AMARHUBO 88

₂Somnini, Zimu wesindiswami,

emini ngiyarhuwelela,

ebusuku ngiphambi kwakho.

₃Umthandazwami awufike kuwe,

indlebakho ilalele ukulila kwami

₄ngombana umphefumulwami uzwile ngamatshwenyeko

nokuphila kwami kutjhidele ekufeni.

₅Ngibalwa kanye nabehlela emgodini,

sese ngifana nomuntu ophelelwe mamandla,

₆otjhiyiweko hlangana nabafileko

nanjengabamadlhwe bebalala ethuneni

ongasabakhumbuliko;

iye, njengabasusiweko esandleni sakho.

₇Ungibeke ekuzikeni komgodi,

eendaweni zobumnyama obutjhingako.

₈Ilaka lakho lingehlele,

ungibhibha ngamadlambakho.

₉Wenze iinhlobo zami zangitjhiya,

wangenza ngaba sinyenyiso kizo;

ngivalelekile, angikwazi ukuphuma.

₁₀Ilihlo lami liyafiphala ngesizi.

Imihla yoke ngilila kuwe Somnini,

ngikhongozela kuwe izandla zami.

₁₁Abafileko uyabenzela iimangaliso na?

Iinthunzi ziyavuka zikuthokoze na?

₁₂Ukwethembeka kwakho kuyatjhunyayelwa ethuneni,

namkha ubuqotho bakho endaweni yokubhujiswa na?

₁₃Iimangaliso zakho ziyaziwa ebumnyameni,

namkha ukulunga kwakho ezweni lokukhohlwa na?

₁₄Yeke mina Somnini, ngilila kuwe;

ekuseni umthandazwami wenyukela kuwe.

₁₅Somnini, ungilahlelani?

Ungifihlelelani ubuso bakho?

₁₆Kusukela ebutjheni bami ngingochakileko,

ngisengozini yokufa;

ngiphelile ngokwethuswa nguwe.

₁₇Ubukhali bakho bungehlele;

ukwesabeka kwakho kungiqedile.

₁₈Kungizombe njengamanzi imini yoke,

kungizombeleze mahlangothi woke.

₁₉Wenze bona abangithandako

nabomakhelwana bangihlubuke,

iinhlobo zami sese kubumnyama.