I MARENA 2

₁Nako ya ho falla ha Davida ha e se e atametse, a laela mora hae Salomone, a re:

₂Ke ya ka tsela ya batho bohle; o iphe matla, o etse ka senna. ₃O boloke taelo ya Jehova, Modimo wa hao, ka ho tsamaya tseleng tsa hae, o ye le ka melao ya hae, le ditaelo tsa hae, le mantswe a hae, le ditemoso tsa hae, kamoo di ngodilweng kateng, molaong wa Moshe, e be hore o tle o atlehe ditabeng tsohle tseo o tla di etsa, le hohle moo o tla leba teng. ₄Etlaba moo Jehova a tiisang taba ya hae eo a mpoleletseng yona, ha a re: Ekare ha bana ba hao ba itebela metsamaong ya bona, ba tsamaya pela ka ka mokgwa wa nnete, ka pelo yohle, le ka moya wohle, ha ho ka ke ha hlokeha motho wa lesika la hao teroneng ya Iseraele.

₅Hape, o tseba seo Joabe, mora Tseruja, a nkentseng sona, e leng seo a se entseng balaodi ba babedi ba makgotla a Iseraele, Abnere mora Nere, le Amasa mora Jethere, kamoo a ba bolaileng kateng, a tsholla kgotsong madi a ka tshollwang ntweng, a qaphaletsa senyepa sa hae se thekeng la hae, le dieta tsa hae tse maotong a hae ka madi a ka tshollwang ntweng. ₆O etse ka bohlale ba hao, o se ke wa lesela moriri wa hae o moputswa ho theohela lebitleng ka kgotso.

₇Haele bana ba Barsillai wa Gileade, o ba etsetse ka lereko, ba dule le ba jang tafoleng ya hao; hobane ba tlile ho nna ka lereko, mohla ke balehelang ngwaneno Absalome.

₈Hape, o na le Shimei, mora Gera, Mobenjamine wa Bahurime; ke yena ya kileng a nthohaka ka hlapa e bohloko, mohla ke yang Mahanaime. Empa eitse ha ke kgutla, a theoha ho nkgahlanyetsa Jordane; teng, ka mo hlapanyetsa ka Jehova, ka re: Nke ke ka o bolaya ka lerumo. ₉Mme jwale, o se ke wa mo etsa ya se nang molato, hobane o motho ya masene, mme o ka tseba seo o ka mo etsang sona, hore o theosetse lebitleng moriri wa hae o moputswa o le madi.

₁₀Ebile Davida o orohela ho bontatae, a patwa motseng wa Davida. ₁₁Tshiu tseo Davida a kileng a busa Iseraele e bile dilemo tse mashome a mane; a busa Hebrone ka dilemo tse supileng, mme a busa Jerusalema ka dilemo tse mashome a mararo a metso e meraro. ₁₂Yaba Salomone o dula teroneng ya ntatae Davida, mme mmuso wa hae wa tiya haholoholo.

₁₃Mohlang oo, Adonija, mora Haggithe, a tla ho Bathe-Sheba, mmae a Salomone. Yena a mmotsa, a re: Na o tlile ka kgotso na? A araba, a re: E, ke tlile ka kgotso. ₁₄A eketsa a re: Ke tlile ho wena ka taba. Bathe-Sheba a re: Bua. ₁₅Adonija a re: O a tseba hoba mmuso e be e le wa ka, le hobane Baiseraele bohle ba ne ba ntadimile hore ke buse; empa mmuso o fetohile, o abetswe ngwaneso, kahobane e bile wa hae ka taelo ya Jehova. ₁₆Jale, ke tla qela ntho e le nngwe ho wena; o se ke wa nkganela le yona. Bathe-Sheba a re ho yena: E bolele. ₁₇Adonija a re: Ere ho morena Salomone, ya sa keng a o hanela le letho, o re, a nnee Abishage wa Shuneme e be mosadi wa ka. ₁₈Bathe-Sheba a re: Ke hantle, ke tla o buella ho morena.

₁₉Jwale, Bathe-Sheba a ya ho morena Salomone, ho buella Adonija; morena a ema, a mo kgahlanyetsa, a inama pela hae, a ntoo dula teroneng ya hae, a beela mma morena setulo, a re, a dule letsohong la hae le letona. ₂₀Bathe-Sheba a re: Ke qela nthwana e seng ekae ho wena; o se ke wa nkganela le yona. Morena a mo araba, a re: Mme, qela, hobane nke ke ka o latolela. ₂₁A re: Ngwaneno Adonija a ke a newe Abishage wa Shuneme, e be mosadi wa hae. ₂₂Morena Salomone a araba mmae, a re: O qellelang Adonija Abishage wa Shuneme? Ha o mo qelle mmuso keng, hobane ke moholwane wa ka? O qelle yena le moprista Abiathare, le Joabe mora Tseruja!

₂₃Yaba morena Salomone o hlapanya ka Jehova, a re: Modimo o nketse ka hore le ka hore, ha Adonija a sa lefe ka bophelo ba hae taba eo a e boletseng. ₂₄Ke se ke re: Ka Jehova ya utlwang, ya ntiisitseng, ya ntudisitseng teroneng ya ntate Davida, ya nkgahetseng ntlo, kamoo a neng a boletse kateng, ruri Adonija, o tla bolawa kajeno. ₂₅Yaba morena Salomone o roma Benaia, mora Jehojada; eo a mmolaya, mme a shwa.

₂₆Yaba morena o tsebisa moprista Abiathare, a re: Ikele Anathothe, masimong a hao, hobane o lokelwa ke ho shwa; empa kajeno, nke ke ka o bolaya, kahobane o kile wa jara areka ya Morena Jehova pela ntate Davida, le hobane o kile wa tubeha kahohle kamoo le ntate a ileng a tubeha kateng. ₂₇Salomone a leleka Abiathare jwalo, hore e se hlole e eba moprista wa Jehova; ya eba moo ho phethahalang taba eo Jehova a neng a e boletse bakeng sa ntlo ya Eli, Silo.

₂₈Yaba Joabe o utlwa taba tseo, hobane Joabe o ne a latetse Adonija, leha a ne a sa ka a latela Absalome; Joabe a tshabela tenteng ya Jehova, a tshwara dinaka tsa aletare. ₂₉Morena Salomone a tsebiswa, ha thwe: Joabe o tshabetse tenteng ya Jehova; ke eo, o aletareng. Salomone a roma Benaia mora Jehojada, a re ho yena: ₃₀Eya, o mmolaye. Benaia a kena tabernakeleng ya Jehova, a re ho Joabe: Ho itswe ke morena: O tswele ntle. Joabe a re: Tjhe, ke tla mpe ke shwele mona. Benaia a ya tsebisa morena, a re: Joabe o buile jwalo, o arabile ka hore le ka hore. ₃₁Morena a re ho yena: Etsa kamoo a boletseng kateng, o mmolaye, o mo epele; etlaba o tlositse ho nna le tlung ya ntate madi a se nang molato a tsholotsweng ke Joabe. ₃₂Jehova o tla busetsa madi a Joabe hloohong ya hae, hobane o bolaile batho ba babedi ba mo fetang ka ho loka le ka molemo, ntate Davida a sa tsebe; o ba bolaile ka lerumo; ke Abnere, mora Nere, molaodi wa makgotla a Iseraele, le Amasa, mora Jethere, molaodi wa makgotla a Juda. ₃₃Madi a bona a tla busetswa hloohong ya Joabe, le hloohong tsa ditloholo tsa hae kamehla; empa kgotso e tswang ho Jehova, e tla nne e be teng ho Davida, le ho ditloholo tsa hae, le tlung ya hae, le teroneng ya hae. ₃₄Yaba Benaia, mora Jehojada, o ya, a hlaba Joabe, a mmolaya, mme a patwa ka tlung ya hae e feelleng. ₃₅Morena a bea Benaia, mora Jehojada, molaodi wa makgotla tulong tsa hae; morena a bea le moprista Tsadoke tulong tsa Abiathare.

₃₆Jwale, morena a romela ho bitsa Shimei, a re ho yena: Ikgahele ntlo Jerusalema, o dule teng; o se ke wa tloha teng ho ya mane le mane; ₃₇hobane mohla o tlohang, o tshela molapo wa Kedrone, o tle o tsebe hobane o tla shwela ruri; mme madi a hao a tla ba hloohong ya hao. ₃₈Shimei a re ho morena: O boletse hantle; mohlanka wa hao o tla etsa kamoo morena, monga ka, a boletseng kateng. Mme Shemei a dula matsatsi a mangata Jerusalema.

₃₉Eitse hobane ho fete dilemo tse tharo, bahlanka ba babedi ba Shimei ba balehela ho Akishe, mora Maaka, morena wa Gathe. Shimei a tsebiswa, ha thwe: Bahlanka ba hao ke bane, Gathe. ₄₀Kahoo Shimei a ema, a qhaneha esele ya hae, a ya Gathe, ho Akishe, ho lata bahlanka ba hae; Shimei a ya jwalo, a ba a kgutlisa bahlanka ba hae Gathe. ₄₁Yaba Salomone o tsebiswa, ha thwe: Shimei o tlohile Jerusalema, o ile Gathe, o bile o boile. ₄₂Morena a romela ho bitsa Shimei, a mmotsa, a re: Na ha ke a ka ka o antsha ka Jehova, ka tiisa, ka re: Tsatsing leo o tlohang ka lona ho ya kae le kae, o tle o tsebe hobane o tla shwela ruri; mme wa mpolella, wa re, taba eo o e utlwileng e ntle, na? ₄₃Ha o a ka wa boloka kano ya Jehova keng, le taelo eo nkileng ka o laela yona na? ₄₄Morena a eketsa a re ho Shimei: O tseba bolotsana bohle ba hao, le pelo ya hao e a bo tseba, boo o bo entseng ntate Davida; jwale, Jehova o busetsa bokgopo ba hao hloohong ya hao. ₄₅Morena Salomone yena o tla ba le lehlohonolo, le terone ya Davida e tla nne e tiye kamehla pela Jehova. ₄₆Yaba morena o laela Benaia, mora Jehojada; a ya, a bolaya Shimei, a shwa.

₄₇Mme mmuso wa tiya matsohong a Salomone.