AMARHUBO 69

₂Zimu, ngisindise

ngombana sengivele ngehloko ngemanzini!

₃Ngiminza edakeni elitjhingako,

sengifike emanzini azikileko

neenkhukhula ziyangigubuzesa.

₄Ngidiniwe ngokulila kwami,

umphimbami uyarhoroza,

amehlwami selafiphele ngokuqalelela uZimami.

₅Abangizonda ngelize banengi

ukudlula iinhluthu ehlokwenami.

Abangiqedako banamandla,

iye, labo abajamelana nami ngamanga.

Ngikatelelwa ukubuyisela engingakakudlelezeli.

₆Zimu, wena uyabazi ubudlhayela bami,

amacalami abhamba kuwe.

₇Somnini, Somandla, Mninimandlawoke,

abaqalelela kuwe, abangadaniswa ngenca yami.

Zimu ka-Israyeli,

abakufunako abangarhubutjhwa ngebanga lami.

₈Ngenca yakho ngithwele ihlamba,

ihlazo lembese ubuso bami.

₉Sengiphenduke otjhili ngakwethu,

ngimqhamuka ebantwaneni bakababa.

₁₀Ukutjhisakalela indlwakho kungidlile;

iinhlamba zabakuthukako zehlele kimi:

₁₁Ngazithobisa ngokuzila,

kwaba yihlamba kimi.

₁₂Ngembatha izambatho zokuzila

nalapho ngaba siphoqo kibo.

₁₃Abahlezi esangweni bathamba ngami

neengomeni zeendakwa kunjalo.

₁₄Kodwana mina, ngithandaza kuwe, Somnini,

akube sikhathi sokwamukeleka kuwe, Zimu:

Ngiphendule ngokwethembeka kwakho okukhulu!

Ngeqiniso lesindiswakho

₁₅ngikhuphe edakeni!

Angifuni ukutjhinga phasi;

ngifisa ukwenyulwa kabangizondako,

ngitjho nekuzikeni kwamanzi.

₁₆Ungavumeli isikhukhula singigubuzese,

ungavumeli ukuzika kungiginye

namkha umgodi wethuna ungibhibhe.

₁₇Ngiphendule Somnini

ngombana ukwethembeka kwakho kukhulu;

phendukela kimi ngesirhawu sakho esikhulu,

₁₈ungayifihleli incekwakho ubuso bakho

ngombana ngihluphekile.

Rhaba ungiphendule!

₁₉Tjhidela kimi, ungihlenge,

ngitjhaphulule ngenca yezitha zami.

₂₀Wena uyayazi ihlamba engethukwa ngayo,

ihlazo nokurhubutjhwa kwami;

zoke izitha zami ziyazeka kuwe.

₂₁Iinhlamba ziyephulile ihliziywami, ayiselapheki.

Ngalindela ukutlhuwelwa, kodwana do

nokurhawukelwa, kodwana akhange ngikufunyane.

₂₂Banginikela inyongo esikhundleni sokudla

nangomileko bangiseza isibharha.

₂₃Itafula labo alibe sisifu phambi kwabo,

libe sithiyo ebakhozini babo.

₂₄Amehlwabo akaphophale ukuze bangaboni;

wenze amadinabo ahlale agedla.

₂₅Thululela ilaka lakho phezu kwabo,

ubukhali bakho obuvuthako bubafikele.

₂₆Kwanga ikampabo ingaba dududu

kungabikhona ohlala ematendenabo

₂₇ngombana bazumana nalabo obabethileko,

bakhuluma ngalabo obalimazileko.

₂₈Ngezelela icala ecaleni labo,

ungababali emsenakho.

₂₉Abasulwe encwadini yabaphilako,

bangatlolwa erhelweni labalungileko.

₃₀Ngihluphekile, ngineenhlungu;

yeke isindiswakho ayingivikele!

₃₁Ibizo lakaZimu ngilidumisa ngengoma,

iye, ngimphakamisa ngokuthokoza!

₃₂Lokhu kuzamthabisa uSomnini

ukudlula umhlabelo wekomo,

iye, ikunzi eneempondo

neenqatha ezihlukene kabili.

₃₃Abathobekileko bayabona, bajabule,

abafuna uZimu bayathaba.

Nje-ke iinhliziyo zenu azename!

₃₄Ngambala, uZimu uyabalalela abanesidingo,

akabadeleli abangabakhe abasekuthunjweni.

₃₅Akadunyiswe lizulu nephasi,

ilwandle nakho koke okuphila kilo.

₃₆Ngambala uZimu uzakusindisa iZiyoni,

avuselele amadorobho wakwaJuda.

Abangabakhe bazakuhlala lapho bawathumbe;

₃₇iye, iinzukulwana zeenceku zakhe

zizakuzuza inarha,

abathanda ibizo lakhe bazakuhlala kiyo.