1Dintsintsi tse shweleng di nkgisa le ho bodisa ole ya motlotsi; ho jwalo le bothoto bo bonyenyane, bo senya botumo ba ya tumileng ka bohlale le kganya. 2Pelo ya ya bohlale e letsohong la hae le letona, empa pelo ya lewatla e ho le letshehadi; 3esita leha sethoto se ya ka tsela, se ye se hloke kelello, mme se bolelle bohle hore ke dithoto. 4Ha pelo ya mmusi e ka o halefela, o se ke wa furalla ditulo tsa hao, hobane mosa o ka o phemisa phoso e kgolo.
5Ke bone taba e mpe tlasa letsatsi, ke phoso e yeng e etswe ke mmusi: 6ke hobane bothoto bo ye bo bewe tulong tse phahameng, mme barui ba ye ba dule tulong tse kokobetseng. 7Ke bone bafo ba palamang, le mahosana a tsamayang ka maoto jwaloka bafo.
8Ya tjhekang lemena o tla wela ho lona, ya etsang sekgeo lerakong o tla longwa ke noha. 9Ya suthisang majwe o tla pitlwa ke wona; ya rathang patsi o tla tswa kotsi. 10Ha tshepe e le botswa, e sa leotswe, ya sebetsang ka yona o tshwanetse ho etsa ka matla; bohlale bo ka tsosetsa motho masene.
11Ha noha e loma e eso ho upellwe, ya e upellang ha a sa na thuso.
12Mantswe a tswang molomong wa ya bohlale a kgahlisa kahohle, empa melomo ea lewatla e a le timetsa. 13Qalo ya mantswe a molomo wa lona ke bothoto, mme qetello ya puo tsa lona ke bohlanya bo senyang. 14Sethoto se atisa mantswe, kanthe ha ho motho ya tsebang se tla hlaha, se tla etsahala kamora hae. Ya ka mo senolelang sona ke ha e ka ba mang? 15Mosebetsi wa mawatla o a a kgathatsa, hobane ha a tsebe le hanyenyane ho kgetha tsela e isang motseng.
16Ho madimabe lefatshe leo morena wa lona e leng ngwana, leo mahosana a lona a jang e sa le hosasa! 17Ho madimatle lefatshe leo morena wa lona e leng mora batho ba kgabane, leo mahosana a lona a jang ka nako e tshwanelehang, hore a bone matla, e seng ho tahwa.
18Difate tse ferileng ntlo di wa ka baka la botswa ba matsholo a e ferileng, mme ntlo e nela ka baka la matsoho a tswafang ho sebetsa. 19Seboka se etsetswa thabo, veine e thabisa ba phelang, ka ditjhelete ho fihlelwa tsohle.
20Se hlapaole morena leha e ka ba mehopolong ya hao, o se ke wa hlapaola morui leha o le dikamoreng tsa hao tsa ho robala; hobane manong a lehodimo a ka tshoha a jala tse boletsweng, dinonyana tse rurang tsa hasa mantswe a hao.
