AMARHUBO 94

₁Zimu obuyiselelako, Somnini,

iye, wena Zimu obuyiselelako,

khanya ngokudarhileko!

₂Sikima wena mgwebi wephasi,

uphe abazitjhayako okubafaneleko!

₃Somnini, kuzabe kube nini

iinkhohlakali ziziphakamisa,

iye, kuzabe kube nini zidlondlobala na?

₄Zikhuluma ngamaganyana wokuzitjhaya

iye, zoke iingilamkhuba ziyazikhakhazisa.

₅Ziqova abantu bakho, Somnini,

zigandelela ilifa lakho.

₆Zibulala umhlolokazi nesikhonzi,

iye, zitjhabalalisa iintandani,

₇zibuye zithi: “USomnini akaboni;

uZimu kaJakopo akanaki.”

₈Yelelani nina bantu abalibeleko!

Nina ndlhayela ndina, nizakuhlakanipha nini?

₉Owanameka indlebe, akezwa na?

Owahlomela ilihlo, akaboni na?

₁₀Okhalimela bezizwe, akabethi na?

Mbala ofundisa umuntu ilwazi,

₁₁unguSomnini owazi imicabango yomuntu

kobana ililize lakolize.

₁₂Ubusisiwe omkhalimelako Somnini;

iye, loyo omfundisa ngomthethwakho

₁₃ukuze umnikele ukuphumula emalangeni amambi,

ukufikela lapha isikhohlakali senjelwa khona umgodi.

₁₄Ngambala, uSomnini angeze abatjhiye abantu bakhe,

angeze alilahla ilifa lakhe.

₁₅Iye, ubulungiswa buzakubuyela kwabalungileko

nabaqotho ngehliziyo bazabulandela.

₁₆Ngathi:

“Ngubani ozangijamela kabenza okumbi?

Ngubani ozangenyela eengilamkhubeni na?”

₁₇Ngathana uSomnini akhange angisize,

ngabe sengibalwa nabaleleko.

₁₈Nangidlumbana bonyana inyawo lami liyatjhelela,

ukwethembeka kwakho, Somnini, kwangisekela.

₁₉Lokha imikhumbulwami nayihlubayezeka khulu,

induduzwakho ivuselela umphefumulwami.

₂₀Wena angeze waba nehlanganyelo

nabagwebi abakhohlakeleko,

labo ababumba okumbi ngokujamelana nomthetho.

₂₁Baluka ilisu ngepilo yolungileko,

balahle onganacala ngesigwebo sokufa.

₂₂Kodwana uSomnini ube lirholo lami,

iye, uZimami olidwala lobuphephelo bami.

₂₃USomnini uzababuyiselela ngesono sabo,

abathanyele ngobukhohlakali babo;

iye, uSomnini uZimethu uzabathanyela.