AMARHUBO 25

Somnini, umphefumulwami uyakulangazelela.

₂Zimami, ngithembele kuwe,

ungavumeli bona ngingene ehlazweni;

ungavumeli izitha zami ziqhanase ngami.

₃Ngambala boke abaqalelele kuwe

angeze badaniswa.

Labo abakuhlubukako ngelize bazakuhlaziswa.

₄Ngazise iindlela zakho Somnini;

ungifundise imizilakho.

₅Ngikhambisa eqinisweni lakho, ungifundise

ngombana wena unguZimu wesindiswami,

ngithembele kuwe ngesikhathi soke.

₆Somnini, khumbula izenzo zesisa

nezokwethembeka kwakho

ngombana zibekhona ekadeni.

₇Ungakhumbuli izono zobutjha bami

namkha iimphambeko zami;

ngikhumbule ngokwethembeka kwakho

ngebanga lezenzo zakho ezihle.

₈USomnini ulungile begodu uqotho,

ngalokho ukhombisa izoni indlela.

₉Urholela abathobekileko kokulungileko,

iye, abathobekileko ubafundisa indlelakhe.

₁₀Zoke iindlela zakaSomnini zikukwethembeka,

ziliqiniso kilabo abalonda isivumelwano nobufakazi bakhe.

₁₁Ngebanga lebizo lakho Somnini,

colela icala lami ngombana likhulu.

₁₂Ngimuphi umuntu owesaba uSomnini na?

Yena uzamfundisa indlela azayikhetha.

₁₃Umuntu loyo uzakuhlala aphumelela,

isizukulwana sakhe sizakuzuza inarha.

₁₄USomnini wenza isikhozi nabamesabako,

azise isivumelwano sakhe kibo.

₁₅Nini nanini amehlwami ahlala akuSomnini

ngombana nguye ophephisa inyawo lami esifwini.

₁₆Phendukela kimi Somnini, ube nomusa kimi

ngombana nginesizungu, ngihluphekile.

₁₇Iinhlupheko zehliziywami zingikhulele,

yewungikhuphe esizini lami.

₁₈Yelela ukuhlupheka nokubandezelwa kwami,

ungicolele zoke izono zami.

₁₉Akhusuthi uyaqala,

izitha zami zinengi,

uqale nelunya ezingizonda ngalo.

₂₀Londoloza ipilwami, ungenyule;

ungavumeli bona ngingene ehlazweni

ngombana ngiphephela kuwe.

₂₁Kwanga ubuqotho nokulunga kungangilondoloza

ngombana ngiqalelele kuwe, Somnini.

₂₂Zimu, akhese ukhuphe u-Israyeli

kizo zoke iinhlupheko zakhe.