1Jwale, ha le tsohile le Kreste, batlang dintho tse hodimo, moo Kreste a dutseng letsohong le letona la Modimo. 2Hopolang dintho tse hodimo, e seng tse lefatsheng. 3Hobane le shwele, mme bophelo ba lona bo patilwe le Kreste ho Modimo. 4Mme Kreste, e leng bophelo ba lona, mohla a hlahang, le lona le tla hlaha le yena kganyeng.
Bakolose ba kgothatswa ho phela ka kgalalelo, ka lerato, le ka borapedi.
5Le bolaye ke hona ditho tsa lona tse leng lefatsheng, ke ho re, bofebe, le ditshila, le maikutlo a mabe, le ditakatso tse mpe, le takatso ya moruo, e leng ho sebeletsa modimo wa bohata. 6Ke ka baka la ntho tseo bohale ba Modimo bo tlang hodima bana ba ho se dumele. 7Ke tseo le lona le neng le tsamaya ho tsona pele, ha le ne le sa phela ka tsona. 8Empa jwale, lahlang le lona, ntho tseo kaofela, e leng bohale, le ho itshena, le lonya, le dinyefolo; mme polelo e dihlong e se ke ya tswa melomong ya lona.
9Le se ke la thetsana ka mashano; le hlobole motho wa kgale le diketso tsa hae; 10mme le apare motho e motjha, ya ntjhafallang tsebong ka setshwantsho sa ya mmopileng. 11Mona, ha ho Mogerike, leha e le Mojuda, leha e le lebollo, leha e le boqai, leha e le mobarebare, leha e le Moskitha, leha e le ya ruilweng, leha e le ya sa ruwang; empa Kreste e le ntho tsohle, le ho bohle. 12Le apare ke hona, kaha le le bakgethwa ba Modimo, ba halalelang, ba ratwang, maikutlo a mohau, a molemo, a boikokobetso, a bonolo, a mamello. 13Le mamellane, le rekolohelane, mme ekare ha e mong a ena le komang le e mong jwalokaha Kreste a le hauhetse, etsang jwalo le lona. 14Kahodima tseo tsohle le apare lerato, e leng tlamo ya phetheho. 15Mme kgotso ya Modimo, eo le e biletswang ho ba mmele o le mong, e buse pelong tsa lona; hape le be le teboho.
16Lentswe la Kreste le ikahele ho lona ka moeno, ho le hlahisetsa bohlale bohle; le nne le rutane, mme le kgothatsane ka dipesalema, le dithoko, le difela tsa moya, le ntse le binela Morena ka dipelo tsa lona, ka bokgabane. 17Mme seo le se etsang, leha e ka ba eng le eng, ka ho bua, kapa ka ho sebetsa, le etse tsohle ka lebitso la Morena Jesu, le ntse le leboha ka yena Modimo Ntate.
Ditshwanelo tsa ntlo.
18Basadi, ikokobetseng katlase ho banna ba lona, jwalokaha ho tshwaneleha Moreneng.
19Banna, ratang basadi ba lona, mme le se ke la ba halefela.
20Bana, utlwang batswadi ba lona nthong tsohle; hobane ke taba e kgahlisang Morena.
21Bontata bana, se halefiseng bana ba lona, ba tle ba se ke ba nyahama dipelo.
22Bahlanka, utlwang nthong tsohle bao e leng benghadi ba lona ka nama, le se ke la ba sebeletsa feela ha ba le tadimile, jwaloka hoja le rata ho kgahlisa batho, e mpe e be ka pelo e kgabane, ka ho tshaba Modimo. 23Mme seo le se etsang, leha e ka ba eng le eng, le se etse ka pelo e ratang jwaloka hoja le etsetsa Morena, e seng batho; 24le tswe le tseba hobane le tla fuwa ke Morena moputso wa lefa; le sebeletsa Kreste Morena. 25Ya etsang bokgopo, o tla jara bokgopo boo a bo entseng; hape Modimo ha o ahlole ka tshobotsi ya batho.
