II DIKRONIKE 21

₁Josafate a orohela ho bontatae, mme a patwa ho bontatae motseng wa Davida; mme Jorame, mora hae, ya eba morena tulong tsa hae.

₂Jorame o ne a na le banababo, bara ba Josafate: boAsaria, le Jehiele, le Sakaria, le Asaria, le Mikaele, le Shefathia; kaofela ha bona e ne e le bara ba Josafate, morena wa Iseraele. ₃Ntata bona o ne a ba neile dimpho tse ngata tsa silefera le kgauta, le dintho tsa bohlokwa, hammoho le metse ya diqhobosheane naheng ya Juda; mmuso wona o ne a o neile Jorame, kahobane e ne e le yena wa letsibolo. ₄Empa eitse hobane Jorame a nke mmuso wa ntatae, ha a se a iphile matla, a bolaya banababo bohle ka lerumo le dihlooho tse ding tsa Iseraele.

₅Jorame o ne a le dilemo tse mashome a mararo a metso e mmedi ha a qala ho busa, mme a busa ka dilemo tse robileng meno e le mmedi a le Jerusalema.

₆A nna a tsamaya ka mehlala ya marena a Iseraele, jwalokaha ho ne ho tsamaile ntlo ya Akabe, hobane a ne a nyetse moradi wa Akabe; a etsa ho leng hobe pela mahlo a Jehova. ₇Leha ho le jwalo, Jehova ha a ka a rata ho timetsa ntlo ya Davida, ka baka la selekane seo a neng a se hlabile le Davida, le ka baka la seo a neng a se boletse, a re, o tla nne a mo nee, yena le bara ba hae, lebone ka ho sa feleng.

₈Mehleng ya hae, Baedomo ba fetohela mmuso wa Juda, mme ba ipehela morena. ₉Jorame a fetela teng a ena le mahosana a hae le makoloi a hae kaofela; a tsoha e sa le bosiu, mme a qhala Baedomo ba mo teetseng hare le balaodi ba makoloi. ₁₀Leha ho le jwalo, Baedomo ba fetohela Juda ho fihlela tsatsi lena. Mehleng yona eo, mose wa Libna le wona wa mo fetohela, kahobane ba ne ba furaletse Jehova, Modimo wa bontata bona.

₁₁Hape, Jorame a etsa dinqalo tse diphahameng dithabeng tsa Juda; a susumetsa baahi ba Jerusalema hore ba etse bohlola, mme a kgelosa Bajuda. ₁₂Yaba o fihlelwa ke lengolo la Elia moporofeta, le reng: Ho itswe ke Jehova, Modimo wa Davida ntatao: Erekaha o sa ka wa tsamaya ka mehlala ya Josafate ntatao, le ka mehlala ya Asa, morena wa Juda, ₁₃o mpile wa tsamaya ka mehlala ya marena a Iseraele, mme wa kgannela Juda le baahi ba Jerusalema bohloleng, jwalokaha ntlo ya Akabe e ntse e kgannela Baiseraele bohloleng bo jwalo, o bile wa bolaya le banabeno, ba ntlo ya ntatao, ba neng ba o feta ka molemo; ₁₄bona, Jehova o se a ya otla setjhaba sa hao, le bara ba hao, le basadi ba hao, le dintho tsohle tsa hao ka kotsi e kgolo; ₁₅haele wena, o tla ba malwetseng a maholo ka ho jewa ke mala ka matsatsi le matsatsi, ho fihlela mala a hao a ba a tswela ntle ke ho befa ha bohloko.

₁₆Yaba Jehova o tsosetsa Jorame pelo tsa Bafilesta le tsa Baarabe ba ahileng pela Baethiopia. ₁₇Ba futuhela Bajuda, ba pholletsa ka naha ya bona, mme ba hapa matlotlo wohle ao ba a fumaneng tlung ya morena, le bara ba hae, le basadi ba hae; ha a ka a sallwa ke bara, haese ke Joakase, e monyenyane ho bara ba hae. ₁₈Kamora tseo kaofela, Jehova a mo otla maleng ka lefu le se nang ho phekolwa. ₁₉Eitse kamora tshiu tse itseng, mohla lemo sa bobedi se leng lekgatheng la ho fela, mala a hae a tswa ke ho befa ha bohloko, mme a shwa ka bohloko bo tshabehang; setjhaba sa hae ha se a ka sa mo tjhesetsa dibano, jwalokaha se ne se tjheseditse bontatae.

₂₀O ne a le dilemo tse mashome a meraro a metso e mmedi ha a qala ho busa, mme a busa ka dilemo tse robileng meno e le mmedi a le Jerusalema. A ikela a sa llelwe ke motho, mme a patwa motseng wa Davida, empa e seng mabitleng a marena.