Ho dumaduma ha Baiseraele ha ba le Refidine. — Lefika la Horebe. — Baamaleke ba hlolwa.
1Phutheho yohle ya bana ba Iseraele ya tloha lefeelleng la Sine, ka taelo ya Jehova, ba ntse ba eya ka ho tsamaya ha bona; ba fihla ba hloma ditente Refidime, empa ho ne ho se metsi ao setjhaba se ka a nwang. 2Yaba setjhaba se tsekisa Moshe, sa re: Re feng metsi, re nwe! Moshe a re ho bona: Le ntsekisetsang? Le lekelang Jehova? 3Setjhaba se fela se ne se nyoretswe metsi, sa ngangisa Moshe, sa re: O ne o re ntshetsang Egepeta, ho tla re bolaisa lenyora rona le bana ba rona, le makgomo a rona? 4Yaba Moshe o howeletsa ho Jehova, a re: Ke tla etsang ka setjhaba sena? Ba se ba batla ba ntlepetsa! 5Jehova a re ho Moshe: Tswela kapele ho setjhaba, o tsamaye le baholo ba Iseraele, o nke lere la hao, leo o otlileng noka ka lona, letsohong la hao, o ye. 6Bona, ke tla ema pela hao mane lefikeng la Horebe; o tla tea lefika, mme metsi a tla tswa ho lona, sesetjhaba se nwe. Moshe a etsa jwalo pontsheng ya baholo ba Iseraele. 7A rea nqalo eo lebitso la Massa le Meriba (teko le tseko) ka baka la tseko ya bana ba Iseraele, le kahobane ba ne ba lekile Jehova, ba re: Hleka Jehova o teng hara rona, kapa ha a yo na?
8Yaba ho tla Amaleke, a lwana le Iseraele Refidime. 9Moshe a re ho Joshua: Re kgethele banna, o tswe, o lwantshe Amaleke: haele nna, hosasane, ke tla ema qhoweng ya thaba, ke nkile lere la Modimo letsohong la ka. 10Yaba Joshua o etsa kamoo Moshe a mmoleletseng kateng, a lwana le Amaleke. Moshe le Aarone le Hure ba nyolohela qhoweng ya thaba. 11Enere ha Moshe a emisa letsoho, Iseraele a hlole; ha a kokobetsa letsoho, Iseraele a hlole; ha a kokobetsa letsoho, Amaleke a hlole. 12Empa matsoho a Moshe a kgathala; yaba ba nka lejwe, ba le bea katlasa hae, a dula hodima lona, mme Aarone le Hure ba tshehetsa matsoho a hae, e mong ka ho le leng, e mong ka ho le leng; matsoho a hae a tiya jwalo ho fihlela letsatsi ha le dikela. 13Yaba Joshua o qhala Amaleke le setjhaba sa hae ka bohale ba lerumo.
14Yaba Jehova o re ho Moshe: Ngola taba ena bukeng, e be kgopotso, o be o e phete ditsebeng tsa Joshua, hoba ruri ke tla timeletsa le ho hopolwa ha Amaleke katlasa lehodimo.
15Moshe a aha aletare, a e rea lebitso la Jehova-nissi (Jehova ke folaga ya ka). 16A re: Hobane letsoho la Amaleke le ile la phahamela terone ya Jehova, ntwa ya Jehova e tla nne e be teng ho Amaleke kamehla le mehla.
