1Eitse hobane borena ba Roboame bo tiiswe, le yena ha a iphile matla, a furalla molao wa Jehova, le Baiseraele bohle ba etsa jwalo le bona.
2Ka selemo sa bohlano sa ho busa ha Roboame, Shishake, morena wa Egepeta, a futuhela Jerusalema, kahobane Bajuda ba ne ba sitetswe Jehova; 3a tla, a ena le makoloi a sekete se nang le makgolo a mabedi le bapalami ba dikete tse mashome a tsheletseng, a ena le batho ba fetang palo, Balibia le Basukke le Baethiopia; 4a kena metse ya diqhobosheane ya Juda, a tla fihla le Jerusalema.
5Yaba moporofeta Shemaia o ya ho Roboame le ho dihlooho tsa Juda tse neng di bokanetse Jerusalema ka baka la ntwa ya Shishake, a re ho bona: Jehova o re: Le mphuraletse, le nna ke le furaletse, ke bile ke le neetse matsohong a Shishake. 6Empa dihlooho tsa Iseraele le morena ba ikokobetsa, ba re: Jehova o lokile. 7Eitse ha Jehova a bona hobane ba ikokobeditse, lentswe la Jehova la tlela Shemaia, la re: Ba ikokobeditse, nke ke ka ba timetsa; ke se ke tla etsa hore ba phonyohe, mme kgalefo ya ka ha e ka ke ya tshollelwa hodima Jerusalema ka Shishake; 8leha ho le jwalo, e tla ba bafo ba hae, ba tle ba tsebe ho kgetha tshebeletso ya ka ho tshebeletso ya mebuso ya mafatshe a mang.
9Shishake, morena wa Egepeta, a futuhela Jerusalema; a nka matlotlo a ntlo ya Jehova le matlotlo a ka tlung ya morena; a nka ntho tsohle. Hape, a ya le dithebe tsa kgauta tse entsweng ke Salomone. 10Bakeng sa tsona, morena Roboame a etsa dithebe tsa koporo, a di bea matsohong a balaodi ba dititimi tse neng di lebela monyako wa ntlo ya morena. 11Enereha morena a eya tlung ya Jehova, dititimi di ne di tsamaya di di tshwere, di ntoo di kgutlisetsa kamoreng ya dititimi.
12Eitse ha Roboame a ikokobetsa, kgalefo ya Jehova ya mo kgutlela, a se ke a mo timelletsa ruri; hape, taba tse ding tsa Bajuda di ne di le molemo.
13Morena Roboame a ipha matla Jerusalema, a nna a busa; o ne a le dilemo tse mashome a mane a motso o mong, ha a qala ho busa, a busa ka dilemo tse leshome le metso e supileng Jerusalema, e leng motse oo Jehova a neng a o kgethile hara meloko yohle ya Iseraele, ho bea lebitso la hae ho wona. Lebitso la mmae e ne e le Naama, Moammone. 14A mpa a nna a etsa ho leng hobe, a se ke a sekamisetsa pelo ya hae ho batla Jehova.
15Haele ditaba tsa Roboame, tsa ho qala le tsa ho qetella, ha ke re, di ngodilwe dibukeng tsa Shemaia moporofeta le tsa Iddo seboni, dibukeng tsa meloko?
Ntwa ya nna ya eba teng mahareng a Roboame le Jeroboame tshiung tsohle tsa bona.
16Roboame a orohela ho bontatae, a patwa motseng wa Davida; mme Abija, mora hae, ya eba morena tulong tsa hae.
