UNUMERI 36

₁Iinhloko zemindeni kaGiliyadi umsa kaMakiri omsa kaManase okuziinzukulwana zekoro kaJosefa, zeza zakhuluma phambi kwakaMosi nabarholi okuziinhloko zemindeni yama-Israyeli, ₂zafese zathi: “Ngesikhathi uSomnini uZimu ayala ikosethu bona inarha le yabelwe ama-Israyeli ngefumbe, ikosethu yayalwa nguSomnini uZimu bonyana ilifa lomfowethu uTselofirhadi linikelwe amadodakazakhe. ₃Kodwana nangabe ende kenye yamadodana weenkoro zama-Israyeli, khona ilifa lawo lizakuthathwa esabelweni sabobaba lingezelelwe ekorweni ebendele kiyo. Nje-ke ingcenye yelifa lethu esabelwe lona ngefumbe izokuthathwa kithi. ₄Lokha umnyaka wokubuyisela nawufikako kuma-Israyeli, ilifa lawo lizokungezelelwa elifeni lekoro endele kiyo. Ngalokho ilifa labo lizokuhletjhulwa elifeni lekoro yabobaba.”

₅Ngokomyalo kaSomnini uMosi wayala ama-Israyeli wathi: “Ikoro yesizukulwana sakaJosefa ikhuluma iqiniso. ₆Nje-ke nakhu uSomnini ayale ngakho mayelana namadodakazi kaTselofirhadi uthi, ‘Wona angathathwa nanyana ngubani abona awalungele, ikani kumumuntu womndeni wekoro kayisawo. ₇Ilifa lama-Israyeli akukafaneli lidluliselwe ekorweni ngekoro ngombana omunye nomunye wama-Israyeli kufuze anamathele elifeni lekoro yaboyise. ₈Nje-ke nanyana ngimuphi umntazana weenkoro zama-Israyeli onelifa, kufuze ende komunye womndeni wekoro kayise ukuze omunye nomunye wama-Israyeli abe nelifa lendlu yaboyise. ₉Ngalokho akunalifa elizakudluliselwa ekorweni ukuya kwenye ngombana enye nenye ikoro izakunamathela elifeni layo.’ ”

₁₀Amadodakazi kaTselofirhadi enza njengombana uSomnini ayale uMosi: ₁₁UMarhila, uTiritsa, uRhogila, uMilika noNoya bebathethwe madodana wendlu yabafowabo kayisabo. ₁₂Iye, bebathethwe ngemndenini wakaManase umsa kaJosefa. Ngalokho ilifa labo lahlala lisekorweni yomndeni kayise wamadodakazi lawo.

₁₃Leyo-ke mithetho nemiyalo uSomnini ayala ngayo ama-Israyeli ngoMosi kwaMowabi ngemrhobeni weJordani malungana neJerikho.