UNUMERI 8

₁USomnini wakhuluma noMosi wathi ₂akakhulume no-Aroni athi: “Lokha nawukhanyisa iimbani ezilikhomba kufuze zikhanyise indawo ephambi kwelithi lazo.” ₃Nje-ke u-Aroni wenza njalo. Wajamisa iimbani bona zikhanyise endaweni ephambi kwelithi lazo njengombana uSomnini ayale uMosi. ₄Ilithi leembani, ukusukela esikhondweni bekube semathuthumbenalo, belikhandwe ngegolide. Bekumsebenzi okhandwe ukuya ngomfanekiso uSomnini awukhombisa uMosi.

₅Godu uSomnini wakhuluma noMosi wathi: ₆“Khupha amaLevi kuma-Israyeli, uwahlambulule. ₇Nasi indlela ozawahlambulula ngayo: Afafaze ngamanzi wehlambululo, uwenze bona asuse boke uboya emzimbenawo bese ahlanze nezambatho zawo nawo ahlambe. ₈Nje-ke akathathe ikunzana nomnikelo wakhona weenthoro ongoweflowuru esefiweko edutjwe ngamafutha we-oliva bese wena uthatha enye ikunzana kube ngeyomhlabelo wehlambululo. ₉Tjhideza amaLevi ngaphambi kwetende lokuhlanganela bese uhlanganisa umkhambathi wakwa-Israyeli woke. ₁₀Lokha nawutjhideza amaLevi phambi kwakaSomnini, ama-Israyeli kufuze abeke izandla zawo phezu kwawo. ₁₁U-Aroni yena kufuze anikele amaLevi lawo phambi kwakaSomnini njengomnikelo wesibiko ophuma kuma-Israyeli ukuze akwazi ukusebenzela uSomnini. ₁₂Ngalokho amaLevi azakubeka izandla zawo phezu kweenhloko zeenkunzanezo. Wena-ke unikele enye yazo ibe ngeyomhlabelo wehlambululo kuthi enye ibe ngeyomhlabelo wokutjhiswa kuSomnini, ukwenzela amaLevi itethelelo kuSomnini. ₁₃Nje-ke jamisa amaLevi phambi kwaka-Aroni namadodanakhe bese wena uwanikela abe njengomnikelo osibiko kuSomnini. ₁₄Ngendlela leyo-ke uzakukhupha amaLevi phakathi kwama-Israyeli ukuze abe ngewami.

₁₅“Emva kobana uhlambulule bewanikela amaLevi njengomnikelo osibiko, azakungena ngetendeni lokuhlanganela bona alotjhe. ₁₆Iye, amaLevi anikelwe mina ngokupheleleko hlangana nama-Israyeli. Ngizithathele wona bona abe ngewami esikhundleni sawo woke amazibulo wama-Israyeli, koke okuvele qangi esibelethweni. ₁₇Mbala, woke amazibulo wama-Israyeli, kungaba ngewabantu namkha wefuyo, angewami. Kwathi mhlana ngimadlha woke amazibulo enarheni yeGibhide, ngazahlukanisela wona kwa-Israyeli bona abe ngewami. ₁₈Nje-ke esikhundleni sawo woke amazibulo wama-Israyeli, ngizithathele amaLevi bona abe ngewami. ₁₉Nginikele amaLevi ngokupheleleko ku-Aroni namadodanakhe bona enze umsebenzi wama-Israyeli ngetendeni lokuhlanganela. Azakwenzela ama-Israyeli itethelelo kuSomnini, ngaleyondlela avikele amatshwenyeko nakwenzeka bona ama-Israyeli atjhidele khulu endaweni ecwengileko.”

₂₀UMosi no-Aroni kanye nomkhambathi woke wama-Israyeli benza kumaLevi koke uSomnini agade ayale uMosi ngakho. ₂₁AmaLevi ahlanza izambatho zawo bese u-Aroni wawanikela njengomnikelo osibiko kuSomnini, wawenzela netethelelo kobana awahlambulule. Ngaleyondlela amaLevi ahlanjululwa ezonweni zawo. ₂₂Emva kwalokho amaLevi eza bona athome umsebenzawo etendeni lokuhlanganela ngaphasi kwelihlo laka-Aroni namadodanakhe. Lokho uSomnini agade ayale uMosi bona kwenziwe kumaLevi, bakwenza kiwo.

₂₃USomnini wabuya wakhuluma noMosi wathi: ₂₄“Nakhu okumayelana nabaduna bamaLevi: Ukusukela kwabaneminyaka ematjhumi amabili nahlanu ukuya phezulu, bazakungena bona benze umsebenzi wetende lokuhlanganela, ₂₅kodwana abaneminyaka ematjhumi amahlanu bazakuthatha umhlalaphasi, bangasasebenzi. ₂₆Nokho bangasiza ngokuba lilihlo labafowabo etendeni lokuhlanganela, kodwana bangasebenzi. Ngilokho ozakwenza ngamaLevi lokha nawuwahlelela umsebenzi.”