UTITOSI 2

₁Kodwana nakunguwe, fundisa okukhambisana nesifundo esifaneleko. ₂Tjela amadoda amadala bona abe nesizotha, ahlonipheke, abe ngabhadlileko, azwisiseke ekukholweni okuphilileko, ethandweni nekunyamezeleni. ₃Ngokunjalo fundisa abafazi abadala bona baziphathe ngokuhlonipheka okuletha ukucwenga, bangabi ngabahlebako namkha amakhobokakazi wewayini, kodwana ababe ngabafundisa okuhle ₄ukuze bakwazi ukukhuthaza abomalukazana ukuthanda amadodabo nabantwababo, ₅bazibambe, babe msulwa, baphathe kuhle imizabo, babe nesisa, bathobele abayeni babo ukuze ilizwi lakaZimu lingarhubutjhwa.

₆Ngokunjalo khuthaza amasokana bona azibambe. ₇Wena-ke zibonakalise kikho koke usibonelo semisebenzi emihle; ekufundiseni kwakho ubonise ubuqotho nokuncama, ₈ube nekulumo ephilileko engeze yasoleka ukuze kuthi nanyana ngubani omjamelani adane kungabi nalitho elimbi angalitjho ngathi.

₉Fundisa iinceku kobona zithobele abanikazi, zibenzele okubathokozisako kikho koke, zingaphikisani nabo, ₁₀zingabebeli kodwana zikhombise ukuthembeka okupheleleko ukuze kuthi ezintweni zoke zihlobise ifundiso kaZimu uMsindisi wethu.

₁₁Umusa kaZimu ubonakalisiwe ukuletha isindiso kibo boke. ₁₂Usifundisa bona sihloboke ubumbi neenkanuko zephasi, siphile ngokuziphatha kuhle, ngokulunga nangokwesaba uZimu esikhathini sanamhlanje. ₁₃Iye, lokho sikwenze nasilokhu sisalindele ithemba elibusisiweko nokwambulwa kwephazimulo kaZimethu omkhulu noMsindisi wethu uJesu Krestu, ₁₄owazinikela ngebanga lethu ukuze asihlenge ekukhohlakaleni koke, azihlambululele abantu bakhe abatjhisekela imisebenzi emihle.

₁₅Fundisa izintwezo; ukhuthaze bewukhalime ngegunya loke. Akungabikhona namunye okunyazako.