DIKETSO 22

₁Banna ba heso le bontate, mamelang jwale meitatolo ya ka ho lona.

₂Eitse ha ba utlwa hoba o bua le bona ka puo ya Seheberu, ba eketsa ho kgutsa.

₃Yaba o re: Nna, ke Mojuda, ya tswaletsweng Tarese wa Silisia; ke mpa ke holetse motseng wona maotong a Gamaliele; ka rutwa ka mokgwa o fetisisang ho ya ka molao wa bontata rona, ka ba le tjheseho ho Modimo jwaloka lona kaofela kajeno. ₄Ka ba ka hlorisa le thuto eo ho isa ho bolayeng, ka tlama banna le basadi, ka ba kenya teronkong, ₅kamoo le yena moprista e moholo a ka pakang kateng, le phutheho ya baholo kaofela; hobane ke ne ke nke le mangolo ho bona, ho a isa ho ba heso ba Damaseka, ka ba ka ya teng ho tlama ba thuto eo ba ahileng teng, le ho ba tlisa Jerusalema, hore ba otlwe.

₆Ka re ke ntse ke tsamaya, ke se ke atametse Damaseka, ka nako ya motshehare, hang ka teelwa hare ke lesedi le leholo, le tswang lehodimong. ₇Ka wela fatshe, mme ka utlwa lentswe le reng ho nna: Saule, Saule, o ntlhorisetsang na? ₈Ka araba, ka re: O mang, Morena? A re ho nna: Ke nna Jesu wa Nasaretha, eo o mo hlorisang. ₉Jwale, ba nang le nna le bona ba kile ba bona lesedi, mme ba le tshoha, ba mpa ba sa ka ba utlwa lentswe la ya buang le nna. ₁₀Ka re: Morena, ke tla etsang na? Morena a re ho nna: Ema, o ye Damaseka; ke moo o tla bolellwa tsohle tseo o tshwanetseng ho di etsa. ₁₁Mme kahobane ke ne ke sitwa ho bona ka baka la kganya ya lesedi leo, bao ke neng ke na le bona ba ntsamaisa ka letsoho, mme ka ya Damaseka.

₁₂Teng, Ananiase, monna ya tshabang Modimo ka mokgwa wa molao, ya hlomphuwang ke Bajuda kaofela ba ahileng Damaseka, ₁₃a tla ho nna, e ema pela ka, a mpolella, a re: Saule, ngwaneso, tutuboloha. Mme ka yona nako eo ka mmona. ₁₄A re: Modimo wa bontata rona o ikgethetse wena ho tseba thato ya wona, le ho bona Ya lokileng, le ho utlwa lentswe la molomo wa hae. ₁₅Hobane o tla ba paki ya hae pela batho bohle, ho tiisa tseo o di boneng, le tseo o di utlwileng. ₁₆Mme jwale, o diehetseng? Ema, o kolobetswe, mme o hlatsuwe dibe tsa hao, ka ho rapela lebitso la Morena.

₁₇Yare mohla ke kgutletseng Jerusalema, ha ke ntse ke rapela tempeleng, ka hapuwa ke Moya. ₁₈Ka bona Morena a mpolella, a re: Phakisa o tlohe Jerusalema kapele; hobane ba ke ke ba amohela polelo eo o mpolelang ka yona. ₁₉Ka re: Morena, ba tseba haholo hobane ke nna ya neng a kenya teronkong, a shapa le masinagogeng ba dumetseng ho wena. ₂₀Le mohla ho neng ho tshollwa madi a Setefane, paki ya hao, le nna ke ne ke le teng, ka dumela polao ya hae, mme ka lebela dikobo tsa ba mmolayang. ₂₁Yaba Morena o re ho nna: Tloha, ke tla o romela ditjhabeng hole.

₂₂Ba mo mamela ho fihla polelong eo; empa jwale, ba phahamisa mantswe a bona, ba re: Motho ya jwalo a tloswe lefatsheng; hobane ha a tshwanela ho phela. ₂₃Ba howa, ba hlobola dikobo tsa bona, ba kubisetsa lerole sebakeng. ₂₄Yaba molaodi wa sekete o laela hore a iswe qhobosheaneng, a re, a botswe ka ho shapuwa, hore a tle a tsebe lebaka leo ba mo howellang lona. ₂₅Eitse ha ba mo tlamile ka marapo, Pauluse a re ho molaodi wa lekgolo ya emeng moo: Hleka le na le tokelo ya ho shapa motho wa Roma, a eso ho ahlolwe na? ₂₆Yare ha molaodi wa lekgolo a utlwa hoo, a ya bolella molaodi wa sekete, a re: O iponele ho seo o ya se etsa; hobane motho eo ke Moroma. ₂₇Yaba molaodi wa sekete o tla ho Pauluse, mme a re ho yena: Ako mpolelle hore na o fela o le Morena na? A re: E, ke yena. ₂₈Molaodi wa sekete a re: Seboko seo ke itheketse sona ka theko e kgolo. Pauluse a re: Nna, ke se tswaletswe. ₂₉Yaba ba neng ba ya mmotsa ka ho mo shapa, ba phakisa ba tloha ho yena, mme molaodi wa sekete le yena a tshaba, ha a utlwa hore ke Moroma, kahobane a ne a mo tlamile.

₃₀Ka hosasane, kahobane a ne a rata ho tseba ruri seo Bajuda ba mo qosang ka sona, a mo tlamolla, mme a laela hore baprista ba baholo le ba lekgotla kaofela ba bokane, a ntoo tlisa Pauluse, a mmea pela bona.