IZAGA 6

₁Ndodanami, nawenze isibambiso kumakhelwanakho,

wambamba isandla,

wazibophelela esikhundleni somqhamuka,

₂iye, nakube sewubanjwe yikulumakho,

wagolwa mamezwi womlomakho,

₃yeke yenza lokhu ndodanami:

Zitjhaphulule ngombana uwele ezandleni zakamakhelwanakho.

Rhaba, ulandelele umakhelwanakho loyo, umkhole.

₄Ungavumeli ubuthongo emehlwenakho,

nokuyenda eenkopheni zakho.

₅Zithukulule njengetsephe kumzumi,

nanjengenyoni esandleni somthiyi.

₆Yewuye ebutjhontjhwaneni vila ndina!

Uqale iindlela zabo khona uzakuhlakanipha!

₇Ubutjhontjhwani abunamrholi,

umtjhotjhozeli nombusi,

₈kodwana ehlobo buzibekela umphakwabo,

bubuthelele ukudla kwabo nakuvunwako.

₉Uzokurabhalala lapho bekube nini vila ndina?

Uzokuvuka nini ebuthongweni bakhobo?

₁₀Uyalalalala, uyendayende,

usongasonge izandla uphumule,

₁₁ngalokho ubuchaka buzakubhudungela njengesela,

nokweswela njengendoda ehlomileko.

₁₂Isibhidlamnyanya esonakaleko

sikhamba sikhuluma ikohliso,

₁₃sincinze amehlo,

sikhombise ngenyawo nangemino;

₁₄sinomkhumbulo ophambeneko,

silumba amano wokulimaza,

sihlala sicabanisa.

₁₅Ngalokho uzakwehlelwa yihlekelele msinyana,

ubhujiswe ngokuphazima kwelihlo,

kungabi nantatha.

₁₆Kunezinto ezisithandathu ezizondwa nguSomnini,

iye, ezilikhomba ezisinyenyiso kuye:

₁₇amehlo aziphakamisako,

ilimu elileya amala,

izandla eziphalaza iingazi ezimsulwa,

₁₈ihliziyo elumba amano wokonakala,

iinyawo ezirhaba ukugijimela ebumbini,

₁₉ufakazi wekohliso ophafuza amanga

nomuntu ocabanisako hlangana nabafo.

₂₀Ndodanami, bulunga umyalo kayihlo,

ungalahli ifundiso kanyoko.

₂₁Kubophelele ehliziywenakho mlibe,

ukuthekeleze entanyenakho.

₂₂Nawukhambako, kuzakuhlahla;

nawulalako, kukweluse;

nawuvukako, kukukhulumise.

₂₃Mbala umyalo usibani;

ifundiso imukhanyo.

Ukusolwa ngemiyalo kuyindlela yokuphila,

₂₄ukuze ulondeke emfazini owonakeleko,

iye, elimini elibutjhelelezi lesihlobongi.

₂₅Ungakhanuki ubuhle baso ehliziywenakho,

ungavumi bona sikuwunge ngeenkophe zaso,

₂₆ngombana ikokhelo yengwadla sisikwa esindulungu,

kodwana umfazi wenye indoda

uyingozi epilwenakho eligugu.

₂₇Indoda ingathwala umlilo ngesifuba,

kodwana izambatho zayo zingatjhi na?

₂₈Indoda ingakhamba phezu kwamalahle avuthako,

kodwana ingatjhi iinyawo na?

₂₉Unjalo-ke umuntu olalana nomfazi wenye indoda,

akunamuntu ongathinta umfazi loyo angahlunguphazwa.

₃₀Abantu abalideleli isela eleba

ukuze lizisuthise ngoba lilambile.

₃₁Nakube liyabanjwa lizakukhokha

ngokubuyelelwe kalikhomba

belinikele ngayo yoke ipahla yekumbalo.

₃₂Kodwana umuntu ohlobongako, uswela ingqondo;

owenza njalo uyazibhubhisa.

₃₃Uzakufumana amaduma nehlazo,

ukuhlaziseka kwakhe angeze kwasulwa.

₃₄Mbala isikhwele sivusa itukuthelo yendoda,

angeze yaba nomusa mhlana izibuyiselelako.

₃₅Angeze yamukela ihlawulo,

angeze yavuma ukufunjathiswa,

ngitjho nanyana kungaba ngokungangani.