AMARHUBO 95

₁Yenize sihlokomele uSomnini;

iye, sihlokomalele iDwala lesindiswethu!

₂Asitjhideleni phambi kwakhe ngokuthokoza,

simhlokomalele ngeengoma!

₃Mbala, uSomnini unguZimu omkhulu

nombusi omkhulu ngaphezu kwabozinyana.

₄Esandleni sakhe uphethe ukuzika kwephasi,

iinqongo zeentaba nazo zingezakhe.

₅Ilwandle lingelakhe ngombana walenza

nezandla zakhe zabumba indawo eyomileko.

₆Yizani simlotjhe simkhothamele,

siguqe phambi kwakaSomnini umenzethu!

₇Mbala, yena unguZimethu,

thina sibabantu bedlelo lakhe

nomhlambi wesandla sakhe.

Namhlanje kwanga ningalalela iphimbo lakhe

ngombana wathi:

₈“Ningaqinisi iinhliziyo zenu njengeMeriba

nanjengelangeni lelo eMasa, erhalawumbeni,

₉lapha aboyihlomkhulu bangizizinya khona,

bangilinga nanyana besele babonile umsebenzami.

₁₀Iminyaka ematjhumi amane

isizukulwaneso sangikghabhudlha.

Nje-ke ngathi,

‘Sibabantu abaphambene ngehliziyo,

neendlela zami asiziyeleli.’

₁₁Ngalokho ngafunga elakeni lami ngathi,

‘Angeze bangene ekuphumuleni kwami.’ ”