AMARHUBO 39

₂Mina ngathi: “Iindlela zami ngizaziqaphela

ukuze ngingoni ngelimu lami,

mlunga okhohlakeleko asesephambi kwami,

ngizakulonda umlomami ngesifonyo.”

₃Bengisimumu, ngizithulele,

kodwana ukuthula kwami

akhange kusize litho;

ubuhlungu bami bakhambelela,

₄ihliziywami yavutha ngaphakathi kwami,

kuthe ngisabubula, ngezwa kutjhisa,

nje-ke ngatjhaphulula umlomami ngathi:

₅“Somnini ngazise ukuphela kwami,

nokobana siyini isilinganiso samalangami;

ngazise bona ngingodlulako.

₆Qala, wenze amalangami

aba yikereketjhana,

ukuphila kwami kulilize phambi kwakho;

mbala, woke umuntu umuphefumulo nje.

₇“Kwamambala, umuntu ukhamba njengethunzi;

iye mbala, uzikhathaza ngelize;

uyabuthelela, kodwana akamazi ozokuhlomula.

₈“Yeke Somnini, yini okhunye engisakuqaleleleko?

Ithemba lami likuwe.

₉Ngisindise kizo zoke iimphambeko zami,

ungavumi ngibe siphoqo sabokeke.

₁₀Ngizazithulela, ngingawuvuli umlomami

ngombana nguwe Somnini owenzileko.

₁₁Susa kimi isibetho sakho

ngombana sengifile mivimbo yesandla sakho.

₁₂Ufundisa umuntu ngokumkhalimela ngecala;

njengomvunya ovithizako,

wena uqeda okuligugu kuye:

Mbala, woke umuntu umuphefumulo nje.

₁₃“Yizwa umthandazwami Somnini,

ubeke indlebe esililweni sami,

ungathuli ngeenyembezi zami

ngombana kuwe ngisikhonzi,

ngisithekeli njengabo boke abokhokho.

₁₄Susa amehlwakho kimi,

ukuze ngikwazi ukumomotheka

ngaphambi kobana ngigoduke,

ngingasabakhona.”