AMARHUBO 73

Ngambala uZimu umlungele u-Israyeli,

iye, labo abanehliziyo ehlanzekileko.

₂Kodwana nakungimi yena,

iinyawo zami zapheze zatjhelela,

kwasala kancani bona ziphambuke

₃ngombana ngakhanukela abazikhukhumezako,

nangibona itjhudu labakhohlakeleko.

₄Bona abananhlungu bekube sekufeni,

izisu zabo zihlala zitatamele.

₅Abatjhabatjheki njengabantukazana,

abahlunguphazwa njengabanye.

₆Yeke ukuzigqaja kungunongoro entanyenabo,

bambethe ubudlova njengengubo.

₇Amehlwabo abimbekile ngokunona,

imicabango yehliziywabo iyaphuphuma.

₈Bayaphoqa bakhulume ngokukhohlakala,

ngokuziphakamisa bagandelela abanye.

₉Imilomabo inyefula izulu

namalimabo ahlambalaza iphasi.

₁₀Iwoma liyabalandela,

lirhuqa amezwabo inga mamanzi,

₁₁lokha nabathi: “UZimu wazi njani na?

OngoPhezulu unelwazi na?”

₁₂Qalani, zinjalo-ke iinkhohlakali:

Zihlala zikhomba ngophakathi,

zikhule ngomnono.

₁₃Kube lilize kobana ngihlambulule ihliziywami,

ngahlamba izandla zami ngimsulwa

₁₄ngombana ngakhathazwa ilanga loke,

njalo ekuseni ngahlunguphazwa.

₁₅Nakube bengithe, “Ngizakuhlala ngikhuluma njalo”,

bengizokuba mkhohlisi esigungwini sabantwabakho.

₁₆Kodwana ngathi nangilinga ukuzwisisa lokhu,

kwabonakala kuyinto ebudisi kimi,

₁₇bekwaba kulapha ngingena khona

ngethempelini lakho Zimu,

lokha nangilemuka isiphetho sabo:

₁₈Mbala ubeka iinkhohlakali eendaweni ezibutjhelelezi,

uzenze bona ziwele ebhudwini.

₁₉Maye, zibhujiswa ngesikhatjhana!

Zitjhabalaliswa nya ngevalo!

₂₀Zinjengebhudango elimbi

ekuphaphameni komuntu:

Somandla, lokha nawuvukako

uzithalalisa njengombono webhudangwelo.

₂₁Lokha ihliziywami imunyu

nemizwami idungekile,

₂₂mina ngaba siyila nongalemukiko;

iye, ngaba njengesibandana kuwe.

₂₃Nokho mina bengiseze nginawe;

ubambe isandla sami sokudla.

₂₄Ungirhola ngeseluleko sakho,

ungamukele ebukhoneni bakho.

₂₅Ngubani enginaye ezulwini ngaphandle kwakho na?

Ngaphandle kwakho ephasini akunanto engiyikhanukelako.

₂₆Umzimbami nehliziywami zingaphelelwa,

kodwana uZimu ulidwala lehliziywami

nesabelo sami ngokungapheliko.

₂₇Mbala, abadeda kuwe bazakubhubha;

uphelisa boke abangakathembeki kuwe.

₂₈Kodwana nakungimi,

kuhle ukuba seduze noZimu;

ngenze uSomnini uSomandla isiphephelo sami

ukuze ngikhulume ngakho koke akwenzileko.