I DIKRONIKE 11

₁Yaba Baiseraele bohle ba phuthehela ho Davida, Hebrone, ba re: Bona, re masapo a hao le nama ya hao. ₂Leha e le maoba le maobane, Saule ha e sa ntse e le morena wa rona, e be e le wena ya futuhisang Baiseraele, le ho ba orosetsa hae. Le Jehova, Modimo wa hao, o o boleletse, a re: O tla disa setjhaba sa ka sa Iseraele, o be molaodi wa setjhaba sa ka sa Iseraele. ₃Baholo bohle ba Iseraele ba tla jwalo ho morena, Hebrone; Davida a hlaba selekane le bona Hebrone, pela Jehova; mme ba tlotsa Davida, ho mo etsa morena wa Iseraele, ka polelo eo Jehova a neng a e boletse ka Samuele.

₄Yaba Davida le Baiseraele bohle ba futuhela Jerusalema, e leng Jebuse, moo ho neng ho le Bajebuse ba neng ba ahile naheng eo. ₅Baahi ba Jebuse ba re ho Davida: O ke ke wa kena kwano. Empa Davida a kena qhobosheane ya Sione; ke wona motse wa Davida. ₆Davida o ne a itse: Ya tla qhala Bajebuse pele, e tla ba kgosana le morena. Joabe, mora Tseruja, a hlwa pele, mme a etswa kgosana. ₇Davida a aha qhobosheaneng; ya rewa ke hona lebitso la motse wa Davida. ₈A ba a haha motse ka nqa tsohle, ho tloha Millo le ho isa ka nqa tsohle: Joabe yena a lokisa ho setseng ha motse. ₉Mme Davida a nna a ya a hola, kahobane Jehova wa makgotla a nna a ba le yena.

₁₀Ke tsena dihlooho tsa banna ba bahale ba Davida, ba nnileng ba mo emela boreneng ba hae, ba ena le Baiseraele bohle, ba tle ba mmee morena, ka polelo e neng e boletswe ke Jehova bakeng sa Iseraele. ₁₁Ke ena palo ya bahale bao Davida a neng a na le bona.

Jashobeame, mora Hakmoni, ke hlooho ya dinatla. A lwantsha banna ba makgolo a mararo ka lerumo la hae, a ba bolaya ka nako e le nngwe.

₁₂Ya mo hlahlamang ke Eleasare, mora Dodo, wa Akoke, e mong wa dinatla tse tharo. ₁₃Ke yena ya neng a emele Davida Pase-Dammime. Bafilesta ba ne ba phuthehetse teng ka ntwa; teng, ho ne ho na le lebatowa la tshimo le tletseng harese; ke mohla setjhaba se neng se balehetse Bafilesta. ₁₄Ba ema hare ho tshimo, ba e tseka, mme ba qhala Bafilesta; Jehova a namolela Iseraele ka hlolo e kgolo.

₁₅Ba bararo ho bao e leng dihlooho tsa dinatla tse mashome a mararo ba ne ba theohetse ho Davida seqhobong, lehaheng la Adullame; diahelo tsa Bafilesta di ne di hlomilwe kgohlong ya Barefaime. ₁₆Mohlang oo, Davida o ne a le seqhobong, mme sehlopha sa Bafilesta se ne se le teng Bethlehema. ₁₇Ke ha Davida a qala ho lakatsa, a re: Ke mang ya tla nnosa metsi a sediba sa Bethlehema se pela kgoro? ₁₈Yaba ba bararo bao ba phunyeletsa hara diahelo tsa Bafilesta, ba ekga metsi sedibeng sa Bethlehema se pela kgoro, mme ba a nka, ba tla le wona ho Davida; empa Davida a hana ho a nwa, a mpa a a tshollela Jehova; ₁₉a re: Ka Modimo wa ka, ha nka ke ka etsa hoo. Na ke be nka nwa madi a banna bao ba ileng ba tetse bophelo ba bona na? Hobane ba a tlisitse, ba sa re letho ka bophelo ba bona, A hana ho a nwa ke hona. Hoo ha etswa ke dinatla tseo tse tharo.

₂₀Abishai, moena Joabe, e ne e le hlooho ya ba bararo bao. A lwantsha banna ba makgolo a mararo ka lerumo la hae, a ba bolaya, mme a iketsetsa lebitso hara ba bararo bao. ₂₁Hara ba bararo, ya eba yena ya roriswang ho ena le ba babedi ba bang, mme ya eba hlooho ya bona, a mpa a sa fihle ho ba bararo ba pele.

₂₂E mong ke Benaia, mora Jehojada, mora monna wa senatla wa Kabsteele, ya neng a entse diketso tse kgolo. A bolaya tau tse pedi tsa Moabe; hape, ke yena ya neng a theohe, a ya bolaya tau ka lemeneng, e le mohla lehlwa le kgethehang. ₂₃A bolaya le monna wa Moegepeta; monna eo boemo ba hae e ne e le ditswe tse hlano. Moegepeta letsohong o ne a tshwere lerumo le neng le le ka ka sefate sa selohi; a theohela ho yena ka molamu, a amoha Moegepeta lerumo, mme a mmolaya ka lona lerumo leo la hae. ₂₄Tseo tsa etswa ke Benaia, mora Jehojada, mme a iketsetsa lebitso hara dinatla tseo tse tharo. ₂₅A roriswa ho feta ba mashome a mararo, a mpa a se ke a fihla ho ba bararo ba pele. Davida a mmea monna wa lekgotla.

₂₆Haele banna ba dinatla ba makgotleng a Davida, e ne e le Asaele, moena Joabe, Elkanane, mora Dodo wa Bethlehema; ₂₇Shammothe wa Harore, Heletse Mopalone; ₂₈Ira, mora Ikkeshe, wa Tekowa, Abiesere wa Anathothe, ₂₉Sibbekai wa Husha, Ilai wa Akowa, ₃₀Maharai wa Nethofa, Helede, mora Baana, wa Nethofa, ₃₁Ithai, mora Ribai, wa Gibea wa bana ba Benjamine, Benaia wa Pirathone, ₃₂Hurai wa Nahale-Gaashe, Abiele wa Araba, ₃₃Asmavethe wa Baharume, Eliahba wa Shaalbone, ₃₄Bene-Hasheme wa Gisone, Jonathane, mora Shage, wa Harare, ₃₅Akiame, mora Sakare, wa Harare, Elifale, mora Ure, ₃₆Hefere wa Mekera, Akija wa Palone, ₃₇Hetsro wa Karmele, Naarai, mora Esbai, ₃₈Joele ngwanabo Nathane, Mibhare, mora Hagri, ₃₉Tseleke Moammone, Nahrai wa Berothe, lehlahana la Joabe, mora Tseruja; ₄₀Ira, wa Jethere, Garebe wa Jethere, ₄₁Uria Mohethe, Sabade, mora Ahalai, ₄₂Adina, mora Shisa Morubene, molaodi wa Barubene, a ena le ba mashome a mararo, ₄₃Hanane, mora Maaka, le Josafete wa Mithni, ₄₄Osiase wa Ashtharothe, Shama le Jehiele, bara ba Hothame, wa Aroere, ₄₅Jediaele, mora Shimri, le Joha ngwanabo, wa Thitsi, ₄₆Eliele wa Mahavime, le Jeribai, le Joshavia, bara ba Elnaame, le Jithma Momoabe, ₄₇le Eliele, le Obede, le Jaasiele wa Metsobaia.