IZAGA 8

₁Ukuhlakanipha akubizi na?

Ukuzwisisa akurhuweleli na?

₂Kujame embundwini

hlanu kwendlela,

lapha kuhlangana khona imizila,

₃kurhuwelela eqadi kwamatatawu ngedorobheni

ebungenweni bamasango kuhlokoma kuthi:

₄“Ngiyanibiza nina madoda,

ngirhuwelela boke abantu!

₅Nina eninganalwazi, zuzani ilemuko!

Nina enidlhayeleko, zuzani ukuzwisisa!

₆Lalelani ngombana nginezinto ezinetlha,

iimbhena zami zikhuluma okufaneleko.

₇Umlomami umemezela okuliqiniso,

ubukhohlakali busikghabhudlho eembheneni zami.

₈Woke amezwi womlomami alungile,

alikho nalinye lawo eligwegwesileko

namkha elonakeleko.

₉Woke anqophile kozwisisako

begodu alungile kabafumana ilwazi.

₁₀Khethani ukusola kwami kunesiliva,

nirhuluphele ilwazi kunegolidembala,

₁₁ngombana ukuhlakanipha kuhle kunamaparele,

mbala akunalitho olifisako elingafana nakho.

₁₂“Mina, unokuhlakanipha ngiphila nelemuko;

ngihlanganyela nelwazi lengqondo ehle.

₁₃Ukwesaba uSomnini kukuzonda ubumbi,

Ngizonda ukuzitjhaya nokuziphakamisa

kanye nekulumo ephambeneko.

₁₄Kimi kunokweluleka nepumelelo;

mina nginokuzwisisa, nginamandla.

₁₅Ngami amakhosi ayabusa

nababusi benza imithetho elungileko.

₁₆Iinkhulu nabosaziwako babusa ngami,

iye, boke abaphatha ngokulungileko.

₁₇Ngithanda labo abangithandako,

abangifunako bayangifunyana.

₁₈Kimi kunobunjinga nedumo,

umnotho othandwako nepumelelo.

₁₉Isithelo sami singcono kunegolide,

ngitjho negolidembala

nomkhiqizwami ungcono kunesiliva ekhethekileko.

₂₀Ngikhamba emizileni yokulunga,

phakathi kweendlela zobulungiswa,

₂₁ukuze ngiphe abangithandako umnotho

kube lilifa labo,

ngizalise iinlulu zabo.”

₂₂“USomnini ungidale ekuthomeni kwendalwakhe,

ngaphambi kwemisebenzakhe yendulo.

₂₃Ngabunjwa mandulondulo,

ekuthomeni, ngaphambi komlando womhlaba.

₂₄Ngabelethwa amanzi amanengi angakabiphi,

kungakabiphi nemithombo ephuphuma amanzi;

₂₅ngaphambi kobana iintaba zinzinziswe,

iye, ngaphambi kobana kube nemibundu,

₂₆ngaphambi kobana adale ihlabathi nemimango,

ngitjho namathomo weentuli zephasi.

₂₇Ngasele ngikhona lokha uZimu najamisa amazulu,

lokha nathala umthala phezu kobuso bamalwandle;

₂₈nasungula isibhakabhaka phezulu,

abeka imikhawulo yeeyalu zamanzi amanengi;

₂₉nanikela amalwandle amaphethelwawo

ukuze amanzi angeqi umyalwakhe.

Lokha nathala iinsekelo zephasi

₃₀bengiseqadi kwakhe ngingusosino,

ngimthabela imihla ngemihla,

ngihlala ngijabulile phambi kwakhe,

₃₁ngijabulile ngelizwe lephasi lakhe,

ngithabele abantu.

₃₂“Nje-ke, madodana, yeningilalele;

ngithi babusisiwe abalonda iindlela zami.

₃₃Lalelani ukusola kwami.

Nakube nihlakaniphile, angeze nakudela.

₃₄Ubusisiwe umuntu ongilalelako,

oqapha eminyangwenami imihla ngemihla

alinde emathurini wamasangwami.

₃₅Ofumana mina ufumene ipilo

begodu uzuza umusa kuSomnini.

₃₆Kodwana ohlulwa kungifumana

uzilimaza yena ngokwakhe,

boke abangizondako bathanda ukufa!”