IZAGA 31

₁Lawa mamezwi uLemuweli ikosi yeMasa awafundiswa ngunina.

₂“Lalela msanami!

Lalela ndodana engiyibelethileko!

Lalela ndodana yeemfungo zami!

₃Ungaziqedi ngabafazi,

amandlakho aphelele kababhubhisa amakhosi.

₄“Akusikho kwamakhosi, Lemuweli;

akusikho kwamakhosi ukurhuqa iwayini,

akusikho kwamakhosana ukomela utjwala.

₅Nakungasinjalo azakusela abe akhohlwe iimiso,

aphambanise amalungelo wabo boke abagandelelweko.

₆Thatha utjwalobo ubunikele obhubhako

newayini kilabo abamunyu emmoyeni;

₇abasele bakhohlwe ubuchaka babo,

bangasakhumbula isizi labo.

₈“Khulumela abangakwaziko ukuzikhulumela,

iye, labo abathintwe ziingameko.

₉Khuluma bewugwebe ngeqiniso,

jamela amalungelo wochakileko nodududu.”

₁₀Ngubani ongafumana umfazi onezandla?

Inani lakhe lidlula amaparele.

₁₁Indodakhe imethemba ngokuzeleko;

ayisweli inzuzo.

₁₂Ipilwakhe yoke wenzela indodakhe okuhle,

ingasi okumbi.

₁₃Ukhetha iwulu nelineni,

asebenze ngezandla ezivumako.

₁₄Ufana nemikhumbi yabarhwebi

evela khatjhana imlethele okugonywako.

₁₅Uvuka ngesamarimarima,

alungisele umndenakhe ukugoma,

abele neencekukazi zakhe imisebenzazo.

₁₆Uyacabangisisa, athenge isimu,

ngesithelo sezandla zakhe utjala isidiribe.

₁₇Ulungele ukwenza nanyana ngimuphi umsebenzi,

iingalo zakhe ziqinile emsebenzinakhe.

₁₈Uyalemuka bona ukurhweba kwakhe kunenzuzo,

nje-ke isibani sakhe asicimi ebusuku.

₁₉Uthatha iwulu kobana eluke,

ngesandla sakhe uphotha iintambo.

₂₀Abachakileko ubavulela izandla,

azilulele abadududu.

₂₁Nakukhithika iliqhwa, akesabi litho ngomndenakhe;

ngombana boke ubembese ezitlerebede.

₂₂Wenzela umbhedakhe amatjhila,

wembatha izambatho ezimhlophe zelineni nezibubende.

₂₃Indodakhe iyahlonitjhwa ebandla

lokha nayihlezi hlangana nabaphathi bendawo.

₂₄Wenza izambatho zangaphakathi bese uyazithengisa,

anikele abathengi imikhungo yokuthekeleza.

₂₅Wembathiswe amandla nesithunzi,

akesabi litho ngelikusasa.

₂₆Ukhuluma ngokuhlakanipha,

nomyalo othembekileko uselimini lakhe.

₂₇Utjheja iindaba zomzakhe,

akagomi isikwa sobuvila.

₂₈Abantwabakhe nabavukako bayamthokoza;

nendodakhe yenza njalo begodu iyambuka ithi:

₂₉“Banengi abafazi abanezandla,

kodwana wena mkami, ubadlula boke.”

₃₀Ukuthandeka kuyikohliso, nobuhle bulilize,

kodwana umfazi owesaba uSomnini ufanele ukudunyiswa.

₃₁Mnikeleni umvuzo wezandla zakhe,

kuthi imisebenzakhe imdumise esangweni ledorobho.