DEUTERONOMA 11

₁Rata ke hona Jehova, Modimo wa hao, mme o boloke ditemoso tsa hae kamehla, le melao ya hae, le dikahlolo tsa hae, le ditaelo tsa hae.

₂Hape, lemoha ditaba kajeno; hobane ha ke bue le bana ba lona ba sa kang ba tseba le ho bona kgalemelo ya Jehova, Modimo wa lona, le boholo ba hae, le letsoho la hae le matla, le letsoho la hae le otlolohileng, ₃le mehlolo ya hae, le diketso tsa hae tseo a di entseng hara Egepeta, ho Faro, morena wa Egepeta, le naheng ya hae kaofela, ₄le seo a se entseng ka makgotla a Egepeta, le ka dipere tsa bona, le ka makoloi a bona; kamoo a ba apesitseng kateng, ka metsia Lewatle le Lefubedu, mohla ba neng ba le phallela, le kamoo Jehova a ba timeditseng kateng, ho fihlela la kajeno; ₅le seo a se etseditseng lona, lefeelleng leo, ho isa nakong eo le fihlileng sebakeng sena ka yona; ₆le seo a se entseng Dathane le Abirame, bara ba Eliabe, mora Rubene, kamoo lefatshe le ahlamisitseng molomo wa lona, la ba metsa le ba matlo a bona, le ditente tsa bona, le dintho tsohle tsa bona, ba le hara Baiseraele kaofela. ₇Hobane mahlo a lona a bone diketso tsohle tse kgolo tseo Jehova a di entseng. ₈Bolokang ditaelo tsohle tseo ke o laelang tsona kajeno, le tle le be matla, mme le kene, le hape lefatshe leo le yang ho le rua; ₉mme le atise matsatsi a lona lefatsheng le kollang lebese le dinotshi, leo Jehova a anetseng bontata lona hore o tla le fa bona le ditloholo tsa bona. ₁₀Hobane naha eo o yang ho kena ho yona ho e rua, hase naha e tshwanang le ya Egepeta, eo le tswileng ho yona, moo o neng o jala peo ya hao, le moo o neng o nosetsa masimo a hao ka maoto a hao, jwalokaha ho nosetswa tshimo ya meroho. ₁₁Naha eo le yang ho e rua, ke naha ya dithaba, le ya dikgutlo, e nosetswang ke metsi a pula ya lehodimo. ₁₂Ke naha eo Jehova, Modimo wa hao, a e baballang, eo mahlo a Jehova, Modimo wa hao, a e tadimang kamehla, ho qala ha selemo se thwasa, ho isa ha selemo se fela.

₁₃Etlare ha le mamedisisa ditaelo tsa ka tseo ke le laelang tsona kajeno, ha le rata Jehova, Modimo wa lona, le mo sebeletsa ka dipelo tsa lona tsohle, le ka meya ya lona yohle, ₁₄ke tla nesetsa naha ya lona pula, nakong e tshwanelehang, pula ya tsheola le pula ya hwetla, o tle o kotule koro ya hao, le veine e ntjha ya hao, le ole ya hao. ₁₅Naheng ya hao ke tla medisa jwang ba mehlape ya hao; mme o tla ja, o kgore. ₁₆Iponeleng, pelo tsa lona di se ke tsa thetswa, mme le se ke la kgeloha, la ya sebeletsa medimo esele, la e kgumamela; ₁₇esere kgalefo ya Jehova ya le tukela, mme Jehova a kwala mahodimo, hore pula e be siyo, mme lefatshe le se ke la hlola le bea dijo tsa lona, mme lona la timela kapele lefatsheng leo le molemo, leo Jehova a le neang lona.

₁₈Kenyang ke hona mantswe ana ao ke le bolellang wona ka dipelong tsa lona, le meyeng ya lona, mme le a tlame ho ba pontsho matsohong a lona, mme a be jwaloka meqhaka pakeng tsa mahlo a lona. ₁₉Le a rute bana ba lona, o bue ka wona ha o dutse tlung ya hao, leha o tsamaya tseleng, leha o robala, leha o tsoha borokong. ₂₀A ngole le difateng tsa menyako ya ntlo ya hao, le mamating a hao; ₂₁hore matsatsi a lona, le matsatsi a bana ba lona, a tle a ngatafale lefatsheng leo Jehova a anetseng bontata lona hore o tla ba nea lona, a be ka ka matsatsi a mahodimo a okametseng lefatshe. ₂₂Hobane, ekare ha le boloka hantle ditaelo tsohle tseo ke le laelang tsona kajeno ho etsa ka tsona, le rata Jehova, Modimo wa lona, le tsamaya ditseleng tsa hae kaofela, le mo kgomarela, ₂₃ke moo Jehova a tla falatsa pela lona ditjhaba tseno tsohle, mme le tla rua naha ya ditjhaba tse le fetisang ka bongata le ka matla. ₂₄Nqalo e nngwe le e nngwe e tla hatwa ke bohato ba maoto a lona, e tla ba ya lona. Meedi ya lona e tla ba ho tloha feelleng ho isa Lebanone, ho tloha nokeng ya Eufrate ho isa Lewatleng la Bophirimela. ₂₅Ha ho ka ke ha eba motho ya emang pela lona; Jehova, Modimo wa lona, o tla kenya letsoso la lona le tshabo ya lona naheng yohle eo le tla e hata ka maoto a lona, jwalokaha a le boleletse.

₂₆Bonang, kajeno ke bea hlohonolofatso le thohako pela lona; ₂₇hlohonolofatso ha le ka utlwa ditaelo tsa Jehova, Modimo wa lona, tseo ke le laelang tsona kajeno; ₂₈thohako ha le sa utlwe ditaelo tsa Jehova, Modimo wa lona, mme le kgeloha tsela eo ke le laelang yona kajeno, le latela medimo esele, eo le sa kang la e tseba, le mehla. ₂₉Etlare hobane Jehova, Modimo wa hao, a o kenye lefatsheng leo o yang ho le rua, o tle o bolele hlohonolofatso thabeng ya Gerisime, le thohako thabeng ya Ebale. ₃₀Thaba tseo, ha ke re, di mose wane, ho Jordane, kamora tsela e lebileng nqa bophirimatsatsi, naheng ya Bakanana ba ahileng lehwatateng, mabapa le Gilgale, haufi le dieike tsa More? ₃₁Hobane le se le ya tshela Jordane ho ya rua lefatshe leo Jehova, Modimo wa lona, a le neang lona; le tla le rua, le ahe ho lona. ₃₂Itiiseng, le phethe melao yohle, le ditaelo tsohle tseo ke di beang pela lona kajeno.