UZAKARIYA 11

₄Nakhu okwatjhiwo nguSomnini uZimami: “Yelusa izimvu zokuhlatjwa. ₅Abathengi bazo bazihlaba bebangazizwela umlandu. Labo abazithengisako bathi, ‘Akathokozwe uSomnini, uthi nginjingile na!’ Nabelusi bazo abe abanasirhawu nazo. ₆Nange ngingasenasirhawu ngabantu benarha le begodu ngibaliselele bona badlane uboya bengibaliselele nangekosabo, bazakubhubhisa inarha. Kuzakuba njalo nange ngingabasindisi emandlenabo.” Kutjho uSomnini.

₇Nje-ke ngathoma ukwelusa izimvu zokuhlatjwa zabathengisi. Ngathatha iintonga ezimbili, enye ngayithiya bona nguMusa enye ngathi nguHlanganani. Ngelusa umhlambi ₈ngemva kobana ngiqotjhe abelusi abathathu.

Kuthe ngenyanga yinye ngabe sengidiniwe ngomhlambi lo, kanti nawo wase ukholekile ngami. ₉Ngathi kiwo: “Abe angisazonelusa. Akufe efako, kubhubhe ebhubhako. Eziseleko zigadangane zodwa.”

₁₀Yeke ngathatha intongami ekuthiwa nguMusa ngayephula, ngabhidla isivumelwano uSomnini asenza nabo boke abantwabo. ₁₁Nje-ke sabhidleka khona mhlokho, kwathi abathengisi ngezimvu agade bangiqalile balemuka bonyana gade kulitshwayo lakaSomnini. ₁₂Ngabatjela ngathi: “Nanidlumbana bona kulungile, ngikhokhelani, kodwana nakungasi njalo, yenilise.” Nje-ke bangikhokhela amatjhumi amathathu weempaparwana zesiliva.

₁₃USomnini wathi kimi: “Ifuthele kumncibilikisisimbi, iye, imali ehle ebangikhokhele ngayo leyo!” Yeke ngathatha imali leyo ngayifuthela kumncibilikisisimbi ngendlini kaSomnini. ₁₄Ngephula intongami yesibili ekuthiwa nguHlanganani, ukubhidla ubufo phakathi kwakaJuda no-Israyeli.

₁₅Yeke uSomnini wathi kimi: “Ukusuka gadesi, sebenzisa iinsetjenziswa zomelusi odlhayeleko, ₁₆ngombana ngizokuvusa umelusi enarheni ongeze adlhadlharhele umhlambi olahlekileko, nanyana afunane neziphungukako, nanyana ahlenge ezilimeleko, nanyana ondle eziphilileko. Uzakugoma inyama yezimvu zekhethelo, abe agugude neenqatha zazo.”