AMARHUBO 119

₁Babusisiwe abamsulwa eendleleni zabo,

abakhamba ngokuya ngomthetho kaSomnini.

₂Babusisiwe ababulunga ubufakazi bakhe,

iye, abamfuna ngehliziyo epheleleko,

₃abangenzi litho elimbi,

abakhamba eendleleni zakhe.

₄Somnini nguwe oyale ngeemfundiso zakho

kobana zilondwe ngokupheleleko.

₅Kwanga ukukhamba kwami kunganzinza

ukuze ngilonde iimiso zakho!

₆Angekhe ngaba neenhloni

lokha nangitjheja yoke imiyalwakho.

₇Ngizakuthokoza ngehliziyo eqotho

lokha nangifunda imithethwako elungileko.

₈Ngizakulonda iimiso zakho;

yeke, ungangilahleli safuthi.

₉Omutjha angayihlambulula njani indlelakhe na?

Ngokuyilonda ngokwelizwi lakho.

₁₀Ngikufuna ngehliziywami yoke;

ungavumi ngiphambuke emiyalwenakho.

₁₁Ngifihla amezwakho ehliziywenami

ukuze ngingoni kuwe.

₁₂Akudunyiswe wena Somnini!

Ngifundise iimiso zakho.

₁₃Ngeembhena zami ngimemezela

yoke imithetho yomlomakho.

₁₄Ukukhamba ngobufakazi bakho

kungijabulisa ngaphezu komnotho woke.

₁₅Ngizindla ngeemfundiso zakho,

ngiyelele iindlela zakho.

₁₆Ngiyathaba ngeemiso zakho,

ilizwi lakho angeze ngalidela.

₁₇Phatha incekwakho kuhle,

khona ngizakuphila, ngilonde amezwakho.

₁₈Vula amehlwami

kobana ngibone iimangaliso

ezisemthethwenakho.

₁₉Ngisikhonzi ephasini,

ungayifihli imiyalwakho kimi.

₂₀Umphefumulwami sewuphodlhekile

ngokulangazelela imithethwakho ngesikhathi soke.

₂₁Uyazikhalimela iindeleli,

okutjho abanikelelweko,

labo abaphambuka emiyalwenakho.

₂₂Susa kimi isiphoqo nenyazo

ngombana ngibubulungile ubufakazi bakho.

₂₃Nanyana ababusi bahlangene, bahleba ngami,

incekwakho izakuzindla ngeemiso zakho.

₂₄Ubufakazi bakho bukuthaba kwami,

iye, buziinluleko zami.

₂₅Umphefumulwami unamathele ethulini,

nje-ke vuselela ipilwami ngesithembiso sakho.

₂₆Nganeka iindlela zami kuwe,

wena wangiphendula,

yeke ngifundise iimiso zakho.

₂₇Ngiphe ukuzwisisa indlela yeemfundiso zakho,

ngalokho ngizakuzindla ngeemangaliso zakho.

₂₈Umphefumulwami ulisizi,

nje-ke ngiqinise ngokwesithembiso sakho.

₂₉Susa indlela yamala kimi,

ungirhawukele ngokomthethwakho.

₃₀Ngikhethe indlela yeqiniso,

ngabeka imithethwakho phambi kwami.

₃₁Somnini, ngikakarele ebufakazini bakho,

yeke ungavumi ngihlazeke.

₃₂Ngigijima endleleni yemiyalwakho

ngombana welule umkhumbulwami.

₃₃Somnini, ngifundise indlela yeemiso zakho,

nje-ke ngizayibulunga bekube sekupheleni.

₃₄Ngiphe ukuzwisisa

ukuze ngibulunge umthethwakho,

ngiwulonde ngehliziywami yoke.

₃₅Ngihlahle emizileni yemiyalwakho

ngombana ngiyathaba ngayo.

₃₆Phendulela ihliziywami ebufakazini bakho,

kungabi sekufuneni inzuzo.

₃₇Fulatheza amehlwami ekuqaleni ilize;

ungiphilise endlelenakho.

₃₈Zalisa isithembiso sakho encekwinakho

ukuze wesatjwe.

₃₉Susa ihlazo kimi

ngombana liyangilulaza;

imithethwakho iyanganelisa.

₄₀Maye, ngilangazelela iimfundiso zakho!

Yeke yewungiphilise ngokulunga kwakho.

₄₁Somnini, kwanga ukwethembeka kwakho

kungeza kimi,

iye, isindiswakho ngokwesithembiso sakho;

₄₂nje-ke ngizakwazi ukuphendula abangithukako

ngombana ngethemba ilizwi lakho.

₄₃Ungalisuseli safuthi ilizwi leqiniso emlonyenami

ngombana ngiqalelela imithethwakho.

₄₄Ngizakulonda umthethwakho ngesikhathi soke,

iye, ngizawulonda nini nanini.

₄₅Ngizakukhamba petlege

ngombana ngifunana neemfundiso zakho.

₄₆Ngizakukhuluma ngobufakazi bakho

phambi kwamakhosi,

angekhe ngaba neenhloni.

₄₇Ngiyathaba ngemiyalwakho

ngombana ngiyayithanda.

₄₈Ngikhongozela imiyalwakho

ngombana ngiyayithanda

begodu ngifuna ukuzindla ngeemiso zakho.

₄₉Khumbula isithembiso sakho encekwinakho

ongiphe ngaso ithemba.

₅₀Nakhu ukutjhiriyeka kwami esizini lami:

Isithembiso sakho sivuselela ipilwami.

₅₁Iindeleli zihlalele ukungiphoqa,

kodwana angiphambuki emthethwenakho.

₅₂Ngikhumbula imithethwakho yakade, Somnini,

ngiziduduza ngayo.

₅₃Ngebanga leenkhohlakali ngiyanyenya,

iye, ngalabo abalahla umthethwakho.

₅₄Iimiso zakho zimuvumo kimi

endlinami yokugogobala.

₅₅Ebusuku ngikhumbula ibizo lakho, Somnini,

ngilonda umthethwakho.

₅₆Lokhu kusisabelo sami:

ukubulunga iimfundiso zakho.

₅₇Somnini, sabelo sami,

ngiyathembisa bona ngizakulonda amezwakho.

₅₈Ngincancabeza kuwe ngehliziywami yoke,

yiba nomusa kimi ngokwesithembiso sakho.

₅₉Iindlela zami ngizicabangisisile,

yeke ngizokulandela ubufakazi bakho godu.

₆₀Ngirhaba ngingariyadi

ukulonda imiyalwakho.

₆₁Nanyana iintambo zeenkhohlakali zingirarejile,

angeze ngawukhohlwa umthethwakho.

₆₂Naphakathi kobusuku ngiyavuka ngikuthokoze

ngebanga lemithethwako elungileko.

₆₃Ngisinini sabo boke abakwesabako,

iye, boke abalonda iimfundiso zakho.

₆₄Somnini, iphasi lizele ngokwethembeka kwakho;

ngifundise iimiso zakho.

₆₅Uphethe incekwakho kuhle

ngokwelizwi lakho Somnini.

₆₆Ngifundise ilemuko elihle kanye nelwazi

ngombana ngikholelwa emiyalwenakho.

₆₇Ngingakathotjiswa ngangivame ukuphosisa;

kodwana kwanje, ngilonda ilizwi lakho.

₆₈Wena ulungile nokwenzako kulungile,

nje-ke ngifundise iimiso zakho.

₆₉Iindeleli zingininda ngamala,

kodwana ngibulunga iimfundiso zakho

ngehliziywami yoke.

₇₀Njengamafutha iinhliziyo zazo azinamizwa,

kodwana nakungimi yena,

ngithabela umthethwakho.

₇₁Kwaba kuhle kimi kobana ngithotjiswe

ukuze ngifunde iimiso zakho.

₇₂Umthetho womlomakho muhle kimi,

udlula amakhulukhulu weempaparwana zegolide nezesiliva.

₇₃Izandla zakho zangenza

begodu zangijamisa,

nje-ke ngiphe ukuzwisisa

ukuze ngifunde imiyalwakho.

₇₄Abakwesabako bazangibona, bathabe

ngombana ngiqalelela isithembiso sakho.

₇₅Somnini, ngiyazi bona imithethwakho ilungile

begodu ungithobise ngeqiniso.

₇₆Ukwethembeka kwakho kube yinduduzwami

ngokwesithembiso sakho encekwinakho.

₇₇Kwanga umusakho ungeza kimi

ukuze ngiphile

ngombana umthethwakho ukuthaba kwami.

₇₈Kwanga iindeleli zingaphoqeka

ngombana zingidlelezela ngamala,

kodwana nakungimi yena,

ngizakuzindla ngeemfundiso zakho.

₇₉Akuthi labo abekwesabako,

baphendukele kimi

ukuze bazi ubufakazi bakho.

₈₀Ihliziywami ayingasoleki

mayelana neemiso zakho

ukuze ngingahlaziseki.

₈₁Umphefumulwami ufisa isindiswakho,

ngiqalelela isithembiso sakho.

₈₂Amehlwami sele afiphele

ngokurhuluphela isithembiso sakho,

ngizibuza ngithi: “Uzongiduduza nini?”

₈₃Nanyana nginjengesikhumba sewayini emuleni,

angizikhohlwa iimiso zakho.

₈₄Mangaki amalanga asalele incekwakho na?

Uzabagweba nini abazumana nami?

₈₅Iindeleli zingembele umgodi,

zaphambana nomthethwakho.

₈₆Yoke imiyalwakho iliqiniso;

ngisize ngombana abantu bangizuma ngamala.

₈₇Bapheze bangiqeda ephasini,

kodwana mina angikazilahli iimfundiso zakho.

₈₈Yewungiphilise ngokwethembeka kwakho

ukuze ngilonde ubufakazi bomlomakho.

₈₉Somnini, ilizwi lakho lingelanini nanini;

lijame liqinile emazulwini.

₉₀Ubuqotho bakho

bungebeenzukulwana ngeenzukulwana;

unzinzise iphasi lajama.

₉₁Imithethwakho iseliqiniso nanje,

mbala, koke kulotjha wena.

₉₂Nangathana umthethwakho

bewungasikho ukuthakasa kwami,

ngabe sele ngabhubha esizini lami.

₉₃Angeze ngazilibala iimfundiso zakho

ngombana ngazo uyangiphilisa.

₉₄Ngingowakho; ngisindise

ngombana ngifunana neemfundiso zakho.

₉₅Iinkhohlakali zilindele ukungibhubhisa,

kodwana ngicabanga ngobufakazi bakho.

₉₆Ngibonile kobana kunomkhawulo

kikho koke okuphelelisiweko,

kodwana umyalwakho wenabile.

₉₇Maye, ngiyawuthanda umthethwakho!

Ngizindla ngawo ilanga loke.

₉₈Imiyalwakho ingenza ngihlakaniphe

ngaphezu kwezitha zami

ngombana ihlala ikimi.

₉₉Nginelwazi ukudlula abafundisi bami

ngombana ngizindla ngobufakazi bakho.

₁₀₀Nginelemuko ukudlula abadala

ngombana ngibulunga iimfundiso zakho.

₁₀₁Angibeki inyawo lami

eendleleni zobumbi,

ngalokho ngilonda ilizwi lakho.

₁₀₂Akhange ngiphambuke emithethwenakho,

ngombana nguwe ongifundisileko.

₁₀₃Maye, amezwakho anandipha kurhwalabhami!

Amnandi ukudlula iliju emlonyenami!

₁₀₄Ngeemfundiso zakho ngizuza ukuzwisisa;

ngalokho ngizonda indlela yamala.

₁₀₅Ilizwi lakho lisibani eenyaweni zami

begodu likukhanya emzilenami.

₁₀₆Ngenze isifungo ngasiqinisa

kobana ngilonde imithethwakho yokulunga.

₁₀₇Ngitlhage khulu;

ngiphilise Somnini ngokwesithembiso sakho.

₁₀₈Somnini, yamukela iminikelo yesihle yomlomami,

ungifundise imithethwakho.

₁₀₉Ipilwami isengozini ngesikhathi soke,

nokho angiwukhohlwa umthethwakho.

₁₁₀Iinkhohlakali zingibekele isifu,

kodwana akhange ngiphambuke eemfundisweni zakho.

₁₁₁Nini nanini ubufakazi bakho bulilifa lami;

mbala, bukuthaba kwehliziywami.

₁₁₂Ihliziywami izimisele

ukwenza iimiso zakho

bekube sekupheleni.

₁₁₃Ngiyamzonda uhliziyombili,

kodwana ngiyawuthanda umthethwakho.

₁₁₄Usiphephelo nesihlangu sami;

ngiqalelela isithembiso sakho.

₁₁₅Sukani kimi nina benzi bobumbi

ukuze ngibulunge imiyalo kaZimami!

₁₁₆Ngisingathe ngokwesithembiso sakho

ukuze ngiphile;

ungavumi ithemba lami lihlaziseke.

₁₁₇Ngisekele ukuze ngisinde;

iimiso zakho ngizakuhlala ngizinakile.

₁₁₈Udela boke abahlubuka iimiso zakho:

Ubukhohlisi babo bulilize.

₁₁₉Zoke iinkhohlakali zephasi,

uzengula njengegwebu;

ngalokho ngithanda ubufakazi bakho.

₁₂₀Umzimbami uyathuthumela ngokukwesaba

begodu nginevalo ngemithethwakho.

₁₂₁Ngenzile okufaneleko nokulungileko,

yeke ungangiliseleli ebagandelelini.

₁₂₂Qinisekisa incekwakho ihlalohle;

iindeleli zingangigandeleli.

₁₂₃Amehlwami sele afiphele

ngokurhuluphela isindiswakho,

iye, ukulunga okuthembisileko.

₁₂₄Phatha incekwakho ngokwethembeka kwakho,

ungifundise iimiso zakho.

₁₂₅Ngiyincekwakho, ngiphe ukuzwisisa

ukuze ngazi ubufakazi bakho.

₁₂₆Somnini, kusikhathi, hlanazela;

abantu bephule umthethwakho.

₁₂₇Njengombana ngithanda imiyalwakho,

ukudlula igolide, ngitjho igolidembala,

₁₂₈nokobana ngiyelela ngokupheleleko

zoke iimfundiso zakho,

ngizonda yoke indlela yamanga.

₁₂₉Ubufakazi bakho buyakarisa;

ngalokho ngiyabubulunga.

₁₃₀Isambulo selizwi lakho sikukhanya;

sinikela ukuzwisisa kwabanganalwazi.

₁₃₁Ngivula umlomo ngikhaluze,

iye, ngikhanukela imiyalwakho.

₁₃₂Phendukela kimi, ungirhawukele,

njengombana uvame ukwenza

kwabathanda ibizo lakho.

₁₃₃Nzinzisa amagadangwami

njengokwesithembiso sakho;

ungavumi bona ngibuswe

nanyana ngibuphi ubumbi.

₁₃₄Ngihlenge ekugandelelweni babantu

ukuze ngikwazi ukulonda iimfundiso zakho.

₁₃₅Khanyisela incekwakho;

ungifundise iimiso zakho.

₁₃₆Amehlwami ageleza iinyembezi,

ngombana abantu abalondi umthethwakho.

₁₃₇Somnini, wena ulungile

nemithethwakho iqotho.

₁₃₈Wayala ubufakazi bakho,

iye, bulungile begodu buthembeke ngokupheleleko.

₁₃₉Ukutjhisakalela kwami kuyangiqeda,

lokha amanabami nadela amezwakho.

₁₄₀Isithembiso sakho sihlolisisiwe,

nje-ke incekwakho iyasithanda.

₁₄₁Nanyana ngiphasi ngidelelekile,

angizikhohlwa iimfundiso zakho.

₁₄₂Ukulunga kwakho kulunge mlibe

nomthethwakho uliqiniso.

₁₄₃Ngehlelwe lisizi nobudisi,

kodwana imiyalwakho ikuthaba kwami.

₁₄₄Nini nanini iimfundiso zakho ziliqiniso;

yeke ngiphe ukuzwisisa ukuze ngiphile.

₁₄₅Ngilila ngehliziywami yoke,

nje-ke ngiphendule Somnini,

ngibulunge iimiso zakho.

₁₄₆Ngilila kuwe, ngisindise

ukuze ngilonde ubufakazi bakho.

₁₄₇Ngivuka ngamasa, ngibawe isizo;

ngiqalelele amezwakho.

₁₄₈Ngemilindo yobusuku ngiyaphilelwa,

ngizindle ngesithembiso sakho.

₁₄₉Yizwa ilizwi lami ngokwethembeka kwakho;

Somnini, ungiphilise ngokulunga kwakho.

₁₅₀Labo abangizuma ngobumbi bayatjhidela,

bakude nomthethwakho.

₁₅₁Kodwana wena Somnini, useduze

nemiyalwakho yoke iliqiniso.

₁₅₂Bengiseze nginelemuko lobufakazi bakho kwakade:

Wabunzinzisa bajama isiphelani.

₁₅₃Yelela isizi lami, ungisindise

ngombana akhange ngiwukhohlwe umthethwakho.

₁₅₄Mela indabami, ungihlenge;

ngiphilise ngokwesithembiso sakho.

₁₅₅Ukusindiswa kukude neenkhohlakali,

ngombana azifuni iimiso zakho.

₁₅₆Maye, mkhulu umusakho Somnini!

Ngiphilise ngokwemithethwakho.

₁₅₇Banengi abangizumako kanye namanabami,

kodwana akhange ngiphambuke ebufakazini bakho.

₁₅₈Nangiqala abahlubuki, ngifikelwa kunyenya,

ngombana abalondi isithembiso sakho.

₁₅₉Qala, ngithanda iimfundiso zakho, Somnini,

yeke yewungiphilise ngokwethembeka kwakho.

₁₆₀Ummongo welizwi lakho kukwethembeka

begodu zoke iimphetho zakho zijame isiphelani.

₁₆₁Ababusi bangizuma kunganabanga,

kodwana ihliziywami inevalo ngamezwakho.

₁₆₂Ngiyathaba ngesithembiso sakho

njengomuntu ofunyana ipango enengi.

₁₆₃Ngiwazondile amala, iye, ngiyawanyenya;

kodwana ngithanda umthethwakho.

₁₆₄Ngikudumisa kalikhomba ngelanga

ngebanga lemithethwakho elungileko.

₁₆₅Abathanda umthethwakho

banokuthula okukhulu,

akukho okungabenza bakhutjwe.

₁₆₆Somnini, ngilindele isindiswakho

nemiyalwakho ngiyayilandela.

₁₆₇Ngilonda ubufakazi bakho,

iye, ngibuthanda khulu.

₁₆₈Ngilonda iimfundiso nobufakazi bakho:

Zoke iindlela zami ziphambi kwakho.

₁₆₉Kwanga isibawo sami

singatjhidela kuwe, Somnini;

ungiphe ukuzwisisa ngokwelizwi lakho.

₁₇₀Inga isibawo sami sesirhawu

singafika phambi kwakho;

ungisindise ngokwesithembiso sakho.

₁₇₁Iimbhena zami zizakuphuphuma ngokudumisa,

ngombana ungifundisa iimiso zakho.

₁₇₂Ilimu lami lizakuvuma ngesithembiso sakho;

mbala, yoke imiyalwakho ilungile.

₁₇₃Kwanga isandla sakho

singalungela ukungisiza,

ngombana ngikhethe iimfundiso zakho.

₁₇₄Somnini, ngilangazelela isindiswakho,

iye, umthethwakho ukuthaba kwami.

₁₇₅Angiphile ukuze ngikudumise

nemithethwakho ingisize.

₁₇₆Ngeduke njengemvu elahlekileko.

Yewufune incekwakho

ngombana angikayikhohlwa imiyalwakho.