II MARENA 25

₁Ka selemo sa boroba mono o le mong sa ho busa ha hae, ka kgwedi ya leshome, ka la leshome la kgwedi, Nebukadnesare, morena wa Babilona, a futuhela Jerusalema ka makgotla a hae kaofela, a emisa pela teng. Ba haha diqhobosheane ka nqa tsohle ho wona. ₂Ha lwantshwa motse, ha ba ha thwasa selemo sa leshome le motso o mong sa ho busa ha Tsedekia.

₃Ka la boroba mono o le mong la kgwedi ya bone, tlala e ne e le kgolo motseng, ho se ho se bohobe bo saletseng setjhaba sa teng. ₄Ha ho se ho phuntswe lerako, banna bohle ba ntwa ba baleha bosiu ka tsela e yang le kgoro, mahareng a marako a mabedi a pela tshimo ya morena, Bakalde ba ntse ba teetse motse hare. Ha tsamauwa ka tsela e yang le lehwatata. ₅Empa makgotla a Bakalde a phallela morena, a mo tshwara lehwatateng la Jeriko; mme makgotla a hae kaofela a mo qhalanela. ₆Ba tshwara morena, ba mo tlisa ho morena wa Babilona, Ribla, mme a ahlolwa teng. ₇Bara ba Tsedekia ba bolawa pela mahlo a hae; Tsedekia a ntoo phunngwa mahlo, a tlangwa ka mahlaahlela a koporo, mme a iswa Babilona.

₈Ka kgwedi ya bohlano, ka tsatsi la bosupa la kgwedi ya selemo sa leshome le metso e robileng mono o le mong sa ho busa ha Nebukadnesare, morena wa Babilona, Nebusaradane, molaodi wa bahlabani ba morena le mohlanka wa morena wa Babilona, a kena Jerusalema. ₉A tjhesa ntlo ya Jehova, le ntlo ya morena, le matlo wohle a Jerusalema; a tjhesa le matlo wohle a maholo. ₁₀Le marako a Jerusalema a teelang motse hare a qhaqhwa ke makgotla wohle a Bakalde, a leng ho molaodi wa bahlabani ba morena.

₁₁Haele ba setseng ba setjhaba ba neng ba tlohetswe motseng, le ba thobileng, ba ineetseng morena wa Babilona, le ba setseng ba bangata, Nebusaradane, molaodi wa bahlabani ba morena, a ba isa kgolehong. ₁₂Leha ho le jwalo, molaodi wa bahlabani ba morena a siya mafutsana a lefatshe, hore a leme masimo a merara le masimo a mang.

₁₃Haele ditshiya tsa koporo tse ka tlung ya Jehova, le didulwana, le letsha la koporo le ka tlung ya Jehova, Bakalde ba di robaka dikoto, ba isa koporo ya tsona Babilona. ₁₄Le dipitsa, le tse olang molora, le matlao le dikgaba, le mesebetsi yohle ya koporo eo ho neng ho sebeletswa Jehova ka yona, ba ya le yona. ₁₅Le dipane, le dipitsana, hohle hoo e leng kgauta e hlwekileng le silefera e hlwekileng, tsa nkwa ke molaodi wa bahlabani ba morena. ₁₆Ke ditshiya tse pedi, le letsha, le didulwana tseo Salomone a neng a di etseditse ntlo ya Jehova; koporo ya mesebetsi eo yohle e be e se na ho lekanngwa ka baka la boima ba yona. ₁₇Bolelele ba tshiya e nngwe e ne e le ditswe tse leshome le metso e robileng meno e le mmedi; hlooho ya yona e ne e le ya koporo; bolelele ba hlooho e ne e le ditswe tse tharo; le dikgabiso tse kang meqhaka, le digaranata tse rwesang hlooho, kaofela ha tsona e ne e le tsa koporo. Le tshiya ya bobedi e be e na le dikgabiso tse kang meqhaka, jwaloka e nngwe.

₁₈Molaodi wa bahlabani ba morena a tshwara le Seraia, moprista e moholo, le Sofonia, moprista ya mo hlahlamang, le balebedi ba bararo ba monyako. ₁₉Hape motseng a tshwara tona e nngwe, mohlahlobi wa banna ba ntwa, le banna ba bahlano bao e neng e le baeletsi ba morena ba fumanweng motseng; le mongodi wa molaodi wa makgotla, momemi wa makgotla a setjhaba sa lefatshe la Juda, le banna ba mashome a tsheletseng ba setjhaba sa lefatshe ba fumanweng motseng. ₂₀Nebusaradane, molaodi wa bahlabani ba morena, a ba tshwara, a ya le bona ho morena wa Babilona, Ribla. ₂₁Morena wa Babilona a ba bolaya, a ba timetsa Ribla, naheng ya Hamathe.

Bajuda ba tloswa jwalo lefatsheng la bona, ba iswa kgolehong.

₂₂Haele setjhaba se kileng sa sala fatsheng la Juda, se tlohetsweng ke Nebukadnesare, morena wa Babilona, a bea Gedalia, mora Akikame, mora Shafane, hore e be mmusisi wa sona.

₂₃Balaodi ba makgotla le batho ba bona, ha ba utlwa hore morena wa Babilona o beile Gedalia mmusisi, ba tla ho Gedalia Mitspe; ke Ishmaele, mora Nethania, le Johanane, mora Karea, le Seraia, mora Thanhumethe wa Nethofa, le Jaasania, mora motho wa Maaka, ba ena le batho ba bona. ₂₄Yena Gedalia a ba hlapanyetsa, bona le batho ba bona, a re ho bona: Le se ke la tshaba bahlanka ba Bakalde; ahang fatsheng lena, le sebeletse morena wa Babilona, mme le tla iketla. ₂₅Leha ho le jwalo, ka kgwedi ya bosupa, Ishmaele, mora Nethania, mora Elishama, wa mofuta wa borena, a tla le banna ba leshome, a bolaya Gedalia, a shwa; a bolaya le Bajuda le Bakalde ba nang le yena Mitspe. ₂₆Ebile setjhaba sohle, ba banyenyane le ba baholo, le balaodi ba makgotla, ba tloha, ba ya Egepeta, kahobane ba ne ba tshaba Bakalde.

₂₇Ka selemo sa mashome a mararo a metso e supileng sa ho holehuwa ha Jojakine, morena wa Juda, ka kgwedi ya leshome le metso e mmedi, ka letsatsi la mashome a mabedi a metso e supileng la kgwedi, Evile-Merodake, morena wa Babilona, a ntsha Jojakine, morena wa Juda, teronkong, e le ka selemo seo a qalang ho busa ka sona. ₂₈A bua hantle le yena, a phahamisa terone ya hae ho feta diterone tsa marena a mang a leng ho yena Babilona. ₂₉Jojakine a lahla diaparo tsa hae tsa teronko, a nna a ja bohobe pela morena ka tshiu tsohle tsa ho phela ha hae. ₃₀Mme dijo tsa hae ya nna ya eba dijo tseo a di fuwang ke morena, tsa tsatsi le leng le le leng, tshiung tsohle tsa ho phela ha hae.