UNUMERI 13

₁USomnini wakhuluma noMosi wathi: ₂“Thumela amadoda bona ayokuhlola inarha yeKanana engiyinikele ama-Israyeli. Ekorweni ngayinye yaboyise nithumele umrholi oyedwa.”

₃Nje-ke uMosi wathuma amadoda lawo asuka erhalawumbeni leParana njengokomyalo kaSomnini. Boke bekumadoda aziinhloko zeenkoro zakwa-Israyeli. ₄Naka-ke amabizwawo:

₁₆Lawo-ke bekumabizo wamadoda uMosi awathuma bona ayokuhlola inarha. UMosi wathiya uHosiya umsa kaNuni bona nguJotjhuwa.

₁₇Lokha uMosi nakawathumako bona ayokuhlola inarha yeKanana, wathi kiwo: “Nqombani ngesewula yenarha, nenyukele entatjaneni yakhona, ₁₈niqale bona inarha injani, abantu abakhe kiyo baqinile namkha mitheretherana, banengi namkha lidlanzana, ₁₉nokobana inarha leyo yihle namkha yimbi, iindawo abahlala kizo zikhamukhamu namkha zimadorobho abiyelwe ngomthangala na. ₂₀Niqale bona ihlabathi ivundile namkha ilibhudu nokobana inemithi namkha awa na. Qinani isibindi nibuye neenthelo zayo.” (Ngesikhatheso bekusikhathi sokuvuthwa kwamadiribe wokuthoma.)

₂₁Akhamba-ke ayokuhlola inarha leyo ukusukela erhalawumbeni leTsini ukufikela eRerhobho eduze neLebo-Rhamathi. ₂₂Akhuphukela ngesewula yenarha, afika eRhebroni lapha bekuneenzukulwana zaka-Anakhi, okungu-Arhimani, uTjhetjhayi noTalimayi. (IRhebroni beyakhiwe iminyaka elikhomba ngaphambi kokwakhiwa kweTsowani eGibhide.) ₂₃Afika emrhobeni we-Etjhikolo afese aquntula lapho ipande enesitjhutha samadiribe. Amadoda amabili atjatha isitjhutheso ngesigodo saba phakathi kwawo. Godu bekathwele amarharinada namakhiwani. ₂₄Indawo leyo yabizwa bona mrhoba we-Etjhikolo ngebanga lesitjhutha samadiribe esakhiwa madoda wama-Israyeli lapho.

₂₅Abuya ekuhloleni inarha ekupheleni kwamalanga amatjhumi amane. ₂₆Afika kuMosi no-Aroni kanye nemkhambathini woke wama-Israyeli eKhadetjhi eserhalawumbeni leParana. Abikela aboMosi nomkhambathi woke umbiko abuye nawo, abe abakhombisa neenthelo zenarha leyo. ₂₇Atjela uMosi athi: “Kazi besafika-ke enarheni owasithuma kiyo. Kuyinarha egeleza ibisi neliju, neenthelo zakhona nanzi. ₂₈Nokho abantu bakhona ziinkakaramba namadorobho wakhona anemithangala begodu aziinthabathaba. Phezu kwalokho sabona neenzukulwana zaka-Anakhi lapho. ₂₉Ama-Amalekhi ahlala ngesewula yenarha. AmaRhithi, amaJebusi nama-Amori wona ahlala ngeentatjaneni zenarha leyo. Kuthi amaKanana ahlala eduze nelwandle namagegana neJordani.”

₃₀UKalebi wathulisa amadoda lawo phambi kwakaMosi wathi: “Asikhuphukeni khona nje sithumbeni inarha ngombana vele singaphumelela ukukwenza lokho.”

₃₁Kodwana amadoda agade akhambe naye athi: “Awa, akukghonakali bona singajamelana nabantu labaya ngombana baziinkakaramba kunathi.”

₃₂Nje-ke aletha kuma-Israyeli umbiko omumbi ngenarha akhamba bona ayoyihlola athi: “Thina inarha esaya kiyo bona siyoyihlola, kuyinarha eginya abantu abahlala kiyo. Begodu boke abantu esibabone khona, kubabantu abaziinkakaramba. ₃₃Godu sabona lapho neentsitsirimba, okutjho ama-Anakhi iinzukulwana zeentsitsirimba. Thina-ke sazibona sifana neentethe kizo; khisibe nazo vele zasibona sinjalo.”