IZAGA 11

₁Isilinganiso samanga sisinyenyiso kuSomnini,

kodwana ujabulela amatje afaneleko wokulinganisa.

₂Lokha ukuzikhukhumeza nakufikako

kulandela ihlazo,

kodwana abazithobako banokuhlakanipha.

₃Ukwethembeka kwabaqotho kuyabahlahla,

kodwana abangakathembeki babhujiswa buqili babo.

₄Umnono awunabubhadekelo ngelanga lelaka,

kodwana ukulunga kuhlenga ekufeni.

₅Ukulunga kwabamsulwa kubenzela indlela enqophileko,

kodwana okhohlakeleko uwiswa bukhohlakali bakhe.

₆Ukulunga kwabaqotho kuyabahlenga,

kodwana amaqili abhajwa eenkanukweni zawo.

₇Lokha okhohlakeleko nafako,

ithemba lakhe liyatjhabalala;

akulindele emnothwenakhe kuyanyelela.

₈Olungileko wenyelwa emirarweni,

kuthi okhohlakeleko adlhunyekwe kiyo.

₉OnganaZimu ubulala wekhabo ngomlomakhe,

kodwana abalungileko benyelwa ngelwazi.

₁₀Lokha olungileko naphumelelako, idorobho liyajekezela,

kuthi okhohlakeleko nabhubhako, kube nehlokomo.

₁₁Ngesibusiso sabaqotho, idorobho liyaphakanyiswa,

kodwana ngomlomo weenkhohlakali, liyabhujiswa.

₁₂Onyaza wekhabo akanangqondo;

ozwisisako ubamba ilimu lakhe.

₁₃Umdlhevezi udlheveza ifihlo,

kodwana othembekileko unefihlo.

₁₄Ngokuswela iseluleko isizwe siyawa,

kodwana ukuphepha kuza ngabeluleki abanengi.

₁₅Owenzela omunye isibambiso, uba neenhlupheko ezinengi,

kodwana ozonda ukufaka isandla esibambisweni uphephile.

₁₆Umfazi onomusa uyahlonitjhwa,

kodwana iinrhonga zizuza umnono kwaphela.

₁₇Onomusa uzenzela ubuhle,

kodwana onesihluku uzilimaza yena.

₁₈Okhohlakeleko uzuza umvuzo owonakeleko,

kodwana otjala ukulunga uvuna umvuzo weqiniso.

₁₉Onzinze ekulungeni uzifumanela ipilo,

kodwana olandela ubumbi uzibizela ukufa.

₂₀Abaneenhliziyo ezonakeleko basinyenyiso kuSomnini,

kodwana uthokoziswa ngabaneendlela ezimsulwa.

₂₁Nakanjani okhohlakeleko uzakuhlunguphazwa

begodu isizukulwana sabalungileko sizakuhlengwa.

₂₂Njengesali legolide epumulweni yewotji,

sinjalo-ke nesimomondiya somfazi onganasimilo.

₂₃Isifiso sabalungileko siphelela ebuhleni;

ithemba leenkhohlakali liphelela etukuthelweni.

₂₄Omunye unikela ngokutjhaphuluka,

nokho azuze khulu,

omunye ugodla ngokungakafaneli,

kodwana agcine achakile.

₂₅Umuntu ophanako uyaphumelela

nokholisa abanye naye uyakholiswa.

₂₆Abantu bathuwelelisa umuntu ogodla ikoroyi,

kodwana isibusiso siphezu koyithengisako.

₂₇Ofuna okuhle uyamukeleka,

ofuna ubumbi buyamehlela.

₂₈Othembela emnonwenakhe uyawa,

kodwana abalungileko batlhurha njengamakari.

₂₉Olimaza umndenakhe uzuza ummoya;

isidlhadlha esinjalo siba likhoboka lesihlakaniphi.

₃₀Isithelo solungileko simumuthi wokuphila;

ohlakaniphileko ubuthelela abantu kuye.

₃₁Nakube olungileko ufumana okumfaneleko,

kangangani-ke okhohlakeleko nesoni!