II SAMUELE 22

₁Eitse hobane Jehova a namolele Davida matsohong a dira tsohle tsa hae, le matsohong a Saule, Davida a binela Jehova dithoko tse reng:

₂Jehova ke lefika la ka le qhobosheane ya ka, monamoledi wa ka. ₃Modimo ke lefika la ka leo ke tshabelang ho lona; ke thebe ya ka, lenaka la poloko ya ka, qhobosheane e phahameng ya ka, le setshabelo sa ka, Mopholosi wa ka ya nnamoletseng bothateng! ₄Ke howeletsa, ke re: Jehova o loketse ho bokwa! Mme ke namolelwa matsohong a dira tsa ka.

₅Maqhubu a lefu a ne a nkopetse hare, diphororo tsa tshenyo di ne di ntshositse; ₆marapo a lebitla a ne a ntikile, mamena a lefu a ne a ntshwasitse. ₇Matswalong a ka, ka bitsa ho Jehova, ka hoeletsa ho Modimo wa ka. A utlwa lentswe la ka a le sehalalelong sa hae, mme mohoweletso wa ka wa finyella ditsebeng tsa hae.

₈Teng, lefatshe la reketla, la thothomela; metheo ya mahodimo ya keqa, ya sisinyeha, kahobane a ne a halefile. ₉Ha nyoloha mosi dinkong tsa hae, le mollo o timeletsang molomong wa hae; a phutsa mashala a hlenneng. ₁₀A namisa lehodimo, a theoha; lefifi le letenya le ne le le tlasa maoto a hae.

₁₁A kalla kerubime, a fofa; a bonwa a fofa ka dipheo tsa moya; ₁₂a ikgurumetsa ka lefifi, a ikopa ka maqhubu a metsi le ka maru a matsho. ₁₃Kganyeng e mo eteletseng pele ha tswa mashala a hlenneng.

₁₄Jehova a duma lehodimong, Mookamedi ya phahameng a utlwahatsa lentswe la hae. ₁₅A betsa metsu ya hae, mme a ba qhalanya ka yona; a romela mahadima, a ba qhemetsa ka wona. ₁₆Mangope a lewatle a hlaha; ha bonahala le metheo ya lefatshe ka baka la kgalemelo ya Jehova, le pudulo ya moya o tswang dinkong tsa hae.

₁₇A nanabetsa letsoho a le phahameng, a ntshwara, a nkgula metsing a maholo; ₁₈a nnamolela ho sera sa ka se matla, le ho ba ntlhoileng ba mphetang ka matla. ₁₉Ba ne ba mpatetse mohla ke leng tsietsing, Jehova ya mpa ya eba seikokotlelo sa ka. ₂₀A nntshetsa sebakeng, a mpholosa, kahobane a ne a nthata.

₂₁Jehova o nkentse ka ho loka ha ka, o mpuseditse ka ho hlweka ha matsoho a ka. ₂₂Hobane ke bolokile ditsela tsa Jehova; ha ke a ka ka kwenehela Modimo wa ka ka bolotsana; ₂₃dikahlolo tsohle tsa hae tsa nna tsa eba pela ka; le melao ya hae ha ke a ka ka e furalla. ₂₄Ke hlokile ho nyatseha pela hae, mme ke ipolokile ke se ke ka etsa bokgopo. ₂₅Ka baka leo, Jehova o mputsitse ka ho loka ha ka le ka ho hlweka ha ka pela mahlo a hae.

₂₆Ya molemo o mo etsa ka molemo; monna ya lokileng o mo etsa ka ho loka; ₂₇ya hlwekileng o mo etsa ka ho hlweka ha hae; ya kgopo o mo etsa ka bokgopo ba hae. ₂₈Setjhaba se ikokobetsang o a se pholosa; empa mahlo a hao a tjametse baikgohomosi hore o ba kokobetse.

₂₉Efela ke wena lebone la ka, Jehova: Jehova o edisa lefifi la ka. ₃₀Ka wena, nka itihela hodima lekgotla la dira; ka Modimo wa ka, nka tlola lerako. ₃₁Modimo, tsela ya wona e lokile; lentswe la Jehova le a tshepeha; ke thebe ho bohle ba itshepetseng yena.

₃₂Ke mang e leng Modimo, haese Jehova? Lefika ke mang haese Modimo wa rona? ₃₃Modimo ke qhobosheane ya ka e matla; ke wona o ntsamaisang ka tsela e lokileng. ₃₄O entse maoto a ka jwaloka a kgama e tshehadi, o mpea diphahameng tsa ka.

₃₅O ruta matsoho a ka ntwa, mme matsoho a ka a tjheba seqha sa koporo. ₃₆O nneile thebe ya poloko ya hao, lereko la hao le nkgodisitse. ₃₇O neile mehato ya ka sebaka; maoto a ka ha a thelle.

₃₈Ke lelekisitse dira tsa ka, ke di timeditse; ha ke a ka ka kgutla, ke eso ho di qete. ₃₉Ka di bolaya, ka di katakela; tsa sitwa ho tsoha, tsa wa katlasa maoto a ka. ₄₀O ntlamile ka matla ke tle ke lwane; ba ntsohetseng matla, wa nkokobeletsa bona. ₄₁Wa ntadimisa mekokotlo ya dira tsa ka, mme ka fedisa ba ntlhoileng. ₄₂Ba tadima, empa ho se ya ba namolelang; ba howeletsa ho Jehova, a mpa a se ke a ba arabela. ₄₃Moo, ka ba silakanya jwaloka lerole la lefatshe; ka ba hatakela, ka ba fiela jwaloka diretse tsa tsela.

₄₄O nnamoletse le mohla diphapang tsa setjhaba sa ka. O mpolokile hore ke be hlooho ya ditjhaba. Setjhaba seo ke neng ke sa se tsebe, se a ntshebeletsa. ₄₅Baditjhaba ba nqeka; ha ba utlwa taelo ya ka, ba nkutlwa hanghang. ₄₆Baditjhaba ba tepeletse, ba tswa diqhobosheaneng tsa bona ba thothomela.

₄₇Jehova a phele! Ho roriswe lefika la ka! Ho hodiswe Modimo, lefika la poloko ya ka! ₄₈Ke wona Modimo o mpheteletsang, o kokobetsang ditjhaba pela ka; ₄₉o nnamolelang direng tsa ka. O mphahamisitse hodima ba ntwantshang. O mphonyohisitse ho monna ya bohale. ₅₀Ka baka leo, ke tla o roka ditjhabeng, Jehova, ke rorise kganya ya lebitso la hao. ₅₁O sitsa morena wa hae ka poloko e kgolo, o etsa mohau ho motlotsuwa wa hae, ho Davida, le ho moloko wa hae, ka ho sa feleng.