I BAKORINTHE 14

₁Phehellang lerato. Leha ho le jwalo, le tjhesehelle dineo tsa Moya, haholo ya ho porofeta.

₂Efela haele ya buang ka puo, ha a bue le batho, o bua le Modimo feela, hobane ha ho ya mo utlwang, mme o bolela disatsejweng ka moya. ₃Empa haele ya porofetang, o beela batho tsa kgahiso, tsa kgothatso, le tsa matshediso. ₄Ya buang ka puo o ikgahisa a nnotshi, empa ya porofetang o hahisa kereke.

₅Ke rata ha le ka bua bohle ka dipuo, empa haholoholo ke rata ha le ka porofeta; hobane ya porofetang o fetisa ya buang ka dipuo, haese ha eo a ka fetola, kereke e tle e fumane kgahiso. ₆Mme jwale, banabeso, ha ke be nka tla ho lona ke bua ka dipuo, le ne le ka fihlela molemo ofe, ha ke sa bue le lona ka taba ya tshenolo, leha e le ka ya bohlale, leha e le ka ya boporofeta, leha e le ka ya thuto?

₇Ho dutse jwalo le dintho tse sa pheleng tse nang le medumo, leha e ka ba phala, kapa harepa; ha di ka lla molodi o le mong, ho ka tsejwa jwang ha ho letsitswe phala, kapa ha ho letsitswe harepa? ₈Mme ekare ha terompeta e ena le modumo o sa kgethweng, ke mang ya tla phallela ntweng? ₉Ha ho le jwalo, le lona, ekare ha le sa hlahise puong tsa lona taba e utlwahalang, ana batho ba tla tseba jwang se bolelwang? Ekaba ke ho ipuella sebakeng.

₁₀Ho thwe, medumo e sa tshwaneng e ntse e atile lefatsheng; empa medumong eo ha ho na o sa utlwahaleng. ₁₁Mme ekare ha ke sa tsebe hoba puo e reng, nka ba mobarebare ho ya buang, le ya buang e ka ba mobarebare ho nna. ₁₂Mme jwale lona, haele mona le tjhesehella dineo tsa Moya, batlang ho atelwa ke tse ka hahisang kereke.

₁₃Ka baka leo, ke re: Ya buang ka puo a rapele hore a tsebe ho fetola. ₁₄Hobane ekare ha ke rapela ka puo, moya wa ka o a rapela, empa kelello ya ka ha e sebetse letho. ₁₅Nka etsa jwang na? Ke tla rapela ka moya, mme le hona ke tla rapela ka kelello; ke tla bina ka moya, mme le hona ke tla bina ka kelello. ₁₆Ha ho se jwalo, ekare ha o leboha ka moya, ana ya dutseng setulong sa ya sa tsebeng a ka tiisa jwang teboho ya hao ka amen ya hae, haele mona a sa tsebe seo o se bolelang? ₁₇Efela wena o leboha hantle, empa e mong ha a hahiswe ke hona. ₁₈Ke boka Modimo wa ka, hobane ke bua ka dipuo ho fetisa lona bohle. ₁₉Empa kerekeng nka rata ho bolela mantswe a le mahlano feela ka kelello, ke tle ke rute ba bang le bona, ho fetisa mantswe a dikete tse leshome ka puo.

₂₀Banabeso, le se ke la ba bana hlalefong, le mpe le be bana lonyeng; mme haele hlalefong, le be banna. ₂₁Ho ngodilwe molaong, ho thwe: Ke tla bua le setjhaba sena ka batho ba puo esele le ka melomo ya basele; mme le teng ba ke ke ba nkutlwa, ho rialo Morena. ₂₂Ha ho le jwalo, dipuo ke pontsho, e seng ho badumedi, empa e le ho ba sa dumelang; athe baporofeta ke pontsho, e seng ho ba sa dumelang, empa e le ho badumedi. ₂₃Ekare ha kereke yohle e phuthehela nqalong e le nngwe, mme bohle ba bua ka dipuo, leha ho ka kena batho ba sa tsebeng, leha e le ba sa dumelang, na ba ke ke ba re, le a hlanya na? ₂₄Empa ekare ha bohle ba porofeta, leha ho ka kena motho ya sa dumelang, leha e le ya sa tsebeng, eba o kgodiswa ke bohle, mme o ahlolwa ke bohle. ₂₅Mme ka mokgwa o jwalo, makunutu a pelo ya hae a bonahatswa, mme o tla itihela fatshe ka sefahleho, a rapele Modimo, mme a bolele hore Modimo o hara lona ka sebele.

₂₆Ana ke re, ho be jwang, banabeso? Ke re: Kamehla yohle ha le phutheha, e mong le e mong ho lona o na le pesaleme, leha e le thuto, kapa puo, leha e le tshenolo, leha e le phetolo; tsohle di etsetswe kgahiso. ₂₇Mme ekare ha e mong a bua ka puo, ho etswe jwalo ke ba babedi, boholo e be ba bararo, mme ho etswe ka ho latelana; mme e mong a fetole. ₂₈Ekare ha mofetodi a le siyo, motho eo a ikgutsetse kerekeng, a ipuele a nnotshi, a bue le Modimo. ₂₉Ho bolele baporofeta ba babedi, leha e le ba bararo, mme ba bang ba ahlole se bolelwang. ₃₀Mme ekare ha e mong wa ba dutseng a newa tshenolo, ya emeng pele a kgutse. ₃₁Hobane le ka porofeta bohle ka ho latelana, hore bohle ba rutwe, mme bohle ba kgothatswe. ₃₂Meya ya baporofeta e buswa ke baporofeta. ₃₃Hobane Modimo hase Modimo wa moferefere, empa e le wa kgotso, jwalokaha ho bonwa dikerekeng tsohle tsa bahalaledi.

₃₄Basadi ba lona ba kgutse diphuthehong; hobane ha ba dumellwe ho bua; ba mpa ba tshwanetse ho mamela; jwalokaha le wona molao o bolela. ₃₅Mme ekare ha taba e le teng eo ba ratang ho e tseba, ba e botse banna ba bona hae; hobane ho hobe ha basadi ba bua kerekeng. ₃₆Ana lentswe la Modimo le tswile ho lona, kapa ke lona feela ba fihletsweng ke lona na?

₃₇Ekare ha motho a itekanya hoba ke moporofeta, kapa motho ya nang le moya, a ke a tsebe hoba ditaba tseo ke le ngollang tsona, ke melao ya Morena. ₃₈Mme ekare ha e mong a hana ho tseba, a ikganele ho tseba.

₃₉Ho feleng, banabeso, tjhesehellang ho porofeta, haholo, mme le se ke la thibela ha ho buwa ka dipuo. ₄₀Tsohle di etswe ka tshwanelo le ka molao.