle. ₃Ke ena kabelo eo le tla e nka ho bona: Kgauta, silefera, le koporo; ₄purepera, sekarelata, krimsone, lene e ntle le boya ba podi; ₅le matlalo a dipheleu a tlotsitsweng ka bofubedu, matlalo a diqibi le difate tsa leoka; ₆ole ya lebone, le diarubetso tsa ole ya tlolo le tsa dibano; ₇mahakwe a onikse le mahakwe a tla kenngwa efodeng le mokgajwaneng. ₈Ba tla nketsetsa nqalo e halalelang, ke tle ke dule hara bona. ₉Le tla etsa tsohle ka tekanyetso ya tabernakele le ya mesebetsi yohle ya yona, kamoo ke le bontshang kateng.

₁₀Ba etse areka ya fate sa leoka: bolelele ba yona e be tswe tse pedi tse nang le halofo, bophara ba yona e be setswe se nang le halofo, mme bophahamo ba yona e be setswe se nang le halofo. ₁₁O tle o e manehe ka kgauta e hlwekileng. O e manehe kahare le kantle, mme o e etsetse mofapo wa kgauta o e potolohang. ₁₂O e tshollele mehwele e mene ya kgauta eo o tla e bea dintlheng tse nne tsa yona: mehwele e mmedi e be lehlakoreng le leng la yona, e meng mehwele e mmedi e be lehlakoreng le leng la yona. ₁₃O e etsetse mejaro ya sefate sa leoka, mme o e manehe ka kgauta. ₁₄O ntoo kenya mejaro mehweleng, mahlakoreng a areka, ho jara areka ka yona. ₁₅Mejaro e tla nne e dule mehweleng ya areka; e se ke ya tloswa. ₁₆O tla bea arekeng bopaki boo ke tla o nea bona. ₁₇O tla etsa sekwahelo ka kgauta e hlwekileng; bolelele ba sona e be ditswe tse pedi tse nang le halofo, mme bophara ba sona e be setswe se nang le halofo. ₁₈Hape, o etse dikerubime tse pedi tsa kgauta: o tle o di etse ka kgauta e teilweng, o di bee dintlheng tse pedi tsa sekwahelo. ₁₉O etse kerubime e nngwe ntlheng e ka kwano, mme o bee kerubime e nngwe ntlheng e ka kwana. Le tle le etse dikerubime hammoho le sekwahelo, dintlheng tsa sona tse pedi. ₂₀Dikerubime di ke di otlollele dipheo tsa tsona hodimo, di kgurumetse sekwahelo ka dipheo tsa tsona, mme di tadimane ka difahleho; difahleho tsa dikerubime di tadime nqa sekwahelong. ₂₁O tla bea sekwahelo hodima areka, mme ka arekeng o bee bopaki boo ke tla o nea bona. ₂₂Ke hona moo ke tla teana le wena, ke bue le wena ke le hodima sekwahelo, pakeng tsa dikerubime tse hodima areka ya bopaki, hore ke tle ke o bolelle tsohle tseo ke tla o laela tsona bakeng sa bana ba Iseraele.

₂₃Hape, o tla etsa tafole ya sefate sa leoka; bolelele ba yona e be ditswe tse pedi, bophara ba yona e be ba tswe se le seng, bophahamo ba yona e be setswe se nang le halofo. ₂₄O tle o e manehe ka kgauta e hlwekileng, mme o e etsetse mofapo wa kgauta o e potolohang. ₂₅O tle o e etsetse moqhaka o bophara ba seatla o e kopang, mme o e etsetse mofapo wa kgauta o potang moqhaka wa yona. ₂₆O tla e etsetsa mehwele e mene ya kgauta, mme o bee mehwele dintlheng tse nne tse maotong a mane a yona. ₂₇Mehwele e ke e be haufi le moqhaka, ho kenya ho yona mejaro ya ho jara tafole. ₂₈O tla etsa mejaro ya sefate sa leoka, o e manehe ka kgauta, mme tafole e tla jarwa ka mejaro. ₂₉O tle o etse mafiso a yona, le mehope ya yona, le dinkgwana tsa yona, le merifi ya yona eo ho tla etswa ditshelo ka yona; o di etse ka kgauta e hlwekileng. ₃₀O tla bea mahobe a pontsha tafoleng a nne a be teng pela ka kamehla.

₃₁O etse kandelare ya kgauta e hlwekileng: kandelare e etswe ka kgauta e teilweng; leoto la yona, le kutu ya yona, le meritshwana ya yona, le dinoko tsa yona, le dipalesa tsa yona, e be ntho e le nngwe le yona. ₃₂Ho tla tswa makala a tsheletseng mahlakoreng a yona; makala a mararo a etswe lehlakoreng le leng la kandelare, a mang makala a mararo a tswe lehlakoreng le leng la kandelare. ₃₃Meritshwana e meraro e kang amanda, le senoko le palesa di be teng lekaleng le leng; lekaleng le leng, ho be meritshwana e meraro, e kang amanda, le senoko le palesa; makala a tsheletseng a tswang kandelareng a etswe jwalo. ₃₄Ho yona kandelare, meritshwana e mene e ke e be teng e kang amanda, hammoho le dinoko le dipalesa tsa yona; ₃₅senoko se be teng tlasa makala a mabedi a tswang kandelareng, senoko se seng se be teng tlasa makala a mang a mabedi a tswang kandelareng, mme senoko se seng se be teng tlasa makala a mang a mabedi a tswang kandelareng, ho lekana makala a tsheletseng a tswang kandelareng. ₃₆Dinoko le makala di tswe ho yona, mme e be ntho e le nngwe hammoho e entsweng ka kgauta e teilweng, e hlwekileng. ₃₇O tle o e etsetse dilampi tse supileng; mme dilampi tseo tse supileng di ke di bewe ka mokgwa wa hore di bonesetse ka nqa kapele. ₃₈Matlawana a yona le dipitsana tsa yona tsa molora di ke di etswe ka kgauta e hlwekileng. ₃₉E etswe hammoho le mesebetsi ya yona yohle ka talenta ya kgauta e hlwekileng. ₄₀O hlokomele ho etsa ntho tseo ka tekanyetso eo o e bontshitsweng thabeng.