AMARHUBO 102

₂Somnini, yizwa umthandazwami;

ilizwi lesililo sami alifike kuwe.

₃Ungafihli ubuso bakho kimi

elangeni lesizi lami;

beka indlebakho kimi

mhlana ngikubizako;

ungiphendule masinyana!

₄Iye, amalangami aphela njengentuthu

namathambami avutha njengomlilo eziko.

₅Ihliziywami iwohlokile

begodu ibune njengotjani;

sese ngibuthakathaka kobana ngingadla.

₆Ngebanga lokuquma kwami

sese ngikhehlile, ngimathambo.

₇Nginjengegubulu lerhalawumba

nanjengesirhulurhulu semarubhini.

₈Nangileleko ngiyaphilelwa,

nginjengenyoni ehlezi yodwa ephahleni.

₉Ilanga loke izitha zami ziyangiphoqa;

abangithukako bahlolozela ngami.

₁₀Ngikhuma umlotha inga ngidla isikwa,

ngivange isiselo sami neenyembezi,

₁₁ngebanga lobukhali nelaka lakho,

iye, ungithethe wangifuthela eqadi.

₁₂Amalangami anjengethunzi entambama,

ngiyabuna njengotjani.

₁₃Kodwana wena Somnini,

unobukhosi banini nanini,

isinanazelo sakho ngeseenzukulwana ngeenzukulwana.

₁₄Yewusikime ngokwakho urhawukele iZiyoni!

Kusikhathi somusa ngalo,

iye, isikhathi esibekiweko sifikile

₁₅ngombana iinceku zakho ziyawabuka amatje walo

begodu zitlhuwela ithuli leZiyonelo.

₁₆Izizwe zizalesaba ibizo lakaSomnini,

idumo lakhe lihlonitjhwe makhosi woke wephasi

₁₇lokha navuselela iZiyoni.

Uzazibonakalisa asephazimulwenakhe,

₁₈anake umthandazo wabahlubule

begodu angekhe asinyaze isibawo sabo.

₁₉Mbala, lokhu kuzakutlolwa phasi

kube ngokwesizukulwana esizako

nesizwe esizakudaleka sizakudumisa uSomnini

₂₀lokha nasele asiqalile aphezulu ekucwengeni,

iye, lokha uSomnini nasele aqale phasi asezulwini,

₂₁ukuze alalele ukububula kweembotjhwa

nokutjhaphulula labo esele benganyelwe kukufa.

₂₂Ibizo lakaSomnini lizakumenyezelwa eZiyoni

nedumo lakhe eJerusalema,

₂₃lokha abantu nababuthana ndawonye,

ngitjho nemibuso

ukuze balotjhe uSomnini.

₂₄USomnini waqeda amandlami

ngisesephakathi kwendlela yepilo,

iye, warhunyeza amalangami.

₂₅Ngebangelo ngiyancenga ngithi:

“Zimami, ungangisusi

ngisesephakathi kwamalangami.”

Iminyakakho iseenzukulwaneni ngeenzukulwana.

₂₆Wabeka iinsekelo zephasi emandulo

namazulu amsebenzi wezandla zakho.

₂₇Zona izintwezo zizakubhubha,

kodwana wena ujamile.

Iye, koke lokho kuzakuphela njengengubo;

mbala, njengesambatho uzakukuphendulela,

ngalokho kuzakuphela.

₂₈Kodwana wena unguwe njalo,

iminyakakho ayinamkhawulo.

₂₉Abantwana beenceku zakho,

bazakuhlala baphephile.

Iinzukulwana zabo zizakunzinza phambi kwakho.