AMARHUBO 115

₁Akungabi kithi Somnini,

iye, akungabi kithi ukuhlonitjhwa;

kodwana akube sebizweni lakho

ngebanga lokwethembeka nobuqotho bakho.

₂Kubayini izizwe zithi uphi uZimabo,

₃khisibe usezulwini,

wenza koke akuthandako na?

₄Abosingazimu babo balisiliva negolide,

okumsebenzi wezandla zomuntu.

₅Banemilomo kodwana ayikhulumi;

banamehlo kodwana akaboni.

₆Baneendlebe kodwana azizwa;

baneempumulo kodwana azinukeleli.

₇Banezandla kodwana azinamizwa;

baneenyawo kodwana azikhambi;

imiphimbabo ayikwazi ukuhomuza.

₈Ababenzileko bafana nabo;

banjalo-ke boke abathembela kibo.

₉Israyeli, thembani uSomnini!

Mbala, ulisizo nesihlangu senu.

₁₀Ndlu ka-Aroni, thembani uSomnini!

Mbala, ulisizo nesihlangu senu.

₁₁Nina abesaba uSomnini,

thembani kuye!

Mbala, ulisizo nesihlangu senu.

₁₂USomnini uyasikhumbula:

Uyabusisa, iye, abusise indlu ka-Israyeli,

abusise indlu ka-Aroni,

₁₃abusise labo abamesabako,

abakhulu nabancani.

₁₄Kwanga uSomnini anganandisa,

nina nabantwabenu.

₁₅Inga ningabusiswa nguSomnini

owenza izulu nephasi!

₁₆Amazulu mazulu kaSomnini,

iphasi walinikela abantu.

₁₇Abafileko abamdumisi uSomnini,

iye, noyedwa owehlela kwabathulileko.

₁₈Kodwana thina sizamdumisa uSomnini,

kusukela nje bekube nini nanini.

Haleluya!