AMARHUBO 18

Ngiyakuthanda Somnini, umamandlami.

₃USomnini ulidwala lami, isiphephelo nomsindisami.

UZimami ulirholo lami engiphephela kilo;

usihlangu sami namandla wesindiswami.

Usiqongolo sami ₄ufanele ukudunyiswa:

Nangilila kuSomnini, ngisindiswa ezitheni zami.

₅Ngenganyelwa misinga yokufa,

iinkhukhula ezibhubhisako zangethusa.

₆Iinkawule zezindla bezingirarele;

ngabandamelwa zizifu zokufa.

₇Ematlhuwenami ngalilela uSomnini,

ngarhuwelela uZimami.

Wezwa ilizwi lami asesigodlweni sakhe,

ukulila kwami kuye kwafika eendlebeni zakhe.

₈Iphasi ladedemela begodu lahlengezela,

iinsekelo zeentaba zasikinyeka,

zathuthumela ngombana gade asilingekile.

₉USomnini nasilingekileko

ufana nentabamlilo ethunya intuthu

nekhafula amalangabi nekehla.

₁₀Wavula amazulu wehlela phasi;

ngaphasi kweenyawo zakhe

bekunamafu anzima tshu.

₁₁Kwaba ngathi uphapha ngekerubhi,

ebeliphapha belithiyelele emaphikweni wommoya.

₁₂Ubumnyama wabenza isigubuzeso sakhe,

ubusithelo bakhe baba mamafu

anzima wezulu.

₁₃Ebuphaziphazini bobukhona bakhe

kwakhithika isinanja emafini,

kwamekeza nemibani.

₁₄USomnini uyaduma usemafini,

kwezwakala ilizwi lakaZimu ongoPhezulu.

₁₅Wadubula imisubela kwaphadlhalala izitha,

waphosa imibani kwahlangahlangana amanaba.

₁₆Somnini, lokha nawuvuthela ummoya ngeempumulo,

ukuzika kwelwandle kwambuleka;

iinsekelo zephasi zanekeka ebaleni

ngebanga lokukhalima kwakho.

₁₇Welula isandla sakhe aphezulu, wangidzwebula;

wangenyula emagwimbini wamanzi.

₁₈Wangisindisa esitheni sami esinamandla

nakilabo abangizondako

bangigabisela ngeenkhwepha.

₁₉Bangithelekela ngelanga lami lehlekelele,

kodwana uSomnini waba msekelami.

₂₀Wangikhupha emkghothweni

wangibeka etjhatjhalazini,

wangisindisa ngombana angithanda.

₂₁USomnini wangivuza ngombana nginganamlandu;

wangikhokhela ngombana nginezandla ezimsulwa.

₂₂Iye, ngilondile iindlela zakaSomnini;

azange ngenze okumbi ngokuhlanuka uZimami.

₂₃Ngihlala ngikhumbula imithethwakhe;

azange ngilahle iimiso zakhe.

₂₄Bengisoloko ngimsulwa kuye,

ngizilondile esonweni.

₂₅USomnini wangivuza ngombana nginganamlandu,

ngokuya ngobumsulwa bezandla zami phambi kwakhe.

₂₆Somnini, uziveza uthembekile kabathembekileko,

uziveza umsulwa kabamsulwa,

₂₇nakohlanzekileko uziveza uhlanzekile,

kodwana koneengwegwe uzibonakalisa uliqili.

₂₈Iye, wena usindisa abazithobileko,

abazigqajako ubehlise.

₂₉Mbala, Somnini, nguwe okhanyisa isibani sami,

utjhugulula ubumnyama engikibo ubenze ukukhanya.

₃₀Ngesizo lakho ngingathelekela ibutho,

ngoZimami ngingeqa umthangala wedorobho.

₃₁UZimu lo, ngoneendlela ezipheleleko,

ilizwi lakaSomnini alisoleki.

USomnini usihlangu sabo boke abaphephela kuye.

₃₂Ngubani uZimu ngaphandle kwakaSomnini?

Ngubani idwala ngaphandle kwakaZimu na?

₃₃NguZimu ongihlomisa ngamandla

nowenza indlelami iphephe.

₃₄Uqinisa imilenzami njengeyehlangumataka

angenze ngijame ngokuphepha eenqongolweni.

₃₅Ubandulela izandla zami ukulwa,

imikhonwami ikghona ukugoba umsebe wekoporo.

₃₆Ukungisekela kwakho kube sihlangu kimi,

isandla sakho sokudla singilondile

nawuphendula imithandazwami ngiqina idolo.

₃₇Ugangadela indlelami

bonyana ngingatshinyeki iingogoriyana.

₃₈Ngagijimisa izitha zami ngazifunyana;

azange ngijike zingakafi nya.

₃₉Ngaziphihliza zangasavuka;

zarabhalala ngaphasi kweenyawo zami.

₄₀Wangihlomisa ngamandla wokulwa,

wathobisa amanabami phambi kwami.

₄₁Wenza izitha zami zifulathele ipi,

ngarhayila abangizondako.

₄₂Barhuwelela bafuna isizo,

kodwana bangaba nomsizi.

Balilela uSomnini,

kodwana azange abaphendule.

₄₃Ngabatshidlha basileka kwanga ziintuli emmoyeni;

ngabagadanga njengedaka leendledlana.

₄₄Somnini, ungisindisile nangisahlelwa babantu,

wangenza ngaba yihloko yezizwe ezitjhili.

Abantu bakosobantu bayangikhothamela,

₄₅nabezwako ngami, bayangithobela,

imiqhamuka iyazincengela.

₄₆Imiqhamuka iyakoropana,

iza itatazela kusukela esiphephelweni sayo.

₄₇USomnini uyaphila!

Alidunyiswe idwala lami!

Akaphakanyiswe uZimu omsindisami!

₄₈UnguZimu ongibuyiselelako,

obeka izizwe ngaphasi kwami,

₄₉ongithukulula ezitheni zami.

Mbala, ungiphakamisa ngaphezu kwabajamelani bami,

angihluthule ebantwini benturhu.

₅₀Ngalokho ngizakudumisa Somnini, hlangana nezizwe;

ngibhine iindumiso ebizweni lakho.

₅₁UZimu unikela ikosi ayibekileko ukuhlula okukhulu;

akhombise ukwethembeka kozesiweko wakhe,

iye, kuDavida neenzukulwana zakhe isiphelani.