I DIKRONIKE 23

₁Davida o ne a se a tsofetse, a hodile haholo; yaba o bea Salomone, mora wa hae, morena wa Iseraele.

₂A phutha balaodi bohle ba Iseraele, le baprista, le Balevi. ₃Balevi ba balwa ho tloha ho ba dilemo tse mashome a mararo le ba kapele; ha ba balwa ka dihlooho, ha fumanwa batho ba dikete tse mashome a mararo a metso e robileng meno e le mmedi. ₄A re: Ho bona, ho ke ho nkwe ba kete tse mashome a mabedi a metso e mene ba tla tsamaisa tshebetso ya ntlo ya Jehova; hape, ho nkwe ba kete tse tsheletseng ho ba etsa bahlahlobi le baahlodi; ₅balebedi ba menyako ba ke ba etse dikete tse nne, mme ba kete tse nne e be ba tla rorisa Jehova ka diletsa tseo ke di entseng hore a roriswe ka tsona.

₆Davida a ba arola dihlopha ka palo ya bara ba Levi, Gershone, Kehathe, le Merari.

₇Ho Bagershone, ya eba Laedane le Shimei. ₈Bara ba Laedane, e moholo ke Jehiele, ba bang ke Sethame le Joele; ba bararo. ₉Bara ba Shimei ke Shelomithe, Hasiele, le Harane; ba bararo. Ke tsona dihlooho tsa bontata Balaedane. ₁₀Bara ba Shimei ke Jahathe, Sina, Jeushe, le Beria. Bao ba bane ke bara ba Shimei. ₁₁Jahathe ke e moholo; wa bobedi ke Sina; haele Jeushe le Beria, ba ne ba se na bana ba bangata; ha ho le jwalo, palong ba etsa ntlo e le nngwe ya bontata Balevi.

₁₂Bara ba Kehathe ke Amrame, Jitsehare, Hebrone le Usiele; ba bane. ₁₃Bara ba Amrame ke Aarone le Moshe; Aarone yena a kgethwa, hore a tle a halaletswe ka ho sa feleng ka kgalalelo e fetisang, e le yena le bara ba hae, mme ba tjhese dibano pela Jehova, ba mo sebeletse, ba hlohonolofatse setjhaba ka lebitso la hae ka ho sa feleng. ₁₄Haele ka Moshe, monna wa Modimo, bara ba hae ba balwa le bara ba Levi. ₁₅Bara ba Moshe ke Gershome le Eliesere. ₁₆E moholo ho bara ba Gershome ke Shebuele. ₁₇Bara ba Eliesere, e moholo ke Rehabia. Eliesere o ne a se na bara ba bang; empa bara ba Rehabia ba ne ba le bangata. ₁₈Bara ba Jitsehare, e moholo ke Shelomithe. ₁₉Ho bara ba Hebrone, e moholo ke Jeria, wa bobedi ke Amaria, wa boraro ke Jahasiele, wa bone ke Jekameame. ₂₀Ho bara ba Usiele, e moholo ke Mika, wa bobedi ke Jishia.

₂₁Bana ba Merari ke Mahali le Mushi; bara ba Mahali ke Eleasare le Kishe. ₂₂Eleasare a shwa a se na bara, a ena le baradi feela; mme dikgaitsedi tsa bona, bara ba Kishe, tsa ba nyala. ₂₃Bara ba Mushi ke Mahali, Edere, le Jeremothe; ba bararo.

₂₄Ke bona bara ba Levi ka matlo a bontata bona; ke tsona dihlooho tsa matlo a bontata bona, kamoo ba kileng ba ngolwa kateng, ha ho balwa mabitso a bona ka ho ya ka dihlooho. Ba ne ba etsa mosebetsi wa tshebetso ya ntlo ya Jehova, ba qala ha ba le dilemo tse mashome a mabedi le ho ya pele; ₂₅hobane Davida o ne a itse: Jehova, Modimo wa Iseraele, o neile setjhaba sa hae phomolo, mme o tla aha Jerusalema ka ho sa feleng; ₂₆haele Balevi, ha ba sa na ho jara tabernakele leha e le mesebetsi yohle ya tshebetso. ₂₇Ke e nngwe ya taba tseo Davida a qeteletseng ka tsona, ha ho kile ha etswa palo ya bara ba Levi, ho qala ka ba dilemo tse mashome a mabedi le ho ya pele. ₂₈Hobane mosebetsi wa bona e ne e le ho tlatsa bara ba Aarone tshebetsong ya ntlo ya Jehova; ba ne ba laetswe ho baballa mabala le dikamore, le ho hlatswa ntho tsohle tse halalelang, le ho phetha mosebetsi wohle wa tshebetso ya ntlo ya Modimo; ₂₉le ho bona mahobe a pontsha, le lefi la phofo ya dinyehelo, le maqebekwane a se nang ditomoso, le tse phehwang paneng, le tse beswang, le ditekanyo tsa boholo le tsa bongata. ₃₀Ba ne ba tshwanetse ho itlhahisa pela Jehova ka hosasa ho hong le ho hong, ho boka le ho rorisa Jehova, le mantsiboya jwalo; ₃₁le ho hlahisetsa Jehova ditjheso tsohle, mohla Disabatha, le dikgwedi tse thwasang, le mekete, ka palo ya tsona, ka ho ya ka mokgwa wa ntho tseo, ka ho sa feleng pela Modimo. ₃₂Hape, ba ne ba boloka dintho tsa tente ya pokano, le tsa sehalalelo, le tsa bara ba Aarone, banababo bona, tsa ho etsa tshebetso ya ntlo ya Jehova.