IZAGA 25

₂Kulidumo lakaZimu ukusitheka kwento,

kodwana kulidumo lamakhosi ukuhlolisisa ifihlakalo.

₃Njengombana izulu liphakamile nephasi lizikile,

zinjalo neenhliziyo zamakhosi: Azihlolisiseki.

₄Nawususa amanyela esiliveni elincithikiswako,

khona-ke usosino uzakukhanda isitja;

₅nawususa isikhohlakali phambi kwekosi,

isihlalo sayo sobukhosi sizakunzinziswa ngokulunga.

₆Ungaziphakamisi nawuphambi kwekosi,

godu ungazibeki phambili nawusebantwini abakhulu;

₇kungcono kube yikosi ethi kuwe: “Yewenyukele lapha”,

kunokobana wehliswe phambi kwesikhulu.

Okubone ngamehlwakho,

₈ungarhabi ukuse ebandla

ngombana uzakuthini ekugcineni

nasele umuntu wekhenu akurhubutjha?

₉Nawubanga umlandu nomuntu wekhenu

ungembuli ifihlo yomunye umuntu;

₁₀nakungasinjalo okuzwileko uzakuhlazisa,

nezwabatjho ngawe asoze yaphela.

₁₁Ilizwi elikhulunywe ngesikhathi esifaneleko

lifana namahabhula wegolide akghabise esitjeni sesiliva.

₁₂Njengesali legolide namkha umkghabiso wegolidembala,

kunjalo nokusola kohlakaniphileko endlebeni ezwako.

₁₃Njengokuqanda kweliqhwa ngesikhathi sokuvuna,

sinjalo-ke nesithunywa esethembekileko kiloyo osithumileko;

siqabula umphefumulo womniniso.

₁₄Njengamafu wekungu kanye nommoya onganazulu,

unjalo nomuntu ozidumisa ngezipho azigodlileko.

₁₅Ngokubekezela, umrholi uyancengeka

nelimu elithambileko lingephula ithambo.

₁₆Nawufumana iliju, ligome ngokulingeneko;

nakungasinjalo uzabhinjidelwa bese uyagonyuluka.

₁₇Ungaqheli ukuya ekumbeni kamakhelwana,

uzakanye akusuthe bese uyakunina.

₁₈Njengesibhuku, isabula namkha umsubela obukhali,

unjalo nomuntu ofakaza amanga ngomuntu wekhabo.

₁₉Njengezinyo elibuhlungu namkha inyawo elenyeleko,

kunjalo nokwethembela kongakathembeki ngeenkhathi zobudisi.

₂₀Njengomuntu ohlubula ingubo mhlana kumakhaza

nanjengesibharha esithelwa esilondeni,

unjalo nobhina iingoma ngomuntu osesizini.

₂₁Nakube isitha sakho silambile, siphe ukudla sigome;

nakube somile, siphe amanzi sisele.

₂₂Ngokwenza njalo,

uzabe inga udindela amalahle avuthako ehlokwaso,

uSomnini uzakuvuza.

₂₃Njengommoya wetlhagwini nawuletha umwuluko wezulu,

nelimu elihlebako liletha ukuqalana kumbi.

₂₄Kungcono ukuhlala ejikeni phezu kwephahla

kunokuhlalisana nomfazi onenturhu.

₂₅Njengamanzi aqandako emphinjeni owomileko,

zinjalo neendaba ezimnandi ezivela khatjhana.

₂₆Njengesiyalu esinedaka namkha umthombo ongcolisiweko,

unjalo olungileko ohlehlela emuva phambi kweenkhohlakali.

₂₇Akusikuhle ukugoma iliju ngokweqileko,

kunjalo nokufuna idumo phezu kwedumo.

₂₈Njengedorobho elinemithangala egirikileko,

unjalo nomuntu ongakghoni ukuzibamba.