ISAMBULO 21

₁Nje-ke ngabona izulu elitjha nephasi elitjha ngombana izulu lokuthoma nephasi lokuthoma besele kudlulile, nelwandle belingasekho. ₂Ngabona umuzi ocwengileko, iJerusalema elitjha, lehla livela kuZimu ezulwini, lilungiswe njengomlobokazi aqobotjhelele umyeni wakhe. ₃Ngezwa ilizwi elikhulu livela esihlalweni sobukhosi lithi: “Qala indlu kaZimu seyihlangana nabantu. Uyokuhlala nabo njengoZimu wabo bona babe sisizwe sakhe, iye, uZimu ngokwakhe uzakuba nabo abe nguZimu wabo. ₄Uzokwesula zoke iinyembezi emehlwenabo. Ukufa angekhe kusaba khona, ngitjho nokulila nobuhlungu angekhe kusaba khona ngombana izinto zokuthoma zidlulile.”

₅Loyo osesihlalweni sobukhosi wathi: “Qala, ngenza koke kube kutjha!” Wathi godu: “Kutlole lokhu ngombana amezwi la athembekile begodu aliqiniso.” ₆Nje-ke wathi kimi: “Sekwenziwe! Mina ngingu-Alfa no-Omega, ukuthoma nokuphela. Owomileko ngizamseza amanzi ngesihle emthonjeni wamanzi wokuphila. ₇Loyo oyokuhlula uzakudla ilifa lezintwezo begodu mina ngizakuba nguZimakhe yena abe mntwanami. ₈Kodwana amatjhatjha, abangakholwako, abasilapheleko, ababulali, iinhlobongi, abenza imilingo, abalotjha abosingazimu nabo boke abaleya amanga isabelo sabo sizakuba selitsheni elivuthako lomlilo nesibabuli, okukukufa kwesibili.”

₉Enye yeengilozi ezilikhomba eziphethe izitja ezilikhomba ezizele iinhlupheko ezilikhomba zokuphela, yeza kimi yafese yathi: “Yiza ngikutjengise umlobokazi, umkaMvana.” ₁₀KuMoya yangithwala yangisa entabeni ekulu nephakamileko, yangitjengisa umuzi ocwengileko okutjho iJerusalema, wehlela phasi uvela ezulwini kuZimu. ₁₁Bewunephazimulo kaZimu nokukhanya okunjengobuphaziphazi obuligugu njengelitje elihle khulu ijasiperi elidarhe njengomabula. ₁₂Bewunomthangala omkhulu ophakemeko onamasango alitjhumi nambili alindwe ziingilozi ezilitjhumi nambili. Emasangweni bekutlolwe ngokugobhodlha amabizo alitjhumi nambili weenkoro zakwa-Israyeli. ₁₃Bekunamasango amathathu ngeswazini langepumalanga, amathathu ngetlhagwini, amathathu ngesewula namathathu ngetjingalanga. ₁₄Begodu umthangala womuzi bewuneensekelo ezilitjhumi nambili obekutlolwe kizo amabizo wabapostoli abalitjhumi nambili beMvana.

₁₅Ingilozi eyangikhulumisako beyiphethe ilithi lokulinganisa legolide kobana ilinganise ngalo umuzi namasango wawo kanye nemithangala yawo. ₁₆Umuzi bewendlaleke unguncazine, ubude nobubanzi bawo kulingana. Nje-ke yalinganisa umuzi ngelithi layo kwaba makhilomitha aziinkulungwana ezimbili namakhulu amabili; iye, ubude bawo bungangobubanzi nokuphakama kwawo. ₁₇Godu yalinganisa umthangala, kwaba mamitha amatjhumi alikhomba namabili ngokwesilinganiso sabantu ingilozi eyasisebenzisako. ₁₈Umthangala wakhiwe ngejasiperi, khisibe umuzi wakhiwe ngegolidembala, udarhe njengerhalasi. ₁₉Iinsekelo zomthangala womuzi zihlotjiswe ngemihlobo yoke yamatje amahle: lokuthoma lijasipi, lesibili kuyisafaya, lesithathu kuyikhalikedoni, lesine kuyisimaragidu, ₂₀lesihlanu kuyisaridoniksi, lesithandathu kuyisaridiyu, lekhomba kuyikrisolithe, lobunane kuyibherili, lethoba kuyithophazi, letjhumi kuyikrisopirasi, letjhumi nanye kuyiyakintu, letjhumi nambili kuyi-amethisi. ₂₁Amasango alitjhumi nambili kumamatje aligugu, alitjhumi nambili; ngilelo nalelo sango lililitje eliligugu ngokwalo. Indlela yomuzi iligolide, ikhanya ubone ngale njengerhalasi.

₂₂Azange ngalibona ithempeli hlangana nomuzi ngombana ithempeli lawo linguSomnini uZimu uMninimandlawoke neMvana. ₂₃Umuzi lo awudingi ilanga namkha inyezi bona kuyikhanyisele ngombana iphazimulo kaZimu imkhanyo wawo neMvana isibani sawo. ₂₄Izizwe zephasi ziyokukhamba emkhanyweni wawo, amakhosi wephasi ayokuletha idumo lawo kiwo. ₂₅Amasango wawo angekhe avalwa ilanga loke nobusuku angekhe baba khona lapho. ₂₆Abantu bayokwethula kiwo ubuphaziphazi nedumo lezizwe. ₂₇Kodwana akukho okusilapheleko okuyongena kiwo okutjho owenza amanyala namkha othoma amanga, kwaphela abatlolwe encwadini yokuphila yeMvana.