AMARHUBO 34

₂USomnini ngizamdumisa ngeenkhathi zoke;

ngizakuhlala ngimbabaza njalo ngomlomami.

₃Mina ngizazikhakhazisa ngoSomnini,

abathobekileko abezwe lokho, bajabule.

₄Phakamisani uSomnini kanye nami,

sikhulise ibizo lakhe kanyekanye.

₅Ngathandaza kuSomnini, wangiphendula;

wangitjhaphulula kikho koke ukwesaba kwami.

₆Qalelelani uSomnini, nimomotheke,

yeke ubuso benu abusoze badana!

₇Nasi isihlupheki esalilako, uSomnini wasizwa,

wasisindisa kizo zoke iinhlupheko.

₈Abesaba uSomnini,

baphahlwa yingilozi mazombe, ibenyule.

₉Yizwani benibone bonyana uSomnini muhle,

ubusisiwe umuntu ophephela kuye.

₁₀Mesabeni uSomnini nina bacwengileko bakhe

ngombana abamesabako abasweli litho.

₁₁Amabhubezana ayadinga abe aphathwe yindlala,

kodwana labo abafuna uSomnini abasweli litho.

₁₂Nina bantwana, izani nizongilalela,

nje-ke ngizonifundisa ukwesaba uSomnini:

₁₃Ngubani kini othanda ukuphila,

nofisa amalanga amanengi wokwenama na?

₁₄Akalonde ilimu lakhe ekohlakalweni,

neembhena zakhe ekukhulumeni ikohliso.

₁₅Akahlukane nobumbi, enze okuhle;

afune ukuthula akurhuluphele.

₁₆Amehlo wakaSomnini aphezu kwabalungileko,

neendlebe zakhe zivulekele isililo sabo.

₁₇Ubuso bakaSomnini bujibile phezu kweengilamkhuba,

uphelisa ukukhunjulwa kwazo ephasini.

₁₈Abalungileko nabanesililo, uSomnini uyabezwa,

abatjhaphulule kizo zoke iinhlupheko zabo.

₁₉USomnini useduze nabanehliziyo ephukileko,

usindisa abanommoya odanileko.

₂₀Zinengi iinhlupheko zolungileko,

kodwana uSomnini uyamtjhaphulula kizo zoke;

₂₁alonde woke amathambakhe,

kungabikho nelilodwa kiwo elizakwephulwa.

₂₂Okumbi kuyambulala okhohlakeleko,

abazonda olungileko bazakuhlawuliswa.

₂₃USomnini uhlenga ipilo yeenceku zakhe;

akakho noyedwa ophephela kuye ozakuhlawuliswa.