Davida o tsebiswa bora ba ntatae ke Jonathane. — Ba kgaohana.
1Ebile Davida o baleha Najothe o pela Rama, a tla a re ho Jonathane: Ke entseng? Sebe sa ka ke sefe? Ke sitetswe ntatao kang, ha a pheheletse hakalo ho mpolaya na? 2Jonathane a re ho yena: Tjhe, ha o ka ke wa shwa le ho leka; bona, ntate a ke ke a etsa letho le leholo, kapa le lenyenyane, a sa ntsebise; ntate a ka mpatela taba e kalo jwang? Tjhe, ha ho jwalo. 3Davida a hlapanya, a eketsa a re: Ntatao o tsebisisa ruri hobane ke bone mohau ho wena; ke moo a itseng: Jonathane a se ke a tseba, esere mohlomong a hlomoha; empa kannete, ka Jehova ya utlwang le ka moya wa hao o utlwang, ke sebakanyana se kang sa ho hata hang feela mahareng a ka le lefu.
4Ebile Jonathane o re ho Davida: Mpolelle se lakatswang ke pelo ya hao, mme ke tla o etsetsa sona. 5Davida a re ho Jonathane: Bona, kgwedi e tla thwasa hosasane; ke ha ke tshwanetse ho dula dijong le morena; o ntumelle, ke ye, ke ipate naheng, ho isa mantsiboya a la boraro. 6Ha ntatao a ntlhoka, e re: Davida o nkopile haholo, hore a titimele Bethlehema, motseng wa habo, hobane ke nako ya sehlabelo sa lemo se seng le se seng, se hlabelwang moloko wa habo kaofela. 7Ha a ka re: Ke teng, e tla ba kgotso ho mohlanka wa hao; ha a halefa haholo, o tsebe hobane o hopotse bobe. 8O etsetse mohlanka wa hao molemo oo, etswe o entse selekane le mohlanka wa hao pela Jehova. Leha ho le jwalo, ha sebe se le teng ho nna, o mpolaye e le wena; hobane ke ha o ka nkisetsang ho ntatao? 9Jonathane a re: Tjhe, ho ke ke ha eba jwalo. Leha nka tsebisisa bobe bo hopoletsweng wena ke ntate, ha ke re, ke ne ke tla o tsebisa na? 10Davida a re ho Jonathane: Ke mang ya tla ntsebisa, ha ntatao a ka o fetola ka thata na? 11Jonathane a re ho Davida: Tloo, re tswele naheng. Ba tswela naheng ba babedi.
12Jonathane a re ho Davida: Ka Jehova, Modimo wa Iseraele, ha ke se ke botsisisitse ntate ka mohlomong hosasane, kapa kamoso, ha nka bona hobane o sa thabetse Davida, ha ke sa o romele, ke sa o tsebise, 13Jehova a etse Jonathane ka hore le ka hore; ha ntate a fela a hopotse ho o etsa hampe, ke tla o tsebisa, ke o tlohele, o tle o ikele ka kgotso. Jehova yena o tla ba le wena, jwalokaha a bile le ntate. 14Ha ho ka ba jwalo, o se ke wa lesa ho nketsa ka molemo wa Jehova, leha ke sa ntsane ke phela, ke tle ke se ke ka shwa; 15hape o se ke wa tima ntlo ya ka molemo wa hao le ka mohla o le mong, leha e le mohla Jehova a timeditseng e mong le e mong wa dira tsa Davida lefatsheng. 16Yaba Jonathane o hlaba selekane le ntlo ya Davida, a re: Jehova a pheteletse Davida ho dira tsa hae.
17Jonathane a ntoo eketsa a hlapantsha Davida, ka baka la ho mo rata; o ne a mo rata jwalokaha a ithata.
18Jonathane a re ho yena: Hosasane, kgwedi e tla thwasa; o tla batlwa, ha ho bonwa setulo sa hao se le feela. 19Ha ho le jwalo, o lebelle la boraro, o theohe kapele, o tle moo o kileng wa ipata, mohla taba ya pele, o eme pela lefika le Esele. 20Nna, ke tla fulela metsu e meraro nqa teng, jwaloka hoja ke fula ntho eo ke e bonang; 21ke ntoo roma mohlahlankana, ke re: O batle metsu. Ha nka re ho mohlankana: Bona, metsu e ka kwano, e nke hle, etlaba o ka tla, hobane ke kgotso ho wena; ka Jehova ya utlwang, ha ho tsietsi. 22Ha nka re ho mohlankana: Bona, metsu e ka nqane ho wena, teng o ka ikela; etlaba Jehova o re o tlohe. 23Haele taba eo re e buileng nna le wena, bona, Jehova o tla nne a be mahareng a ka le wena ka ho sa feleng.
24Ebile Davida o ipata naheng. Kgwedi ha e thwasitse, morena a dula dijong, a ja. 25Morena o ne a dutse setulong sa hae sa mehla, e leng setulo se pela lebota, Jonathane yena a eme, Abnere a dutse mabapa le Saule; setulo sa Davida sona se ne se le feela. 26Saule a se ke a bua letho tsatsing leo, a re: Ekaba o hlahetswe ke taba, ha a hlweka; ruri ha a hlweka. 27Hosasane, ka la bobedi la kgwedi, setulo sa Davida sa eba feela. Yaba Saule o re ho Jonathane, mora hae: Ana mora Jese ha a ka a tla keng dijong maobane, leha e le kajeno na? 28Jonathane a arabela Saule, a re: Davida o qetse ho nna ka matla ho ya Bethlehema; 29a re: Ntumelle hle, hobane baheso ba na le sehlabelo hae; ngwaneso o ntaeditse; ha ekaba ke bone mohau ho wena, o ntumelle, ke tle ke etele banabeso; ke ka baka leo a sa kang a tla tafoleng ya morena. 30Ebile Saule o halefela Jonathane, a re ho yena: Ngwana ya lonya, ya ikgantshang, ha ke re, ke a tseba hobane o ikgethetse mora Jese hore ka yena o hlabiswe dihlong le bona bofeela ba mmao na? 31Hobane, mora Jese ha a ntse a phela lefatsheng, ho ke ke ha tiya wena, leha e le borena ba hao. Romela jwale ho ya ntshwarela yena; hobane o lokelwa ke ho shwa. 32Jonathane a fetola Saule, ntatae, a re ho yena: O tla bolaelwang? o entseng na? 33Ebile Saule o mmetsa ka lerumo ho mo hlaba. Jonathane a tseba kahoo hobane ntatae o rerile ruri ho bolaya Davida. 34Yaba Jonathane o tloha tafoleng a halefile haholo, a sa ka a ja letho ka lona la bobedi la kgwedi, kahobane a hlomohetse Davida, hape a nyatsitswe ke ntatae.
35Hosasane, Jonathane a tswela naheng, ka nako e behetsweng Davida, a ya le mohlankana. 36A ya, a re ho mohlankana wa hae: Matha, o bone metsu eo ke tla e fula. Mohlankana a matha, mme Jonathane a fulela motsu ka nqane ho yena. 37Mohlankana ha a fihla motsung o futsweng ke Jonathane, Jonathane a hoeletsa mohlankana, a re: Na motsu ha o a wela ka nqane ho wena na? 38Jonathane a boela a howeletsa mohlankana, a re: Itlhahanele, o akofe, o se ke wa ema. Yaba mohlankana wa Jonathane o thola metsu, mme a e tlisa ho monga hae. 39Empa mohlankana o ne a sa tsebe letho; e ne e le Jonathane le Davida feela ba tsebang se etswang. 40Jwale, Jonathane a nea mohlankana wa hae dibetsa tsa hae, a re ho yena: Tsamaya, o di ise hae.
41Eitse hobane mohlankana a tsamaye, Davida a hlaha nqa borwa, a itihela fatshe ka sefahleho, a inama hararo, mme ba akana, ba lla haholo; haholo ha lla Davida. 42Jonathane a re ho Davida: eya ka kgotso; re hlapantse ba babedi ka lebitso la Jehova hore Jehova o tla ba mahareng a ka le wena, le mahareng a bana ba ka le bana ba hao ka ho sa feleng.
43Yaba Davida o tloha, a ikela; Jonathane yena a ya hae.
