AMARHUBO 80

₂Yewusizwe melusi ka-Israyeli,

wena orhola uJosefa njengomhlambi!

Wena ohlala phezu kwamakerubhi,

ziveze ngephazimulo

₃phambi kwaka-Efrayimi, uBhenjamini noManase.

Vuselela amandlakho,

uze uzosisindisa.

₄Zimu, sibuyise!

Khanyisa ubuso bakho,

khona sizakusindiswa.

₅Somnini, Zimu Mninimandlawoke,

kuzabe kube nini

unevunda ngemithandazo yabantu bakho na?

₆Wabondla ngesikwa seenyembezi,

wabaseza isiziba seenyembezi.

₇Wasenza isihlekiso sabomakhelwana bethu

nezitha zethu ziyasikokomeja.

₈Zimu ongoPhezulu, sibuyise!

Khanyisa ubuso bakho,

khona sizakusindiswa.

₉Wakhupha isidiribe eGibhide,

waqotjha izizwe wasitjala.

₁₀Wasilungisela indawaso,

senabisa imirabhaso, sazala inarha.

₁₁Iintaba zembeswa mthunzaso

nemisedari emikhulu mirarelaso;

₁₂sanabululela iingala zaso elwandle,

amahlumelaso afika emilanjeni iYufrathe.

₁₃Kubayini wephule iimbiyelo zaso,

kuthi okudlulako kukhe koke na?

₁₄Iwotji yehlathi iyasitlhifirija

neenkhakhabi zommango ziyadla.

₁₅Awu, wena Zimu ongoPhezulu,

yewubuyele kithi godu;

usezulwini qala phasi ubone,

unake isidiribesi,

₁₆iye, ilungu owalitjala ngesidla sakho.

₁₇Basitjhise ngomlilo isidiribeso,

basiquntile basiwisela phasi.

Kwanga bangabhubha ngokukhalima kobukhona bakho.

₁₈Kodwana isandla sakho Somnini,

asibe phezu kwaloyo ongesidleni sakho,

iye, phezu kwaloyo ozikhulisele yena.

₁₉Yeke, angeze sisaba ngabangathembekiko kuwe,

sivuselele, khona sizakubabaza ibizo lakho.

₂₀Somnini, Zimu ongoPhezulu, sibuyise!

Khanyisa ubuso bakho,

khona sizakusindiswa.