AMARHUBO 16

Ngivikela Zimu ngombana ngiphephela kuwe.

₂Mina ngathi kuSomnini: “Wena uyiKosami,

anginakho okuhle ngaphandle kwakho.”

₃Abosingazimu enarheni,

labo okuthiwa ngabanamandla,

angikareki nakancani ngabo.

₄Abazikhethela abosingazimu bazandisela isizi;

angeze nganikela kibo iminikelo yeengazi,

namkha ngiphathe amabizwabo ngeembhena zami.

₅USomnini usisabelo sami,

iye, ulilifa lami nekaphami,

wena Somnini ungilondele ifumbe yami.

₆Ngisikelwe umkhawulo eendaweni ezihle,

iye, ilifa elinganelisako.

₇Ngidumisa uSomnini ongilulekako,

ngitjho nebusuku ihliziywami iyangikhalima.

₈Ngesikhathi soke ngibeka uSomnini phambi kwami

njengombana angesidleni sami

angeze nganyakaziswa.

₉Ngalokho ihliziywami yenamile;

ngihlokoma ngamandla

ngombana umzimbami ulondekile.

₁₀Esikhundleni sokobana ungilahlele endaweni yabafileko,

namkha uvumele othembekileko wakho abone ithuna,

₁₁wena ungikhombisa indlela yokuphila.

Ukujabula okwanelisako kuphambi kwakho

nokwenama kungesidleni sakho isiphelani.