AMARHUBO 45

₂Ihliziywami iyaphuphuma ngamezwi amahle;

ngizakwethula amezwi wekondlwami engwenyameni,

ilimu lami lifana nesiba lakasosiba onobukghoni.

₃Uyaqaleka wena kunabantu boke;

isisa sithululelwe eembheneni zakho

ngombana uZimu ukubusise isiphelani.

₄Wena ngorho, hloma isabulakho enyonga,

lokho kube lidumo nobukhosi bakho,

₅iye, ubukhosi bakho.

Yiba nepumelelo nawuphumako

ngenca yeqiniso nokujamela ukulunga!

Isandla sakho sokudla asikwenzise

imisebenzi eyesabekako.

₆Ngwenyama, imisubela yakho ibukhali,

ihlaba ehliziyweni yezitha zakho,

ziwe ngaphasi kwakho.

₇Isihlalo sakho Ngwenyama, ngesanini nanini;

intongakho yobukhosi ingeyokulunga;

₈uthanda ukulunga, uzonda okumbi.

Ngalokho Ngwenyama, uZimakho ukuzese

ngamafutha wokwenama ngaphezu kwabangani bakho.

₉Zoke izambatho zakho zifufuzelwe,

ngemire, iqolo lesikghopha namakhwa wesinamoni.

Eengodlweni ezikghatjiswe ngamazinyo wendlovu

kubethwa imitjingo eyenza wename.

₁₀Amakhosazana azihlobise

ngobuphaziphazi bakho,

ngesidleni sakho kujame indlovukazi,

ihlobe ngegolide le-Ofiri.

₁₁Lalela wena ndodakazi!

Phosa amehlo ubeke indlebe,

ukhohlwe abantu bekhenu nendlu kayihlo.

₁₂Lokha ingwenyama nayikhangwa bubuhle bakho,

kumele uyikhothamele

ngombana iyikosakho.

₁₃Kosazana yeTirosi,

abanjingileko bazakuncenga umusakho ngezipho.

₁₄Ngevunulo kanokutjho

ikosazana leyo ilinde ngelawini,

ingubayo irutjelwe ngegolide.

₁₅Ilethwa ekosini

yembethe imibalabala,

ilandelwa matlawana, iimpelesi zayo.

Iye, balethwa kuwe, Ngwenyama.

₁₆Ngokulilizela nokwenama, bayahlahlwa

ekungeneni kwabo ngesigodlweni.

₁₇Amadodanakho Ngwenyama,

azakuhlala esikhundleni saboyihlo.

Uzawenza abe makhosana enarheni yoke.

₁₈Ngizakwenza ibizo lakho

lidunyiswe eenzukulwaneni zoke,

ngalokho abantu bazakudumisa ngokungapheliko.