DEUTERONOMA 31

₁Moshe a boela a ya, mme a bolella Iseraele kaofela ditaba tseo; ₂a re ho bona: Kajeno, ke na le dilemo tse lekgolo le nang le mashome a mabedi; ha ke sa na ho tswa le ho kena; hape, Jehova o mpoleletse, a re: O ke ke wa tshela Jordane. ₃Jehova, Modimo wa hao, ke yena ya tla o etella pele, mme o tla fedisa ditjhaba tseno pela hao, o tle o rue naha ya tsona. Joshua ke yena ya tla o etella pele, jwalokaha Jehova a boletse. ₄Jehova o tla etsa ka ditjhaba tseo jwalokaha a entse ka Sihone le ka Oge, marena a Baamore, le ka naha ya bona, kamoo a ba fedisitseng kateng. ₅Jehova o tla neela ditjhaba tseo matsohong a lona, le tle le di etse ka ditaelo tsohle tseo ke le laelang tsona. ₆Ipheng matla, mme le tiye dipelo; se tshabeng, mme le se ke la ba tshoha, hobane Jehova, Modimo wa hao, ke yena ya tsamayang le wena; a ke ke a o tlohela, a ke ke a o lahla.

₇Moshe a bitsa Joshua, pontsheng ho Baiseraele kaofela, a re ho yena: Iphe matla, mme o tiye pelo; hobane ke wena ya tla kena le setjhaba sena lefatsheng leo Jehova a anetseng bontata bona hore o tla ba fa lona. ₈Jehova, ka sebele sa hae, o tla o etella pele; o tla ba le wena, mme a ke ke a o tlohela, a ke ke a o lahla; se tshabe, mme o se ke wa tepella.

₉Moshe a ngola molao ona, mme a o nea baprista, bana ba Levi, ba jarang areka ya selekane sa Jehova, le baholo bohle ba Iseraele. ₁₀Moshe a ba laela, a re: Qetellong ya dilemo tse supileng, ka selemo sa teselo, moketeng wa Metlotlwane, ₁₁ha Baiseraele bohle ba tlile ho itlhahisa pela Jehova, Modimo wa hao, nqalong eo a tla e khetha, o tla bala molao ona pela Baiseraele kaofela, ba tle ba o utlwe. ₁₂O tla phutha setjhaba, banna, le basadi, le bana, le moditjhaba ya metseng ya hao, ba tle ba utlwe, mme ba ithute ho tshaba Jehova, Modimo wa lona, mme ba hlokomele ho etsa ditaba tsohle tsa molao ona. ₁₃Bana ba bona ba sa kang ba tseba ditaba tseo, ba tla utlwa, mme ba tla ithuta ho tshaba Jehova, Modimo wa lona, ka matsatsi wohle a ho phela ha lona lefatsheng leo le yang ho le rua ka ho tshela Jordane.

₁₄Jehova a re ho Moshe: Bona, letsatsi la ho falla ha hao le atametse; bitsa Joshua, mme le itlhahise tenteng ya pokano, ke tle ke mo laele. Moshe le Joshua ba ya, ba itlhahisa tenteng ya pokano. ₁₅Jehova a itlhahisa tenteng topallong ya leru, mme topallo ya leru ya ema e okametse monyako wa tente.

₁₆Jehova a re ho Moshe: Bona, o se o ya orohela ho bontatao, mme setjhaba sena se tla tloha se itshilafatsa ka ho ineela medimo esele ya lefatshe leo se yang ho aha hara lona; se tla mphuralla, se tlole selekane sa ka, seo ke se entseng le sona. ₁₇Mohlang oo, kgalefo ya ka e tla ba tukela; ke tla ba tlohela, ke ba patele sefahleho sa ka; ba tla jewa ke mahloko a mangata, ba fihlelwe le ke mahlomola a mangata. Mohlang oo, ba tla re: Na hase kahobane Modimo wa rona o le siyo hara rona, re hlahetsweng ke mahloko ao na? ₁₈Mohlang oo, ruri ke tla pata sefahleho sa ka ka baka la bobe bohle boo ba tla bo etsa; hobane etlaba ba fapohile, ba tle ba latele medimo e meng. ₁₉Jwale he, le ingolleng sefela sena, mme o se rute bana ba Iseraele, o se bee melomong ya bona hore sefela sena e tle e be paki ya ka ho bana ba Iseraele. ₂₀Hobane ke ya isa setjhaba sena lefatsheng le kollang lebese le dinotshi, leo ke anetseng bontata bona hore ke tla ba nea lona; etlare ha ba jele ba kgotse, ba nonne, ba tla kgelohela ho medimo esele, ba e sebeletse; ba tla nkgesa, ba tla tlola selekane sa ka. ₂₁Etlare ha ba hlahelwa ke mahloko le mahlomola a mangata, sefela sena se tla ba qosa, jwaloka paki, hobane se ke ke sa lebalwa ke melomo ya ditloholo tsa bona; etswe ke tseba merero ya dipelo tsa bona, eo ba e etsang kweno, ha ke eso ho ba kenye lefatsheng leo ke anneng hore ke tla ba nea lona.

₂₂Moshe a ngola sefela sena hona mohlang oo, mme a se ruta bana ba Iseraele.

₂₃Jehova a laela Joshua, mora Nune, a re ho yena: Iphe matla, o tiye pelo, hobane ke wena o tla kenya bana ba Iseraele lefatsheng leo ke ba anetseng hore ke tla ba fa lona, mme nna ke tla ba le wena.

₂₄Eitse hobane Moshe a qete ho ngola ditaba tsa molao oo bukeng, ho sa hlokwe leha e le e nngwe, ₂₅a laela Balevi, ba jarang areka ya selekane sa Jehova, a re: ₂₆Nkang buka ena ya molao, mme le e bee haufi le areka ya selekane sa Jehova, Modimo wa lona, e tle e be paki ho wena hona teng. ₂₇Hobane ke tseba boikgantsho ba hao le molala wa hao o thata. Bonang, ha esita ke sa ntsane ke phela le lona kajeno, le nnile la ikgantshetsa Jehova, le tla ikgantsha haholo hakakang, ha ke se ke shwele! ₂₈Mphutheleng baholo bohle ba meloko ya lona, le bahlahlobi ba lona, mme ke tla ba bolella ditaba tsena, ba tle ba di utlwe; mme ke tla bitsa lehodimo le lefatshe ho ba dipaki ho bona. ₂₉Hobane ke a tseba hoba ha ke se ke shwele le tla itshenya ruri; mme le tla fapoha tsela eo ke le laetseng yona; mme mehleng ya morao, le tla hlahelwa ke tlokotsi, kahobane le tla etsa ho leng hobe pela Jehova, mme le tla mo phephetsa ka mesebetsi ya matsoho a lona.

₃₀Moshe a bolella phutheho yohle ya Baiseraele mantswe a sefela sena, a ba a a qeta kaofela.