AMARHUBO 138

Ngikuthokoza ngehliziywami yoke;

ngikudumise phambi kwabosingazimu.

₂Ngiguqa nca ngethempelini lakho elicwengileko;

ngithokoze ibizo lakho

ngebanga lokwethembeka neqiniso lakho.

Mbala, uphakamise ibizo lakho

ngaphezu kwakho koke.

Mayelana nesithembiso sakho:

₃Ngelanga engakubiza ngalo,

wena wangiphendula.

Wangiqinisa idolo, wanginikela amandla.

₄Woke amakhosi wephasi

azakuthokoza wena Somnini,

lokha nezwa amezwi womlomakho.

₅Azakuvuma iingoma ngezenzo zakaSomnini,

athi: “Yikulu iphazimulo kaSomnini!”

₆Nanyana uSomnini aphakamile,

uyamtjheja ophasi.

Kodwana ozitjhayako

umbona akude.

₇Nanyana ngikhamba phakathi kwamanaba,

wena ulonda ipilwami etukuthelweni

yezitha zami.

Welula isandla sakho,

iye, isidla sakho singisindise.

₈Somnini uyangenyela.

Ukwethembeka kwakho, Somnini,

kujame isiphelani.

Yeke ungalahli umsebenzi wezandla zakho.