AMARHUBO 83

₂Zimu, ungathuli,

ungali ukukhuluma.

Nyakaza Zimu!

₃Qala, izitha zakho ziyavungama,

abakuzondileko baphakamisa iinhloko.

₄Ngabantu bakho balumba amano,

bakha isicathana ngalabo obavikeleko.

₅Bathi: “Izani sibaqedeni

ukuze bangasabi sisizwe;

ibizo laka-Israyeli lingasakhunjulwa.”

₆Ngahliziyonye balumbisana amano,

benza isivumelwano ngani:

₇Labo-ke matende ka-Edomu nama-Itjhimayeli,

bakwaMowabi namaHagari,

₈wakaGebali, ama-Amoni nama-Amalekhi,

iFilistiya kanye nabahlali beTirosi.

₉Ne-Asiriya lizihlanganise nabo,

laba yingalo yeenzukulwana zakaLothi.

₁₀Yenza kibo njengeMidiyaneni

nanjengakuSisera noJabini emlanjaneni weKhitjhoni:

₁₁Bona ababhubhela e-Eni-Dori,

baba msuqwa ehlabathini.

₁₂Yenza eenkhulwini zabo

njengaku-Orebi noZebi,

wenze emakhosanenabo

njengakuZebarhi noTsalimuna,

₁₃okungibo ebebathi:

“Asizithathele amadlelo kaZimu,

abe lilifa lethu.”

₁₄Zimami, benze babe njengekhula elomileko,

iye, njengamawunguwungu emuka nommoya.

₁₅Njengomlilo otjhisa ihlathi

nanjengelangabi elithungelela iintaba,

₁₆ngendlela leyo bagijimise,

ubarage ngesivunguvungu sakho,

ubethuse ngesiwuruwuru sakho.

₁₇Thela ubuso babo ngeenhloni

ukuze bakwazi ukufuna ibizo lakho, Somnini.

₁₈Benze barhubutjheke bebadane nini nanini;

bakhene bebabhubhe.

₁₉Benze balemuke bona wena,

nguwe wedwa obizwa bona unguSomnini,

iye, wena ungoPhezulu ephasini loke.