DIKETSO 19

₁Eitse ha Apolose a sa le Korinthe, Pauluse a haola dinaha tsa Asia tse kahodimo, a tla Efese, mme teng a fihlela barutuwa ba bang. ₂A re ho bona: Na le amohetse Moya o Halalelang, mohla le dumelang na? Yaba ba re ho yena: Ha re eso ho utlwe hore Moya o Halalelang o teng. ₃A re ho bona: Le kolobeditswe ka kolobetso efe na? Ba re: Ka kolobetso ya Johanne. ₄Pauluse a re: Efela Johanne o kolobeditse ka kolobetso ya pako, a bolella batho hore ba dumele ho ya tlang kamora hae, e leng Jesu Kreste. ₅Eitse ha ba utlwa hoo, ba kolobetswa lebitsong la Morena Jesu. ₆Yare ha Pauluse a ba beile matsoho, Moya o Halalelang wa tla hodima bona, ba bua dipuo, mme ba porofeta. ₇Banna bao bohle e ne e batla ho ba ba leshome le metso e mmedi.

₈Pauluse a kena sinagogeng, a bua a sa tshabe, a fetolana le Bajuda ka dikgwedi tse tharo, a ba kgodisa tabeng tsa mmuso wa Modimo. ₉Ba bang ha ba ithatafatsa, mme ba hana ho dumela, ba nyatsa le tsela ya Morena pela bongata, a tloha ho bona, a kgetha barutuwa, a ntoo ruta ka matsatsi wohle sekolong sa e mong ya bitswang Tirano. ₁₀Taba tseo tsa nna tsa eba jwalo ka dilemo tse pedi, bohle ba ahileng Asia ba ba ba utlwa lentswe la Morena Jesu, Bajuda le Bagerike. ₁₁Modimo wa nna wa etsa mehlolo e makatsang ka matsoho a Pauluse. ₁₂Esita dituku le masela a neng a amile mmele wa hae, a ne a bewa hodima ba kulang, mme malwetse a ne a ba tlohela, le meya e mebe e ne e tswa ho bona.

₁₃Yaba Bajuda ba bang, e leng dingaka tse reng di ntsha batemona, tse sollang hohle, ba leka ho bitsa lebitso la Morena Jesu hodima ba kenweng ke meya e mebe, ba re: Re a le laela ka Jesu ya bolelwang ke Pauluse. ₁₄Ba etsang hoo ba ne ba supile, e le bara ba Mojuda Skefa, moprista e moholo. ₁₅Empa moya o mobe wa ba araba, wa re: Jesu, ke a mo tseba, ke tseba le Pauluse; empa lona, le bomang? ₁₆Yaba motho eo motemona a leng ho yena, o itihela hodima bona, a ba beta, a ba etsa hampe, ba ba ba baleha tlung eo, ba hlobotse, ba le maqeba. ₁₇Taba eo ya tsejwa ke Bajuda kaofela le Bagerike ba ahileng Efese; ba welwa bohle ke tshabo, mme lebitso la Morena Jesu la tlotliswa. ₁₈Ba bangata ba dumetseng ba tla, ba ipolela le ho pepesa diketso tsa bona. ₁₉Le ba bangata ba neng ba tshepile ditaba tsa bonohe, ba tlisa dibuka tsa bona, ba di tjhesa pela bohle; ha ho lekanngwa theko ya tsona, ha fihlelwa hoba e lekane le ditjhelete tsa silefera tse dikete tse mashome a mahlano. ₂₀Lentswe la Morena la nna la ata jwalo, la sebetsa ka matla.

₂₁Kamora tseo, Pauluse a rera, ka kgopotso ya Moya, ho ya Jerusalema, ka tsela ya Masedonia le ya Akaea, a re: Etlare ha ke ile teng, e ka kgona ke bone le Roma. ₂₂Yaba o romela Masedonia, ba babedi ho ba mo tlatsang, e le Timothea le Eraste; haele yena, a hlola Asia matsatsi a mang.

₂₃Empa mehleng eo, moferefere o moholoholo wa hlaha bakeng sa Tsela ya Morena. ₂₄Hobane setei se seng sa silefera, se bitswang Demetriuse, se sebetsang ditempelana tsa Diana tsa silefera, se ne se ruisa haholo ba sebetsang mosebetsi oo; ₂₅sa ba bokella hammoho le ba bang ba mesebetsi e tshwanang le oo, sa re ho bona: Banna, le a tseba hobane mosebetsi wona ke leruo la rona. ₂₆Le a bona, le a utlwa, hoba Pauluse eo o se a kgodisitse batho ba bangata, e seng Efese feela, e batla ho ba Asia kaofela; o bile o ba kgelositse ka ho re, medimo e etswang ka matsoho hase medimo. ₂₇Kotsi ya taba eo, hase feela hore mosebetsi wa rona o tla nyediseha; empa le yona tempele ya mofumahadi Diana, modimo o moholo, e tla etswa lefeela; mme yena ka sebele ya hlomphuwang ke Asia kaofela le lefatshe lohle o tla timellwa ke kganya ya hae.

₂₈Yare ha ba utlwa hoo, ba tlala bohale, ba howa, ba re: O moholo, Diana wa Baefese! ₂₉Motse kaofela wa ba wa tlala moferefere; ba phallela theatereng hammoho hobane ba tshware Gaiuse le Aristarke, banna ba Masedonia, balekane ba Pauluse. ₃₀Pauluse o ne a rata ho hlaha pela setjhaba, empa barutuwa ba mo thibela. ₃₁Le ba baholo ba bang ba Asia, bao e leng metswalle ya hae, ba romela ho yena, ba rapela hore a se ke a hlaha theatereng. ₃₂Haele batho, ba bang ba ne ba howa ka hore, ba bang ka hore; hobane e ne e le pokano e moferefere, mme bongata jwa bona bo ne bo sa tsebe seo bo se bokanetseng. ₃₃Jwale ba ntsha Aleksandere hara bongata, a sutuletswa pele ke Bajuda; Aleksandere a hwehla ka letsoho, a rata ho ikarabela ho setjhaba. ₃₄Empa yare ha ba bona hobane ke Mojuda, ba howa kaofela ka lentswe le le leng, ka hora tse batlileng ho ba pedi, ba re: O moholo Diana wa Baefese!

₃₅Yaba mongodi wa motse o kgutsisa bongata, a re: Banna ba Efese, ke ofe motho ya sa tsebeng hobane motse wa Baefese ke mmoloki wa tempele ya Diana, modimo o moholo, le wa setshwantsho sa hae se weleng ho Jupitere? ₃₆Haele mona ditaba tseo di se na ho latolwa, e ka kgona le kgutse lerata, mme le se ke la etsa letho ka potlako. ₃₇Hobane banna bao le ba tlisitse mona, athe hase banyefodi, leha e le basebi ba modimo wa lona. ₃₈Ha ekaba Demetriuse le ba sebetsang le yena, ba ena le tseko le e mong, lekgotla le bulehile, le baahlodi ba teng; ha ba ke ba isane nyeweng. ₃₉Ekare ha le ena le taba e nngwe eo le e tsekang, e ka ahlolwa phuthehong e nang le tshwanelo. ₄₀Hobane re se re ikentse tsietsing ya ho botswa moferefere wa kajeno, haele mona ho se taba eo re ka itatolang ka yona bakeng sa pokano ena. ₄₁Yare hobane a bolele taba tseo, a kgutlisa batho.