MOEKLESIA 6

₁Taba e mpe e teng eo ke e boneng tlasa letsatsi, e boima pelong tsa batho: ₂ke hoba, ereha Modimo o neile motho leruo le menono le kganya, ho fihlela a sa hlokele bophelo ba hae letho leha le le leng la tsohle tseo a ka di lakatsang, Modimo ha o mo nee sebaka sa ho ja letho la teng; ke osele ya tla ya. Hoo ke lefeela, hape ke kotsi e bohloko. ₃Le hoja motho a ne a ka tswala bana ba lekgolo, a phela lemo tse ngata, ditshiu tsa dilemo tsa hae tsa atiswa, ha moya wa hae o mpa o sa kgore bomadimatle, mme a hloka le lebitla, ke re, esita le sefolotsana se mo feta ka lehlohonolo; ₄hobane se tletse lefeela, mme ke mona se ikela lefifing, mme lebitso la sona le kwahelwa ke lefifi; ₅etlaba ha se a bona le ho tseba letsatsi; sona se na le phomolo ho ena le motho eo. ₆Le hoja a ba a ka phela lemo tse sekete se balwang habedi, a sa ka a bona lehlohonolo, ha ke re, tsohle di ikela nqalong e le nngwe na?

₇Mosebetsi wohle wa motho o iswa molomong wa hae; leha ho le jwalo, takatso ya hae ha e kgore. ₈Na ya bohlale o fetisa lewatla kang? Kapa ya fumanehileng, ya tsebang ho itsamaela pontsheng ya ba phelang, o ruang? ₉Se bonwang ka mahlo se molemo ho ena le se labalabelwang ke pelo. Hoo le hona ke lefeela le mosebetsi o nyopileng. ₁₀Se leng teng se se se kile sa rewa lebitso; haele motho, ho tsejwa seo a leng sona, le kamoo a ke keng a tsekisana le ya mo fetang ka matla kateng. ₁₁Kannete, ho na le ntho tse ngata tse atisang lefeela; ha ho le jwalo, motho a ka ruang ka tsona? ₁₂Hobane ke mang ya tsebang se ka bang molemo ho motho bophelong ba hae, ka ditshiu tsohle tsa bophelo ba hae ba lefeela, haele moo bo feta jwaloka leswiti? Kapa ke mang ya tla senolela motho se tla ba teng tlasa letsatsi, ha a se a le siyo?