UZimu udunyiswa ngesirhawu sakhe
1Kumkhaleli; “Ungatjhabalalisi”; lakaDavida; iMikitamu, lokha nabalekela uSawula ngerholweni.
2Ngirhawukele Zimu, ngirhawukele
ngombana kuwe umphefumulwami uyaphephela;
ngikhosela emthunzini wamaphikwakho,
kufikela lapha kudlula khona ubhubhani.
3Ngilila kuZimu ongoPhezulu,
iye, kuZimu ongenyelako.
4Uzakuthumela isizo lisuka ezulwini, angisindise.
Uzakuraranisa labo abangiwalazelako.
UZimu uzakuthumela ukwethembeka neqiniso lakhe.
5Ipilwami iphakathi kwamabhubezi,
kufuze ngilale neendlamuntu.
Amazinywazo amikhonto nemisubela,
amalimu wazo ayisabula ebukhali.
6Zimu, phakama ngaphezu kwamazulu,
iphazimulwakho ayibe ngaphezu kwephasi loke.
7Abantu babekele amagadangwami isifu;
ummoyami wephukile.
Bangembele umgodi emzilenami,
kodwana kukhalakathele bona.
8Zimu, ihliziywami inzinzile,
iye, ihliziywami inzinzile;
ngizakuvuma, ngidumise.
9Vuka, mphefumulwami, vuka!
Ngeenara zamaharibha ngizakuphaphamisa ukusa.
10Somandla, ngizakudumisa hlangana nabantu,
ngikhalele ingoma kuwe phakathi kwezizwe.
11Ukwethembeka kwakho kuphakeme njengamazulu
neqiniso lakho lelulekele emafini.
12Zimu, phakama ngaphezu kwamazulu,
iphazimulwakho ayibe ngaphezu kwephasi loke.
