UNUMERI 5

₁USomnini wakhuluma noMosi wathi: ₂“Yala ama-Israyeli bona akhuphele ngaphandle kwekampa boke abanekhwekhwe, woke onokuvuza namkha loyo osilaphele ngokuthintana nesidumbu. ₃Nikhuphe omduna nomsikazi ngokufanako. Bakhupheleni ngaphandle kwekampa ukuze bangasilaphazi ikampabo ngombana ngihlala phakathi kwabo.”

₄Ngambala ama-Israyeli enza njalo, abakhuphela ngaphandle kwekampa. Iye, enza njengombana uSomnini bekayale uMosi.

₅Godu uSomnini wakhuluma noMosi wathi ₆akakhulume nama-Israyeli athi: “Nangabe indoda namkha umfazi wenza nanyana ngisiphi isono kowekhabo ngendlela leyo one kuSomnini, uzakuba nomlandu. ₇Kufuze avume isono asenzilekweso, ahlawule nokona kwakhe ngokupheleleko begodu angezelele kwesihlanu ehlawulwenakhe. Uzakunikela lokho kiloyo amonileko. ₈Nangabe umoniwa akasekho begodu akanamjameli ongamukela ihlawulo yomoni, khona ihlawulo yomlandu leyo ayisiwe kuSomnini kobana ibe ngeyomphristi. Ihlawulo leyo ayinikelwe neqama lokuthethelela ukuze umphristi enzele umoni itethelelo kuSomnini. ₉Godu eemphiweni ezikhethekileko ama-Israyeli aziletha kumphristi, umnikelo osibiko kuSomnini uzakuba ngowomphristi. ₁₀Umuntu angahlosa bona ufuna ukwenzani ngezipho zakhe ezikhethekileko, kodwana nangabe sele anikele isipho kumphristi angeze asasibuyisela kuye godu.”

₁₁USomnini wabuya wakhuluma noMosi wathi ₁₂akakhulume nama-Israyeli athi: “Nangabe umfazi akathembeki endodenakhe ngokuhlobonga, ₁₃azebe nenye indoda, kodwana kufihlakale endodenakhe begodu kungeze kwazeka bonyana uzisilaphazile ngombana angakhange abanjwe nobufakazi bungekho, _14-15kwenzeke indodakhe ingenwe mumoya wesikhwele imsolele bona usilaphele, indoda leyo kuzakufanela ilethe umkayo loyo kumphristi. Lokhu kufuze kwenziwe nalokha iba nesikhwele nokumsolela, khibe akakazisilaphazi. Ayilethe nomnikelo ofunekako ngomfazi loyo okutjho ithungana leflowuru yebhali. Ingatheli amafutha we-oliva phezu kwayo begodu ingafaki amakha kiyo ngombana imunikelo weenthoro ngebanga lesikhwele, umnikelo weenthoro wokuveza bona umfazi unomlandu namkha akanamlandu.

₁₆“Umphristi uzakutjhideza umfazi loyo, amjamise phambi kwakaSomnini. ₁₇Uzakukha amanzi acwengileko ngesitjeni somdaka bese ukha ihlabathi phasi ngethaberinakelini ayithele ngemanzinapho. ₁₈Ngemva kobana umphristi ajamise umfazi loyo phambi kwakaSomnini, uzamtlharulula iinhluthu ehloko bese ubeka ezandleni zakhe umnikelo weenthoro osikhumbuzo, okumnikelo wesikhwele. Esandleni somphristi kuzabe kunamanzi amunyu, okumamanzi aletha amanikelela. ₁₉Nje-ke umphristi uzakumemezela amanikelela emfazini loyo athi, ‘Nangabe akhange kube nenye indoda elala nawe, wangazisilaphaza ngokuhlobonga ngesikhathi usesandleni somyenakho, khona-ke yiba ngotjhaphulukileko emanikeleleni wamanzi amunyu la. ₂₀Kodwana nangabe khewazisilaphaza, wahlobonga ngokulala nenye indoda ngaphandle komyenakho, lokha usese sesandleni sakhe, ₂₁kwanga uSomnini angakwenza isithuko nesiga phakathi kwabantu bekhenu. USomnini akutjhwabanise igwayana lakho bese avuvukise isibeletho sakho.’ Leyo kuyindlela umphristi ekufuze amemezele ngayo amanikelela emfazini loyo begodu athi, ₂₂‘Kwanga amanzi aletha amanikelela la, angangena esiswini sakho avuvukise isibeletho begodu atjhwabanise negwayana lakhwelo.’ Yeke umfazi uzakuthi, ‘Amen, Amen.’

₂₃“Umphristi uzabese utlola amanikelela lawo encwadini, abuye godu ahlanze umtlolo ngemanzini amunyu. ₂₄Uzakuseza umfazi loyo amanzi amunyu nabanga amanikelela ukuze angene emzimbenakhe athome ukumbangela ikathazo. ₂₅Umphristi uzakwenza lokho ngemva kobana athethe umnikelo weenthoro ongowesikhwele ezandleni zomfazi, awuphakamise njengomnikelo osibiko kuSomnini bese awulethe e-aldarini. ₂₆Uzakunghwatha isandla esigcweleko somnikelo weenthoro kube sisabelo sesikhumbuzo, awutjhise phezu kwe-aldari. Emva kwalokho aseze umfazi loyo amanzi wakhona. ₂₇Nangabe mbala umfazi loyo uzisilaphaze ngokungathembeki endodenakhe, khona kuzakuthi bona umphristi amseze amanzi amunyu wokubanga amanikelela, amanzi lawo azamngena, isibeletho sakhe sivuvuke bese igwayana lakhe litjhwabane. Umfazi loyo uzakuba sithuko hlangana nabantu bekhabo. ₂₈Kodwana nangabe umfazi loyo azange azisilaphaze begodu umsulwa, khona-ke uzakuba ngotjhaphulukileko emanikeleleni nabantwana uzababeletha.

₂₉“Lowo-ke kumthetho mayelana nesikhwele. Usebenza nangabe umfazi uzisilaphaza ngokuhlobonga asese sesandleni sendodakhe, ₃₀nalokha indoda engenwa mumoya wesikhwele bese isolela umfazayo. Kufuze kulethwe umfazi phambi kwakaSomnini bese umphristi usebenzisa woke umthetho lo emfazini loyo. ₃₁Indoda leyo izakuhlambuluka esonweni sokusolela kodwana umfazi yena uzakuthwala umlandu nakube wonile.”