AMOSE 2

₁Jehova o itse: Ka baka la melato e meraro, kapa e mene ya Moabe — teng nke ke ka fetoha — kahobane ba tjhesitse masapo a morena wa Edomo, ba a etsa molora; ₂ke tla akgela mollo Moabe, o tle o tjhese matlo a borena a Keriothe, mme Moabe o tla timela moferefereng oo hara mokgosi le modumo wa terompeta; ₃ke tla timetsa moahlodi mahareng a hae, le marena a hae ke a fedise hammoho le yena: ho itswalo ke Jehova.

₄Jehova o itse: Ka baka la melato e meraro, kapa e mene ya Juda — teng nke ke ka fetoha — kahobane ba nyedisitse molao wa Jehova, ba sa ka ba boloka ditaelo tsa hae, ba mpa ba kgeloswa ke mashano a bona ao bontata bona moholo ba ileng ka wona; ₅ke tla akgela mollo Juda, o tle o tjhese matlo a borena a Jerusalema.

₆Jehova o itse: Ka baka la melato e meraro, kapa e mene ya Iseraele — teng nke ke ka fetoha — kahobane ba reka tjhelete ka ya lokileng, le ka mofumanehi ba reka dieta, ₇ba lakatsa ho bona lerole la lefatshe hodima hlooho ya mofutsana, mme ba kgopamisa taba tsa ba banyenyane; motho le ntatae ba kenela mosadi a le mong, ba tle ba tlotlolle lebitso la ka le kgethehileng; ₈mme ba robala dikobong tse nketsweng molato pela dialetare tsohle, ba nwa veine ya ditefo tsa bona tlung ya Modimo wa bona ... ₉Athe ke nna ke neng ke timetse Baamore pela lona, bao bolelele ba bona bo neng bo le ka ka bolelele ba dikedare, ba le matla jwaloka dieike, ka timetsa tholwana tsa bona hodimo le metso ya bona tlase. ₁₀Hape, ke nna ke neng ke le ntshe lefatsheng la Egepeta, ka le tsamaisa feelleng ka dilemo tse mashome a mane, le tle le rue naha ya Baamore; ₁₁mme ke tsositse baporofeta hara bana ba lona, le hara bahlankana ba lona ke tsositse banasari. Na ha ho jwalo, bana ba Iseraele? ho bolela Jehova. ₁₂Empa le nositse banasari veine; haele baporofeta, le ba laetse, la re: Le se ke la porofeta. ₁₃Bonang, ke tla le hatisa, jwaloka koloi e tletseng mangata ha e hatisa lefatshe; ₁₄ya lebelo o tla sitwa ho baleha, ya matla a ke ke a itiisa ka matla a hae, senatla se ke ke sa boloka ho phela ha sona. ₁₅Ya tshwereng seqha a ke ke a ema, ya maoto a bobebo a ke ke a ipholosa, ya palamang pere a ke ke a boloka ho phela ha hae; ₁₆leha e le eo e leng senatla hara dinatla, o tla baleha a hlobotse ka tsatsi leo: ho itswalo ke Jehova.